"ޓެކްސީ ޑްރައިވަރުންނާއި އެ ފަރާތްތަކުގެ އާއިލާތަކަށް މި ސަރުކާރުން ދެމުން އެ ގެންދަނީ ބޮޑު އަނިޔާއެއް"

މިއީ ޒަމާނުއްސުރެ ރާއްޖޭގައި ޓެކްސީގެ ޚިދުމަތް ދެމުން އަންނަ ޓެކްސީ ޑްރައިވަރުންނާއި ޓެކްސީ ސެންޓަރުތަކުގެ ބަހެވެ. އެ ފަރާތްތަކުގެ ކަންބޮޑުވުމާއި އުދާސްތަކެވެ.

ކަންމިހެން ހުރި ނަމަވެސް ރައީސް މުއިއްޒުގެ މި ސަރުކާރުން މިކަމަށް ދީފައި ވަނީ ބީރުކަފަންތެކެވެ. ޓެކްސީޑްރައިވަރުންގެ އާދޭހުގެ އަޑު މި ސަރުކާރުން އަހާކަށް ބޭނުމެއް ވެސް ނުވިއެވެ.

އެކަމުގެ އެންމެ ބޮޑު އެއް ހެއްކަކީ ޓެކްސީ ޑްރައިވަރުންގެ ކަންބޮޑުވުމާއި އާދޭސް މި ސަރުކާރަށް އަޑުއިއްވާފައި ވަނިކޮށް، ސަރުކާރުން "އީވީ ޓެކްސީ ލައިން" އެއް ފަށަން ނިންމުމެވެ. މި ސަރުކާރުން މިހާރުވަނީ އެ ޚިދުމަތް މާލެ ސަރައްދުގައި ދޭން ނިންމައި އެ މަސައްކަތް ކުރިއަށް ގެންދިއުމަށް އެމްޓީސީސީ އާ ހަވާލުވެސްކޮށްފައެވެ. ހިދުމަތް ދޭން އެމްޓީސީސީ އާ ސަރުކާރުން ހަވާލުކޮށްފައި ވަނީ މި ފެބްރުއަރީ މަހުގެ 12 ވަނަ ދުވަހުއެވެ.

މިހާ ހިސާބުން އެނގި ސާފުވިކަމަކީ ޒަމާނުއްސުރެ ޓެކްސީގެ ޚިދުމަތް ދެމުން އަންނަ ޓެކްސީ ޑްރައިވަރުންގެ އާދޭސްތަކަށް މި ސަރުކާރުން ކުޑަވެސް އަހައްމިޔަތުކަމެއް، ސަމާލުކަމެއް ނުދިންކަމެވެ.

ޓެކްސީ ޑްރައިވަރުން އާމްދަނީ ހޯދުމަށް ކުރަމުން ގެންދާ އެ މަސައްކަތަށް ހުރަސް އަޅައި، އެ ފަރާތްތަކާއި އެ ފަރާތްތަކުގެ އާއިލާތަކަށް ނިކަމެތިކަން ދިނުމަށް ރައީސް ޑރ. މުހައްމަދު މުއިއްޒުގެ މި ސަރުކާރުން ބޮޑު ކެމްޕޭނެއް ފަށާފައިވާއިރު، އެކަމުގެ ސަބަބުން ޓެކްސީ ޑްރައިވަރުންނާއި އެ ޚިދުމަތްދެމުން އަންނަ ޓެކްސީ ސެންޓަރުތަކަށް އޮތް ޑިމާންޑް ބޮޑުތަނުން ކުޑަވާނެ ކަމަށް ވަނީ ބެލެވިފައެވެ.

މިއީ ސަރުކާރުގެ އެ ނިންމެވުމާއި ގުޅިގެން ޑްރައިވަރސް އެސޯސިއޭޝަނުން ނެރުނު ބަޔާނުގައި ފާޅުކޮށްފައިވާ ކަންބޮޑުވުމެވެ. އަދި މުޅި ހުރިހާ ޓެކްސީ ޑްރައިވަރުންނާއި އެ ފަރާތްތަކުގެ އާއިލާތުކުގެވެސް ކަންބޮޑުވުމެވެ.

ޓެކްސީ ޑްރައިވަރުންގެ ކަނބޮޑުވުން އިންތިހާއަށް އޮތްއިރު، ރައީސް މުއިއްޒުގެ މި ސަރުކާރުން ބުނަމުން ގެންދަނީ މިއީ ރާއްޖޭގައި، ޚާއްޞަކޮށް މާލެ ސަރަހައްދުގައި ޓެކްސީ ކުރާ ފަރާތްތަކަށް މިކަމުން އެއްވެސް އަސަރެއް ނުވަތަ ގެއްލުމެއް ކުރިމަތިވާނޭ ކަމެއް ނޫންކަމަށެވެ. އެގޮތުން ސަރުކާރުގެ "އީވީ ޓެކްސީ ލައިން" އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ ސަރުކާރުގެ "އީވީ ޓެކްސީ ލައިން" ފެށުމަކުން މިހާރު ޓެކްސީގެ ހިދުމަތް ދޭ އަމިއްލަ ވިޔަފާރިތަކަށް އެއްވެސް ދައްޗެއް ނުވާނެ ކަމަށެވެ. އަދި އެކަމުން އެ ފަރާތްތަކަށް ވާނީ ފައިދާ ކަމަށް އެމަނިކުފާނު ވަނީ ވިދާޅުވެފައެވެ.

އަދި ޓެކްސީގެ ހިދުމަތަކީ މިހާރު އާންމުންގެ އަސާސީ ބޭނުމަކަށް ވާތީ، އެ ހިދުމަތުގެ ފެންވަރު މިހާރަށް ވުރެ ރަނގަޅު ކުރަން ޖެހޭ ކަމަށް ވެސް މިނިސްޓަރ އަމީން ވިދާޅުވިއެވެ.

މިނިސްޓަރ އަމީން މިފަދައިން ވިދާޅުވެފައިވާއިރު، އެކަމަށް ރައްދުދީ ޑްރައިވަރސް އެސޯސިއޭޝަނުން ނެރުނު ބަޔާނުގައި ބުނެފައިވަނީ ރައީސް މުއިއްޒުގެ މި ސަރުކާރުން ޓެކްސީ ފްލީޓެއް ތައާރަފުކުރަން ނިންމުމަކީ މާލެ ސަރަހައްދުގައި އެ ހިދުމަތް ދެމުން އަންނަ ޓެކްސީ ޑްރައިވަރުންނަށް ލިބުނު ވަރަށް ބޮޑު ހިތާމައަކާއި ކަންބޮޑުވުމެއް ކަމަށެވެ. އަދި ޒަމާނުއްސުރެ، ޓެކްސީގެ ޚިދުމަތް ދެމުން އަންނަ ޓެކްސީ ތަކާއި ޓެކްސީ ސެންޓަރުތަކުން ދިގު މުއްދަތަކަށް ކުރި ބޮޑެތި އިންވެސްޓްމަންޓު ތައް ހުއްޓުވާލުންކަމަށެވެ. އަދި ޓެކްސީ ޑްރައިވަރުން ބިކަކޮށް އިނދަޖައްސާލުންކަމަށެވެ.

ރައީސް މުއިއްޒުގެ މި ސަރުކާރުން އީވީ ޓެކްސީ ލައިނެއް ފަށަން ނިންމުމާއި އެކު، ޓެކްސީ ޑްރައިވަރން ވަނީ އެކަމަށް އަޑުއުފުލާ މުޒާހަރާއެއް ވެސް ކުރިއަށް ގެންގޮސްފައެވެ.

''ބޯކަނޑާލެވިދާނެ ކަމަށާއި، ބޯގުދު ނުކުރާނެ'' ކަމަށް ބުނެ، ސަރުކާރާ ދެކޮޅަށް ހުޅުމާލެ ރުއްގަނޑު ޕާކު 1 ގައި ކުރިއަށް ގެންދިޔަ މި މުޒާހަރާގައި ފުލުހުން ވަނީ ގިނަ ޓެކްސީ ތަކެއް ޓޯކޮށް، ބައެއް ޓެކްސީ ޑްރައިވަރުން ހައްޔަރުކޮށްފައެވެ. އަދި އޭގެ ތެރެއިން 3 މީހަކަށް ދައުވާކުރަން ވެސް މިހާރު ވަނީ ފޮނުވާފައެވެ. އެ ތިން މީހުންގެ މައްޗަށް އުފުލާފައިވަނީ ފުލުހުންގެ ވާޖިބަށް ހުރަސް އެޅިކަމުގެ ދައުވާއެވެ.

މިއީ އެއްވެސް ކުށެއް ނެތި ޤާނޫނުން ލިބިފައިވާ ހައްޤެއްގެ ބޭނުން ކުރިކުރުމަކަށް ލިބެމުންދާ އެއްވެސް އިންސާފެއް ނެތް އަނިޔާއެއް ކަމަށް އެ ފަރާތްތަކުން ސިފަކުރެއެވެ.

މަންޒަރު ވަރަށް ސާފެވެ. ކުރަން އުޅޭކަންތައް ވެސް އެންމެންނަށް އެނގި ސާފުވެއްޖެއެވެ. ރައީސް މުއިއްޒުގެ މި ސަރުކާރުގެ މި ރޭވުމަކީ ޓެކްސީ ޑްރައިވަރުންގެ މަސައްކަތް ހުއްޓުވާލުމެވެ. އަދި އެފަރާތްތަކާއި އެފަރާތްތަކުގެ އާއިލާތަށް ހާލުގައި ޖައްސައި ބިކަކޮށްލުމެވެ.