ޕީއެންސީގެ މެޖޯރިޓީ އޮންނަ ޖުޑިޝަރީ ކޮމިޓީން އެންމެ މަތިން މާކްސް ދިނީ މަހާޒު އަށް
7 އޮކްޓޯބަރު 2025 | އަންގާރަ 18:07މަހާޒް އަލީ ޒާހިރަށް ޖުޑިޝަރީ ކޮމިޓީން 97 އިންސައްތަ މާކްސް ދިން
ރައީސް މުއިއްޒުގެ ކޮންޓްރޯލް އޮންނަ މަޖިލީހުން ވަކިކުރި ސުޕްރީމް ކޯޓުގެ ކުރީގެ ފަނޑިޔާރު މަހާޒު އަލީ ޒާހިރު
ޓެކްސް އެޕީލް ޓްރައިބިއުނަލްގެ ހުސްވެފައިވާ 2 މަޤާމަށް މެންބަރުން އައްޔަންކުރުމަށް، ރައީސް ޑރ. މުހައްމަދު މުއިއްޒު ފޮނުއްވި ނަންތަކުގެ ތެރެއިން ސުޕްރީމް ކޯޓުގެ ފަނޑިޔާރުކަމުން ވަކިކުރި މަހާޒް އަލީ ޒާހިރަށް އެންމެ މަތިން މާކްސް ދީފިއެވެ.
ޓްރައިބިއުނަލްގެ 2 މެންބަރުންގެ މަގާމު ހުސްވެފައި އޮންނަތާ އެތައް ދުވަހެއް ވެފައިވާ އިރު، އެ ދެމަގާކަމަށް ކުރިމަތިލިމީހުންގެ ތެރެއިން 7 މީހެއްގެ ނަން ރައީސް މަޖިލީހަށް ފޮނުއްވިއެވެ. ރައީސް ފޮނުއްވި ލިސްޓުގައި ވެސް އޮތީ އެމަނިކުފާނުގެ ފުލް ކޮންޓްރޯލް އޮންނަ މަޖިލީހުން ވަކިކުރި މަހާޒުގެ ނަމެވެ.
އަންގާރަ ދުވަހުގެ ޖުޑިޝަރީ ކޮމިޓީގައިި ރައީސް ފޮނުއްވި ނަންތައް ވަނީ ދިރާސާކޮށްފައެވެ. އަދި 7 ނަމުގެ ތެރެއިން 75 އިންސައްތައަށް ވުރެ މަތިން މާކްސް ލިބިގެން ފާސްކޮށްފައިވަނީ 5 ނަމެކެވެ. މީގެ ތެރެއިން 97 އިންސައްތަ މާކްސްއާއެކު ލިސްޓުގެ ކުރީގައި އުޅެނީ މަހާޒުއެވެ.
ކޮމިޓީން މާކްސް ދިން ގޮތަށް ބަލާއިރު، މަހާޒު އަލީ ޒާހިރު އަށް 97 އިންސައްތަ، އިބްރާހިމް އަފީފު އަށް 91 އިންސައްތަ، ޝައުފާ އިބްރާހިމް އަށް 83 އިންސައްތަ އަދި އަހުމަދު ޔާމިން އަށް 80 އިންސައްތައެވެ.
ޖުޑިޝަރީ ކޮމިޓީ އިން ނަންތައް ފާސްކޮށް ކޮމިޓީ ރިޕޯޓް މިހާރު ވަނީ މަޖިލީހުގެ ތަޅުމަށް ފޮނުވާފައެވެ. އެގޮތުން ބުދަ ދުވަހަށް ތާވަލުކުރި ޖަލްސާގައި ވަނީ އެޖެންޑާކޮށްފައެވެ. ބުދަ ދުވަހުގެ ޖަލްސާގައި ކޮމިޓީތަކުން ފޮނުވާ ކަންތައްތަކުގެ ތެރޭގައި ހިމެނެނީ ވެސް މި މައްސަކަތް އެކަންޏެވެ. އެހެންކަމުން މާދަމާ މި މައްސަލަ މަޖިލީހުން ފާސްކުރާނެއެވެ.
