ރޫބިއޯ ސްޓޭޓް ސެކްރެޓަރީގެ ހައިސިއްޔަތުން މެދުއިރުމަތީގެ ފުރަތަމަ ދަތުރުގައި ތެލް އަވީވް އަށް

އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ، މަގާމުގެ ހައިސިއްޔަތުން މެދު އިރުމައްޗަށް ކުރައްވާ ފުރަތަމަ ދަތުރުފުގައި އިސްރާއީލުގެ ވެރިރަށަށް ވަޑައިގެންފިއެވެ.

މާކޯ ރޫބިއޯ އިސްރާއީލަށް ވަޑައިގަތީ ހޮނިހިރު ދުވަހުގެ ރޭގެ ވަގުތެއްގައެވެ. ރިޕޯޓުތައް ބުނާ ގޮތުގައި އޭނާ މި ދަތުރު ކުރައްވަނީ އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި، ޣައްޒާގެ ފަލަސްޠީނު ރައްޔިތުން އެހެން ތަނަކަށް ބަދަލުކުރުމުގެ ހުށަހެޅުމަށް ފުޅާ ދާއިރާއެއްގައި ފާޑުކިޔުންތައް އަމާޒުވަމުންދާ ދަނޑިވަޅެއްގައެވެ.

ޓްރަމްޕް ފުރަތަމަ މި ހުށަހެޅުން ހުށަހެޅުއްވީ ޖެނުއަރީ 25 ވަނަ ދުވަހުއެވެ. އެއީ ޣައްޒާ ހުސްކުރުމަށް މިޞްރާއި އުރުދުން އިން ޣައްޒާގެ ފަލަސްޠީނު ރައްޔިތުން ބަލައިގަތުމަށް ހުށަހެޅުއްވި ހުށަހެޅުމެކެވެ. މި ދެ ޤައުމުންވެސް މިކަމާ ހަރު އަޑުން ދެކޮޅު ހަދާފައިވެއެވެ.

ފެބްރުއަރީ 4 ވަނަ ދުވަހު، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާއެކު ވޮޝިންގްޓަންގައި ބައްދަލުކުރެއްވުމަށްފަހު، ޓްރަމްޕް ވަނީ މުޅި ދުނިޔެ އަށް ހައިރާންކަން ގެނުވި މި ހުށަހެޅުން ހާމަ ކުރައްވާފައެވެ. އެއީ، ޣައްޒާގެ ރައްޔިތުންނަށް ހަމަ ޖެހޭ ދިރިއުޅުމެއް ހޯއްދަވައިދެވުން ބޭރުފުށުން ދެއްކެވުމަށް ފަހު، އެތަނުގެ 2.2 މިލިއަން ފަލަސްތީނު މީހުން އަވަށްޓެރި ގައުމުތަކުގައި ވަޒަންވެރިކޮށް، އެމެރިކާއިން ފަލަސްތީނުގެ ކަނޑުގެ އައްސޭރި ސަރަޙައްދު ކޮންޓްރޯލްކޮށް، މިލްކުވެރިކަން ހޯދައި، އެ ސަރަޙައްދު "މެދުއިރުމަތީގެ ރިވިއެރާ" އަށް ބަދަލުކުރައްވަން ބޭނުންފުޅުވާ ކަމަށް ވިދާޅުވެ ހުށަހެޅުއްވި ހުށަހެޅުމެކެވެ.

އެންމެ ބޮޑު ހައިރާން ކަމެއް ދުނިޔެއަށް ލިބުނީ، ފެބްރުއަރީ 10 ވަނަ ދުވަހު، އޭނާގެ މި ޕްލޭންގެ ދަށުން ފަލަސްތީނު ރައްޔިތުންނަށް ޣައްޒާ އަށް އެނބުރި އައުމުގެ ޙައްޤު ނުލިބޭނެކަމަށް ވިދާޅުވުމާ އެކުގައެވެ.

އެމެރިކާގެ ރައީސްގެ މި ބަސްފުޅުތަކުން ފަލަސްތީނު ރައްޔިތުންނަށް އިތުރު ނުތަނަވަސްކަން ލިބިގެން ދިޔަ ކަމަށް ރިޕޯޓުތައް ބުނެއެވެ. އެއީ މިނިވަން ދައުލަތެއް ގާއިމު ކުރުމުގެ އުއްމީދު އަނެއްކާވެސް ފަނޑުވެ އެމީހުންގެ އަސްލު ވަޒަނުން ބޭރުކޮށްލަފާނެ ކަމުގެ ކަންބޮޑުވުމެވެ.

ފާޑު ކިޔާ ފަރާތްތަކުން ރައީސް ޓްރަމްޕްގެ މި ހުށަހެޅުއްވުން ސިފަ ކޮށްފައިވަނީ ނަސްލު ނައްތާލުމާ އެއްފަދަ އަމަލެއްގެ ގޮތުގައެވެ.

އެމެރިކާގެ އެންމެ ގާތް މިތުރުގެ ގޮތުގައި ބެލެވޭ އިސްރާއީލުގެ ސިފައިންގެ ޣައްޒާއަށް ފާއިތުވެ 16 މަސްދުވަހުގެ ތެރޭގައި ހުއްޓުމެއް ނެތި ދެމުންދިޔަ ހަމަލާތައް، މިހާރު ވަގުތީގޮތުން މެދުކަނޑާލާފައިވީ ނަމަވެސް، ވޭތުވެދިޔަ 16 މަސްދުވަހުގެ ތެރޭގައި 47,000 އަށްވުރެ ގިނަ ފަލަސްތީނު ރައްޔިތުން ޝަހީދުވެފައިވާ ކަމަށް ޣައްޒާގެ ޞިއްޙަތާ ބެހޭ މިނިސްޓްރީން ބުނެއެވެ.

މިކަމުގެ ސަބަބުން އިސްރާއީލާ ދެކޮޅަށް ނަސްލު ނައްތާލުމާއި ހަނގުރާމައިގެ ޖަރީމާ ތަކުގެ އެތައް ކުށެއްގެ ތުހުމަތުތައް ކުރެވެމުންދެއެވެ.