"ހިލޭ ޑިގުރީ ތައާރުފް ކުރުން – އަޅުގަނޑު އެންމެ ފަޚުރުވެރިވާ އެއް ކަންތައް"

ދަރިވަރުންނަށް ހިލޭ މަތީ ތަޢުލީމު ޙާޞިލުކުރުމުގެ ފުރުޞަތު ހުޅުވިގެން ދިޔައި ހިލޭ ޑިގުރީ ޕްރޮގްރާމަކީ ރައީސެއްގެ ހައިސިއްޔަތުން އެމަނިކުފާނު އެންމެ ފަޚުރުވެރިވާ ކަންތައްތަކުގެ ތެރެއިން އެއް ކަންތައް ކަމުގައި ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.

"މިއަދަކީ، 6 އަހަރު ކުރިން، އަޅުގަނޑުމެން ހިލޭ ޑިގުރީ ސްކީމް ތަޢާރަފުކުރި ދުވަހެވެ. މި ސްކީމްގެ ސަބަބުން ދަރިވަރުންނަށް ހިލޭ މަތީ ތަޢުލީމު ޙާޞިލުކުރުމުގެ ފުރުޞަތު ހުޅުވިގެން ދިޔައެވެ." ހުކުރު ދުވަހު އެކްސް ގައި ރައީސް ސޯލިހް ކުރެއްވި ޕޯސްޓެއްގައި ވެއެވެ.

ރައީސް ސޯލިހް ވިދާޅުވީ އެމަނިކުފާނު ވެރިކަމުން ވަކިވިއިރު، 18،000 އަށްވުރެ ގިނަ ދިވެހި ޒުވާނުން ޑިގްރީ ކޯސްތަކުގައި ބައިވެރިވެފައިވާ ކަމަށާއި އަދި 8،500 ދިވެހި ޒުވާނުން މި ޕްރޮގްރާމްގެ ދަށުން އެމީހުންގެ ފުރަތަމަ ޑިގްރީ ފުރިހަމަކޮށްފައިވާ ކަމުގައެވެ.

"ތަޢުލީމަކީ އެންމެންނަށް ހަމަހަމަކަން ގެނެސްދޭ އެއްޗެކެވެ. އަދި ޒުވާނުންނަށް ދިރިއުޅުމުގައި ކުރިއަށްދިއުމަށާއި ޤައުމު ބިނާކުރުމަށް ފުރުޞަތުތައް ހުޅުވައިދެއެވެ. މި ޕްރޮގްރާމްގެ ކާމިޔާބީއަކީ މިކަމުގެ ހެއްކެކެވެ."

ރައީސް ސޯލިހް ހިލޭ ޑިގުރީ ސްކީމު ލޯންޗުކޮށްދެއްވީ 14 ފެބްރުވަރީ 2019 ގައި އެމްއެންޔޫގަ ބޭއްވި ޚާއްޞަ ހަފްލާއެއްގައެވެ.

އެމްޑީޕީ ސަރުކާރުގެ ވެރިކަން ނިމުމަކަށްއައިއިރު، މި ސްކީމުން 19191 ދަރިވަރުންނަށް ފުރުޞަތު ވަނީ ފަހިކޮށްދެވުނު. އަދި 9800 އަށްވުރެ ގިނަ ދަރިވަރުން ކިޔެވުން ފުރިހަމަކޮށް ފުރަތަމަ ޑިގުރީ ޙާޞިލު ކޮށްފައިވެއެވެ.

އެމްޑިޕީ ސަރުކާރު ނިމުނުއިރު މި ސްކީމްގެ އެޕްލިކޭޝަނާއި ޕޭމަންޓްގެ ހުރިހާ މަސައަކަތްތަކެއް ހުރީ ޑިޖިޓަލައިޒްކުރެވިފައި ކަމަށް ވެސް މައުލޫމާތު ލިބިފައިވެއެވެ.

މި ސްކީމް ފެށިގެން އައިއިރު އެންމެ ފުރަތަމަ ފައިސާ ދެވުނީ ދަރިވަރުން ތަޢުލީމު ޙާސިލު ކުރަމުންދިޔަ މަރުކަޒަށް ކަމުގައިވިޔަސް، ފަހުން ފައިސާ ދެވެމުން ދިޔައީ ތަޢުލީމު ޙާޞިލުކުރަމުން ދިޔަ ދަރިވަރުންނަށެވެ.

ރައީސް އިބްރާހިމް މުހައްމަދު ސާލިހް ހިލޭ ޑިގްރީ ޕްރޮގްރާމް އިފްތިތާހު ކުރެއްވުމާއިއެކު، އެ މަސައްކަތް ކާމިޔާބު ކަމާއިއެކު ކުރިއަށް ގެންގޮސް ދެއްވި އޭރުގެ ހަޔަރ އެޑިއުކޭޝަން މިނިސްޓަރ ޑރ އިބްރާހިމް ހަސަން އެކްސް ގައި ރައީސް ސާލިހު މިއަދު ކުރެއްވި ޕޯސްޓް ރި-ޕޯސްޓް ކުރައްވާ މިނިސްޓަރު ޑރ އިބްރާހިމް ހަސަން ވަނީ ހިލޭ ޑިގްރީ ޕްރަގްރާމަށް ހަ އަހަރު ފުރުމާ ގުޅިގެން ރައީސް ސާލިހަށް މަރުހަބާ ވިދާޅުވެ، އެމަނިކުފާނަށް އިތުބާރު ކުރައްވާ އެ މަސައްކަތް ހަވާލު ކުރެއްވީތީ ޝުކުރު އަދާކުރައްވާފަ އެވެ.

މި ސްކީމުގެ ސަބަބުން ދިވެހި ކިޔަވާކުދިންނަށް ރާއްޖޭގައި ތިބެގެން ޚަރަދު ކުޑަކޮށް ޑިގުރީ ފެންވަރަށް އުގެނުމުގެ ފުރުޞަތު ފަހިވެގެންދިއުމުގެ އިތުރުން ތަޢުލީމީ ޖީލެއް ބިނާކުރުމުގެ މުހިންމު ބިންގާ އެޅިގެންދިޔަ ކަމަށް ކުރީގެ ސަރުކާރުން ބުނެފައިވެއެވެ.

ހިލޭ ޑިގުރީ ޕްރޮގްރާމްގައި ސަރުކާރުގެ ދެ ޔުނިވަރސިޓީ އާއި ހުރިހާ ޕްރައިވެޓް ކޮލަޖަކުން ބައިވެރިވެ، ދިވެހި ޒުވާނުންނަށް ޑިގުރީ ފެންވަރަށް ކިޔެވުމުގެ ފުރުޞަތު ފަހިކޮށްދީފައިވެއެވެ.

ކޮވިޑްގެ ލޮކްޑައުންގައި ވެސް މި ސްކީމުގެ ސަބަބުން އެތައް ޒުވާނުންތަކަކަށް، ބުރުލެއް އެރުމެއްނެތި، ތަޢުލީމު ހޯދުމުގެ ފުރުސަތު ލިބިގެން ދިޔަކަން ފާހަގަ ކުރެވެއެވެ.