ޓްރެފިކްގެ މައްސަލަތަކަށް ހައްލު ގެނައުމަށް ޕަބްލިކް ޓްރާންސްޕޯޓު ހަރުދަނާ ކުރަންޖެހޭ: މޭޔަރު އާޒިމް
މާލެސިޓީގައި ވެހިކަލްތައް ދަނީ ގިނަވަމުން، މައްސަލަ ވަނީ އިތުރު
ފަސްކާފު ޕްރޮގްރާމްގައި މޭޔަރު އާދަމް އާޒިމް ވާހަކަދައްކަވަނީ
މާލެސިޓީގައި ޕަބްލިކް ޓްރާސްޕޯޓު ހަރުދަނާ ކުރަންޖެހޭ ކަމަށާއި، މި ނިޒާމު ހަރުދަނާ ނުކޮށް ޓްރެފިކްގެ މައްސަލަތަކަށް ހައްލު ނުލިބޭނެ ކަމަށް މޭޔަރު އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަސްކާފު ޕްރޮގްރާމްގައި މޭޔަރު އާޒިމް ވިދާޅުވީ މާލެސިޓީގައި ވެހިކަލްތައް ގިނަ ވަމުންދާ ދިޔުމުގެ ސަބަބުން މައްސަލަތައް ވަރަށް ގިނަ ކަމަށާއި، މިމައްސަލަތައް ހައްލު ކުރުމަށް އަހަރުތަކެއް ނަގާނެ ކަމަށެވެ. އަދި މިމައްސަލަތައް ކުރިމަތިވެފައިވަނީ އެންމެ އަހަރަކުން ނޫން ކަމަށް އޭނާ ވިދާޅުވިއެވެ.
މާލެއަކީ ގިނަ ޚިދުމަތްތައް ހޯދުމަށް ރާއްޖޭގެ ހުރިހާ ހިސާބަކުން މީހުން އަންނަ ރަށް ކަން ފާހަގަކުރައްވައި އާޒިމް ވިދާޅުވީ ކުރިއަށް އޮތްތަނުގައި އިތުރު ތަރައްގީއާއެކު މާލެސިޓީއަށް ގިނަ ބަޔަކު އަންނާނެ ކަމަށެވެ. އާޒިމް ވިދާޅުވީ ސިނަމާލެ ބްރިޖުގެ އިތުރުން އިތުރު ބްރިޖެއް ގާއިމްކުރަމުންދާއިރު، ވެހިކަލްތައް ދުއްވާ މިންވަރު އިތުރުވާނެ ކަމަށާއި، 2 ފުރޮޅުލީ ވެހިކަލްއާއި، 4 ފްރޮޅުލީ ވެހިކަލްތައް އިތުރުވާނެ ކަމަށެވެ.
އާޒިމް ވިދާޅުވީ މިހާރު ވެސް ޓްރެފިކްގެ މައްސަލަ ބޮޑު ކަމަށާއި، ވަރަށް ބޮޑަށް ތޮއްޖެހުމުންދާ ކަމަށެވެ. ވެހިކަލްތައް ގިނަ ކަމަށާއި، ވެހިކަލްތައް ގެނައުން ކޮންޓްރޯލް ނުކޮށް ހައްލު ނުލިބޭނެ ކަމަށް އޭނާ ވިދާޅުވިއެވެ. އާޒިމް ވިދާޅުވީ މިމައްސަލަތައް ހައްލު ކުރުމަށް މާލެސިޓީގައި ޕަބްލިކް ޓްރާސްޕޯޓު ހަރުދަނާ ކުރުމަކީ ވަރަށް މުހިންމު ކަމެއް ކަމަށެވެ. ގަޑިއަށް އެއްތަނުން އަނެއްތަނަށް ދެވޭނެ ޕަބްލިކް ޓްރާންސްޕޯޓު ނިޒާމެއް ގެނެވިއްޖެ ކަމަށްވާނަމަ ގިނަ މީހުން އަމިއްލަ ވެހިކަލް ގެނައުން ވަރަށް ބޮޑަށް މަދުކުރާނެ ކަމަށާއި، އަމިއްލަ ވެހިކަލް ދުއްވުން ވެސް މަދުވާނެ ކަމަށް އާޒިމް ވިދާޅުވިއެވެ.
ޓްރެފިކްގެ މައްސަލަތައް މަގުމަތީގެ މައްސަލަތައް ހައްލު ކުރުމަށް ވަގުތުކޮޅެއް ނަގާނެ ކަމެއް އަޅުގަނޑު ގަބޫލުކުރަނީ. މިހާރު ވިސްނުންތެރިކަމާއެކު އެކަން ކުރާ މީހަކު ނުއެއްބުނާނެ އެއް އަހަރު ދުވަހުގެ ތެރޭގައި މިކަން ހައްލުކުރާނެއެކޭ. މިއީ އެއްއަހަރުން ވެފައި ހުރި ކަމެއް ނޫން. މިއީ އެތައްއެތައް އަހަރެއްގެ ބޮޑު މައްސަލައެއް.އަދި ކުރިއަށް އޮތްތަނުގައި މިމައްސަލަތައް އިތުރަށް ބޮޑުވެގެންދިއުމަކީ އެކަށީގެންވާ ކަމެއް. އެއީ އިތުރު ބްރިޖެއް އެބަ އާދޭ. އެބްރިޖް އައުމުން އެތަންތަނަށް ދާ މީހުން ގިނަވާނެ. މާލެ މި ރަށަކީ ގިނަ ޚިދުމަތްތައް ހޯދުމަށް މިހާރުވެސް އެގޮތަށް އަންނަ ތަނެއް. އޭގެ ތެރޭގައި ޕަބްލިކް ޓްރާސްޕޯޓު ހަރުދަނާ ކުރަންޖެހޭ. ޕަބްލިކް ޓްރާސްޕޯޓަކީ މިކަމަށް އޮތް އެއް ހައްލު. ޔަގީންކަމާއެކު ގަޑިއަށް އެއްތަނުން އަނެއްތަނަށް ދެވޭނެ ޕަބްލިކް ޓްރާންސްޕޯޓު ނިޒާމެއް ގެނެވިއްޖެ ކަމަށްވަންޏާ ގިނަ މީހުން އަމިއްލަ ވެހިކަލް ގެނައުން ވަރަށް ބޮޑަށް މަދުކުރާނެމާލެސިޓީގެ މޭޔަރު އާދަމް އާޒިމް
މާލެސިޓީގައި ވެހިކަލް ދުއްވާނެ އަދަދު ކަނޑައެޅުމުގެ މަސައްކަތައްކުރާކަން ފާހަގަކުރައްވައި އާޒިމް ވިދާޅުވީ އަދަދު ކަނޑައެޅުމުން ވެހިކަލް އެތެރެކުރުން ވަރަށް ބޮޑަށް ކޮންޓްރޯލް ކުރެވޭނެ ކަމަށެވެ.
އެމަސައްކަތް އިސްލާމިކް ޔުނިވަރސިޓީ އާއި ގުޅިގެން އެމަސައްކަތް މިކުރިއަށްދަނީ. ގާތްގަނޑަކަށް ނިމުމުގެ މަރުހަލާގައި މިހާރު އުޅެނީ. އޭރު ޓްރާސްޕޯޓު މިނިސްޓަރާ ވާހަކަދައްކައިގެން އަޅުގަނޑުމެން ވާހަކަ ދައްކައިގެން އެއަށް ކޮމެންޓް ހޯދައިގެން އެ އިމްޕްލިމެންޓް ކުރުމުގެ މަސައްކަތް ފަށައިގަންނާނަން. އެކަމަކު ކެރީން ކެޕޭސިޓީ ކަނޑައަޅާއިރު، ދުއްވޭ އަދަދު ކަނޑައަޅާއިރު ރަނގަޅު ޕަބްލިކް ޓްރާންސްޕޯޓެއް އޮންނަން ޖެހޭ. އެއީ ޓެކްސީ ލައިނެއް ވިޔަސް ބަސް ވިޔަސް އަދި ޓްރެއިން ވިޔަސް މިޕްލޭން ކުރެވި އެ އަންނަންޖެހޭ.މާލެސިޓީގެ މޭޔަރު އާދަމް އާޒިމް
އާޒިމް ވިދާޅުވީ މިމަސައްކަތްތައް ކުރަނީ ޓްރާންސްޕޯޓް މިނިސްޓަރު މުހައްމަދު އަމީންއާއި މަޝްވަރާކުރެވިގެން ކަމަށާއި، ވަރަށް ބޮޑު އެއްބާރުލުމެއް މިނިސްޓްރީން ދޭ ކަމަށެވެ. އަދި ގުޅިގެން މަސައްކަތްތައް ކުރެވޭނަމަ ދުރު މުސްތަގު ބަލަކަށް ރަނގަޅު ނިޒާމެއް ގެނެވޭނެ ކަމަށް އާޒިމް ވިދާޅުވިއެވެ.
