ސަރުކާރު ހަމަމަގަށް އެޅުވުމަށް ޕާޓީތަކާއެކު މަސައްކަތް ފެށުމަށް އަދާލަތުން ގަރާރެއް ފާސްކޮށްފި
އިގްތިސާދީ ހާލަތު ރަނގަޅުވާނެކަމުގެ ދޮގު ވައުދުތަކާއެކު ވެރިކަމަށް އައި ސަރުކާރުން، ދައުލަތުގެ ފިސްކަލް ސިޔާސަތު ވިއްސިވިހާލިކޮށްލައިފި ކަމަށް އަދާލަތު ޕާޓީއިން ބުނެފައިވޭ
ގަރާރު ފާސްކުރި އަދާލަތު ޕާޓީގެ 3 ވަނަ ދައުރުގެ މަޝްވާރާ މަޖިލީހުގެ 38 ވަނަ ބައްދަލުވުމުގެ ތެރެއިން
އަދާލަތު ޕާޓީގެ 3 ވަނަ ދައުރުގެ މަޝްވަރާ މަޖިލީހުގެ 38 ވަނަ ބައްދަލުވުމުގައި، މާތްވެގެންވާ އިސްލާމްދީނާއި ދިވެހި ގައުމާއި ރައްޔިތުންގެ ހައްގުގައި ސަރުކާރު ޖަވާބުދާރިކޮށް، ސަރުކާރު ހަމަމަގަށް އެޅުވުމަށް ސިޔާސީ ޕާޓީތަކާއެކު މަސައްކަތް ފެށުމަށް ގަރާރެއް ފާސްކޮށްފިއެވެ.
މި ގަރާރުގައި ފާހަގަކޮށްފައިވާ ގޮތުގައި، ގާނޫނު އަސާސީ ބަދަލުކޮށްގެން ރައްޔިތުންގެ މަޖިލީހުގެ މެމްބަރުން ގާނޫނު އަސާސީއާ ހިލާފު ގާނޫނަކުން ކަސްތޮޅު އަޅުވައި، ގާނޫނު ހެދުމުގެ ބާރުގެ މިނިވަންކަމާއި އިމްތިޔާޒުތަކަށް ސަރުކާރުން ވަނީ އަރައިގަނެފައެވެ. އަދި ގާނޫނު ހެދުމުގެ ބާރުގެ މިނިވަންކަމާއި އިމްތިޔާޒުތަކަށް އަރައިގަތް މައްސަލަ ބަލަން ފެށުމުން ސުޕްރީމް ކޯޓުގެ ފަނޑިޔާރުން ގާނޫނީ އިޖުރާއުތަކާ ހިލާފަށް މަގާމުން ވަކިކޮށް، އަދުލު އިންސާފު ގާއިމް ކުރުމުގެ ބާރުގެ މިނިވަންކަން މިސަރުކާރުން ނަގާލާފައިވާކަމަށް އަދާލަތު ޕާޓީއިން ބުނެފައިވެއެވެ.
ރައީސް މުއިއްޒުގެ ސަރުކާރުގެ ނާގާބިލުކަމާއި ދޯހަޅި ސިޔާސަތުތަކުގެ ސަބަބުން، ދިވެހި އިގްތިސާދު ސުނާމީ އާއި ކޮވިޑު19ގެ އާލަމީ ވަބާއާ ވިދިގެންވެސް ނުދާހާ ދަށު ދަރަޖައަކަށް ގޮސްފައިވާކަމަށާއި، އަސާސީ މުދަލުގެ އަގުތައް އިންތިހާއަށް އުފުލި، ސަރުކާރުގެ ކުންފުނިތަކުން ފޯރުކޮށްދޭ އަސާސީ ހިދުމަތްތަކުގެ އަގުތައް އަތްނުފޯރާފަށަށް މައްޗަށްގޮސްފައިވާކަން ގަރާރުގައި ފާހަގަކޮށްފައިވެއެވެ. އަދި ދައުލަތުން އާދައިގެ އާއްމު ރައްޔިތުން އަތުން ހޯދާފައިވާ މުދަލާއި ހިދުމަތްތަކަށް ދައްކަންޖެހޭ ފައިސާ ނުދައްކާ ގަސްދުގައި ސިޔާސީ ބޭނުމަށް ކުދި އަދި މެދުފަންތީގެ ވިޔަފާރިތައް ބަނގުރޫޓުކޮށް، އާއިލާތަކުގެ އާއްމު ދިިރިއުޅުން ހުއްޓޭ ހިސާބަށް ގޮސްފައިވާކަމަށް މިގަރާރުގައި ފާހަގަކޮށްފައިވެއެވެ.
އިގްތިސާދީ ހާލަތު ރަނގަޅުވާނެކަމުގެ ދޮގު ވައުދުތަކާއެކު ވެރިކަމަށް އައި ސަރުކާރުން، ދައުލަތުގެ ފިސްކަލް ސިޔާސަތު ވިއްސިވިހާލިކޮށް، ހާރިޖީ ގުޅުންތައް މެނޭޖުނުކުރެވުމުގެ ސަބަބުން، ބޭރުގެ ދަރަނި ނުދެއްކި، ދިވެހި ދައުލަތް އިފްލާސްވުމާ ގާތަށްގޮސް، ދިވެހި ދައުލަތުގެ މިނިވަންކަމާއި އިސްތިގުލާލު ގެއްލިދާނެކަމުގެ ބިރު ހީވެފައިވާކަމަށް އަދާލަތު ޕާޓީން ވަނީ ބުނެފައެވެ.
މިނިވަން މީޑިއާއަށް ހަރަކާތްތެރިވުމުގެ ދޮރުތައް ބަންދުކޮށް، އިސްލާމްދީނުގެ ތަރަހައިގެ ތެރޭގައި މިނިވަންކަމާއެކު ހިޔާލު ފާޅުކުރުމުގެ ހައްގު ހިފަހައްޓަމުންދާކަމަށްވެސް ގަރާރުގައި ފާހަގަކޮށްފައިވެއެވެ.
އަދާލަތު ޕާޓީއިން ސަރުކާރު ހަމަމަގަށް އެޅުވުމަށް ސިޔާސީ ޕާޓީ ތަކާއެކު މަސައްކަތް ފެށުމަށް ގަރާރެއް ފާސްކޮށްފައިވާއިރު، ރައީސް މުއިއްޒުގެ ސަރުކާރުން މިހާރު ފެންނަނީ ހުދުމުހުތާރު ވެރިކަމެއް ކުރެއްވުމަށްޓަކާ މަގުކޮށަމުންދާ މަންޒަރުކަމަށް ގިނަ ބަޔަކު ސިފަކުރެއެވެ. އަދި ސަރުކާރުގެ ދޯހަޅި ސިޔާސަތުތަކުގެ ސަބަބުން ދިވެހިރައްޔިތުން އިންތިހާއަށް ބިކަވެފައިވާ މި ދަނޑިވަޅުގައި ސަރުކާރު ޒިންމާދާރު ކުރުމުގެ ހަރަކާތްތައް ވަނީ އިތުރުވެފައެވެ.
މިގޮތުން އޮކްޓޯބަރު 3 ވާ ހުކުރު ދުވަހު އިދިކޮޅު މައި ޕާޓީ އެމްޑީޕީގެ ފަރާތުން މާލޭގައި ބޮޑުއެއްވުމެން ބޭއްވުމަށް ދަނީ ވަރަށް ފޯރިޔާއެކު ތައްޔާރު ވަމުންނެވެ. ރައީސް މުއިއްޒުގެ ސަރުކާރުން ދިވެހި ރައްޔިތުންނާއި މުޅި ގައުމު ނިކަމެތިކޮށްފި ކަމަށާއި، ގައުމު ހަމަ މަގަށް އެޅުވުމަށްޓަކައި އޮކްޓޯބަރު 3 ގައި ރަށްރަށުން ވެސް މީހުން މާލެއަށް އަރައި، ސަރުކާރު ޖަވާބުދާރީކުރުވަން ހުރިހާ ރައްޔިތުން ނުކުތުމަށް ކުރީގެ ރައީސް އިބްރާހިމް މުހައްމަދު ސޯލިހު ވަނީ ގޮވާލައްވާފަ އެވެ. އަދި ރައީސް މުއިއްޒުގެ މިސަރުކާރު ޒިންމާދާރު ކުރުވާ ޖަވާބުދާރީ ކުރުވަން އިދިކޮޅު ހުރިހާ ސިޔާސީ ޕާޓީތަކަށް ކުރީގެ ރައީސް އަބްދުﷲ ޔާމީން ވެސް ވަނީ ދައުވަތު ދެއވާފައި އެވެ.
