އިގްތިޞާދީ ވަޒީރު ވިދާޅުވަނީ ރޯދަ މަހު ތަކެތީގެ އަގޮބޮޑުވިޔަ ނުދެއްވާނެ ކަމަށް
15 ފެބުރުއަރީ 2025 | ހޮނިހިރު 18:30ކުރިއަށް އޮތް ރަމަޟާން މަހު ތަކެތީގެ އަގު އުފުލިގެން ނުދާނެ ކަމަށް އިކޮނިމިކް މިނިސްޓަރު މުހައްމަދު ސައީދު ވިދާޅުވި
އިޤްތިޞާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސަޢީދު | ރައީސް އޮފީސް
ކުރިއަށް އޮތް ރަމަޟާން މަހު ތަކެތީގެ އަގު އުފުލިގެން ނުދާނެ ކަމަށް އިކޮނިމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ އާންމު ރައްޔިތުންނަށް ވަޒީރުންނާ ސުވާލުކުރުމަށް ފުރުޞަތު ހުޅުވާލައިގެން "އަހާ"ގެނަމުގައި ބާއްވާ ސިލްސިލާ ފޯރަމް ސީރީޒްގެ ތެރެއިން ހޮނިހިރު ދުވަހުގެ ރޭ ބޭއްވި ފޯރަމްގައި ވާހަކަދައްކަވަމުންނެވެ.
ސައީދު ވަނީ 183 އައިޓަމް ހިމެނޭހެން ބާޒާރުގަ ތަކެތީގެ އަގު އުފުލިޔަ ނުދިނުމަށްޓަކާ ޚާއްސަ ސިޔާސަތުތަކެއް އެކުލަވާލާފައިވާ ކަަމަށެވެ. އޭގެތެރޭގައި ރަމަޟާން މަހަށް ކްރިޓިކަލް ބާވަތްތަކުގެ ގޮތުގައި 54 ބާވަތް ހިމަނާފައިވާނެ ކަމަށް ސައީދު ވިދާޅުވިއެވެ. ރަމަޟާން މަހު ތަކެތީގެ އަގު ބޮޑުކުރުމަކީ އެއީ ވިޔަފާރިވެރިންނަށް ވެސް އޮތް އިޚުތިޔާރެއް ނޫންކަމަށް ސިފަކުރައްވާ ސައީދު ވިދާޅުވީ "އަޅުގަނޑުމެން އިންޓަރވީން ކުރާނަން. އެއީ ޗޮއިސް އެއް ނޫން." މިފަދައިންނެވެ.
އެމަނިކުފާނު ވިދާޅުވި ގޮތުގައި ރަމަޟާން މަހު ތަކެތީގެ އަގު ނުއުފުލޭނެ ފަދަ އިންތިޒާމްތަކެއް ސަރުކާރުން މިހާރު ވަނީ ހަމަޖައްސާފައެވެ. އަދި ބާޒާރުގައި އެއްވެސް ބާވަތެއްގެ އަގު އުފުލޭ ކަމަށް ވާނަމަ އެކަމަށް ވަދެގެން ވެސް އެކަން ހައްލުކުރައްވާނެ ކަމަށް ވަޒީރު ވަނީ ވިދާޅުވެފައެވެ.
ސައީދު ވަނީ 2024 ވަނަ އަހަރަކީ ރަމަޟާން މަހު ތަކެތީގެ އަގުތައް އުފުލިޔަ ނުދީ އެއްވަރެއްގައި ހިފެހެއްޓުނު ހަމައެކަނި އަހަރުކަމަށް ވިދާޅުވެފައެވެ. އެހެންނަމަވެސް ކޮންމެ އަހަރަކުވެސް ފިޔާ، އަލުވި އަދި ބިސް ފަދަ ތަކެތީގެ އަގުަތައް ވަކި މިންގަނޑެއްގައި ހިފެހެއްޓުމަށް ސަރުކާރުތަކުން މަސައްކަތް ކުރަމުން އައިސްފައިވާކަން ފާހަގަކޮށްލެވެއެވެ. އެހެންކަމުން މިދިޔަ ރޯދަ މަހަކީ ތަކެތީގެ އަގު ވަކި ވަރަކަށް ވުރެ ބޮޑަށް އުފުލިޔަ ނުދީ ހިފެހެއްޓުނު ފުރަތަމަ ރަމަޟާން މަސް ކަމަށް މި ސަރުކާރުން ބުނާ ވާހަކައަކީ ހަގީގަތާއި ޚިލާފު ވާހަކައެކެވެ.
