ހޭންޑްބޯލް ޗެމްޕިއަންޝިޕް: އެއްވެސް މެޗަކުން ބަލިނުވެ ޔޫތް ސްޕޯޓްސް ކްލަބް ޗެމްޕިއަންކަން ހޯދައިފި

ތިންވަނަ ހޭންޑްބޯލް މޯލްޑިވްސް ޗެމްޕިއަންޝިޕްގައި ކުޅުނު އެއްވެސް މެޗަކުން ބަލިނުވެ ޔޫތް ސްޕޯޓްސް ކްލަބުން ޗެމްޕިއަންކަން ހޯދައިފި އެވެ.

މުބާރާތުގެ ޗެމްޕިއަންކަން ޔޫތް ސްޕޯޓްސް ކްލަބުން ހޯދީ ހޯމަ ދުވަހުގެ ރޭ ކުޅުނު ފައިނަލް މެޗުގައި ދިވެހި ސިފައިންގެ ކްލަބް ބަލިކޮށްގެންނެވެ.

މާފަންނު ސްޓޭޑިއަމްގައި ކުޅުނު ފައިނަލް މެޗުގައި ސިފައިންގެ މައްޗަށް ޔޫތް ސްޕޯޓްސް ކްލަބް ކުރި ހޯދީ 27-29 ގެ ނަތީޖާއަކުންނެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ ޔޫތް ސްޕޯޓްސް ކްލަބްގެ އަހުމަދު ސައިފް ނައީމެވެ.

މުބާރާތުގެ އެންމެ މޮޅު ހަތް ކުޅުންތެރިންނަކީ ސިފައިންގެ އަހްމަދު ރަޒުނީ، އަހްމަދު ނަސީރު، މުހައްމަދު މަހުދީ، ޔޫތު ސްޕޯޓްސްގެ އަބްދުﷲ ޒިޔާއު، އަހްމަދު އިނާޝް، އަހްމަދު ސައިފް ނައީމް އަދި ޕޮލިހުގެ އަލީ ފަޒްލީއެވެ. ޔޫތު ސްޕޯޓްސް ކުލަބް އާއި ސިފައިންގެ އިތުރުން މިއަހަރުގެ މުބާރާތުގައި ވާދަކުރީ ލަޔަންސް އާއި ޓީރެކްސް ސްޕޯޓްސް އެކަޑަމީ އަދި ފުލުހުންނެވެ.