ޑޮމެސްޓިކް ހާބަރަކީ މާލޭ ސިޓީ ކައުންސިލްގެ ބިމެއް، އެމްޕީއެލްއިން އެ ބިން ބޭނުންކުރަމުން ދަނީ ގާނޫނާއި ޚިލާފަށް: މޭޔަރ އާޒިމް
ޑޮމެސްޓިކް ހާބަރަ އަކީ މާލޭ ސިޓީ ކައުންސިލްގެ ތަނެއް, އެތަން ބޭނުންކުރަމުން ގެންދަނީ ގާނޫނާއި ގަވައިދާއި ޚިލާފަށް
މާލޭ ސިޓީ ކައުންސިލް މޭޔަރ އާދަމް އާޒިމް: ޑޮމެސްޓިކް ހާބަރަކީ މާލޭ ސިޓީ ކައުންސިލްގެ ބިމެއް ކަމަށާއި އެމްޕީއެލްއިން އެ ބިން ބޭނުންކުރަމުން ދަނީ ގާނޫނާއި ޚިލާފަށް ކަމަށް ވިދާޅުވި
ޑޮމެސްޓިކް ހާބަރަ އަކީ މާލޭ ސިޓީ ކައުންސިލްގެ ތަނެއް ކަމަށާއި އެ ތަން މޯލްޑިވްސް ޕޯޓްސް ލިމިޓެޑުން ބޭނުން ކުރަމުން ގެންދަނީ ގާނޫނާއި ގަވައިދާއި ޚިލާފަށް ކަމަށް މާލޭ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވެއްޖެ އެވެ.
މާލޭ ސިޓީ ލޭންޑް އިންފޮމޭޝަން ސިސްޓަމްއާއި ގުޅޭ ގޮތުން މައުލޫމާތު ހިއްސާކުރެއްވުމަށް ބޭއްވި ޚާއްސަ ނޫސްވެރިންގެ ބައްދަލުވުމެއްގައި ވާހާކަދައްކަވަމުން މޭޔަރ އާޒިމް ވިދާޅުވީ ސިޓީ ކައުންސިލަށް އާމްދަނީ ހޯދުމަށްޓަކައި ކުރާ މަސައްކަތުގެ ތެރެއިން އެންމެ ބޮޑު އަމާޒަކީ އެ ކައުންސިލްގެ ބިންތައް އެންމެ ރަނގަޅުގޮތުގައި ބޭނުން ހިފުން ކަމަށެވެ.
އާޒިމް ވިދާޅުވީ އެހެން އެކަން އޮތް ނަމަވެސް ސިޓީ ކައުންސިލްގެ ބިން ތަކަށް ލިބެން ޖެހޭ ގިނަ އަދަދެއްގެ ފައިސާ އަދިވެސް ނުލިބިވާކަމަށެވެ.
އެކަމަށް މިސާލުޖައްސަވަމުން އާޒިމް ވިދާޅުވީ އެމްޕީ އެލް އިން މިހާރު ވެސް އެ ބޭނުން ކުރަމުން ގެންދާ މާލޭ ޑޮމެސްޓިކް ހާބަރ އަކީ ސިޓީ ކައުންސިލްގެ ތަނެއް ކަމަށާއި އެތަން އެމްޕީއެލް އިން ބޭނުންކުރަމުން ގެންދަނީ ގާނޫނާއި ގަވައިދާއި ޚިލާފަށް ކަމަށެވެ.
އާޒިމް ވިދާޅުވީ ޓީޖެޓީ ސަރަހައްދާއި ނޯތް ހާބަރ ސަރަހައްދު ވެސް ބޭނުންކުރަމުން ގެންދަނީ ގަވައިދާއި ޚިލާފަށް ކަމަށެވެ.
މިސާލަކަށް ބަލަންޏާ މިހާރު ވެސް ބޭނުން ކުރަމުން ގެންދާ މާލޭ ޑޮމެސްޓިކް ހާބަރ އަކީ ސިޓީ ކައުންސިލްގެ ތަނެއް، އެތަން އެމްޕީއެލް އިން ބޭނުންކުރަމުން ގެންދަނީ ގާނޫނާއި ގަވައިދާއި ޚިލާފަށް، ހަމަ އެގޮތަށް ޓީޖެޓީ ސަރަހައްދާއި ނޯތް ހާބަރ ސަރަހައްދު ވެސް.މާލޭ ސިޓީ މޭޔަރ އާދަމް އާޒިމް
އާޒިމް ވިދާޅުވީ އެ ތަންތަނަކީ މާލޭ ސިޓީ ކައުންސިލްގެ ތަންތަން ކަމަށް އޭރުގެ މޭޔަރ އަދި މިހާރުގެ ރައީސް ޑރ މުހައްމަދު މުއިއްޒު ވެސް ވިދާޅުވެ އެތަންތަން ހޯދަވަން ވެސް މަސައްކަތް ކުރެއްވި ކަމަށެވެ.
އާޒިމް އިތުރަށް ވިދާޅުވީ އެ ތަންތަން ހޯއްދަވާދެއްވައި ވީހާ ވެސް އަވަހަށް ސިޓީ ކައުންސިލް އާއި ހަވާލުކޮށްދެއް ވުމަކީ ރައީސް މުއިއްޒުގެ ޒިންމާއެއް ކަމަށެވެ. އަދި ރައީސްގެ އިޚްލާސްތެރިކަމެއް ހުރީވިއްޔާ އެކަން ކޮށްދެއްވާނޭ ކަމަށް ވެސް އާޒިމް ވިދާޅުވިއެވެ.
އާޒިމް ވިދާޅުވީ މާލޭ ސިޓީގެ ބިންތަކުން ލިބޭ މަންފާއެއްގެ ފައިދާ ލިބެންޖެހޭނީ މާލޭގެ ރައްޔިތުންނަށް ކަމަށާއި އެމްޕީއެލް އަކަށް މާލޭ ސިޓީ ކައުންސިލްގެ މުދާ ބޭނުންކޮށްގެން އާމްދަނީއެއް ނުހޯދޭނޭ ކަމަށެވެ.
އަދި އެއި ރައުސްމާލު ވަކިކޮށްފައި ހުރި ތަނެއް ކަމަށާއި އެ ފަރާތުން އާމްދަނީ ހޯދަން ޖެހޭނީ އެތަނަށް ދައުލަތުން ދިން ފައިސާއިން ކޮށްފަހުރި އިންވެސްޓްމަންޓް ތަކުން ކަމަށް ވެސް އާޒިމް ވިދާޅުވި އެވެ.
