ސާފިން އެރީނާގެ މަސައްކަތް ހުއްޓިފައި

ސަރުކާރުން ޤާއިމު ކުރަން ފެށި ސާފިން އެރީނާގެ މައްސަކަތް ހުއްޓިފައިވާ ކަމުގެ ކަންބޮޑުވުން ބައެއް ފަރާތްތަކުން ފާޅު ކުރަން ފަށައިފި އެވެ.

މާލޭގެ ވަރުނުލާ ރާޅުގަނޑު ސަރަަހައްދުގައި ސާފިން އަދި ބޮޑީބޯޑިން އަށް ޚާއްސަ އެރީނާއެއް ޤާއިމު ކުރުމަކީ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ވަރަށް ބޮޑު ވައުދުފުޅެކެވެ. އެ ސަރަަޙައްދުގައި ޤާއިމު ކުރާ އެރީނާ ވެގެން ދާނީ ބައިނަލްއަޤުވާމީ މުބާރާތްތައް ބޭއްވޭ ފެންވަރުގެ ބޮޑު އެރީނާއެއް ކަމަށް ވެސް ސަރުކާރުން ވަނީ ބުނެފަ އެވެ.

މިދިޔަ އަހަރުގެ އޭޕްރީލް މަހުގެ ތެރޭގައި ސަރުކާރުން ވަނީ އެ އެރީނާގެ މަސައްކަތް ޗައިނާގެ ރޯޓައިމް އިންޖީނިއަރިން އެންޑް ޓެކްނޮލޮޖީ ކޯޕަރޭޝަނާ ހަވާލުކޮށްފަ އެވެ. އޭގެ ފަހުން މިދިޔަ އަހަރުގެ ނޮވެމްބަރު މަހުގެ ތެރޭގައި ވަނީ އެ މަސައްކަތް ކުރުމަށް ރާޅުގަނޑު ސަރަހައްދު ހުސްކޮށްފަ އެވެ.

އެގޮތުން އެ ސަރަހައްދުގައި ހުރި ބްރިޖު ވިއު ޕްލެޓްފޯމު ރުޅާ ލުމުގެ މަސަައްކަތް ވަނީ ފަށައިފަ އެވެ. ނަމަވެސް ވަކި ހިސާބަކުން އެ މަސައްކަތް މަޑު ޖެހިފައިވާ ކަމުގެ ކަންބޮޑުވުން ބައެއް ފަރާތްތަކުން ވަނީ ފާޅު ކޮށްފަ އެވެ. އެގޮތުން މަސައްކަތް ހުއްޓިފައިވާއިރު، މިހާރު އެ ސަރަހައްދު ވަނީ ޓިނު ޖަހައިގެން ބަންދުކޮށްފަ އެވެ.

މައުލޫމާތު ލިބިފައިވާ ގޮތުގައި ޗައިނާގެ ކުންފުންޏަށް އެ މަސައްކަތް ހަވާލު ކޮށްފައި ވަނީ މިއަހަރުގެ މެއި މަހަށް ނިންމުމަށެވެ. ނަމަވެސް މަސައްކަތް މިހާރު ހުއްޓިފައިވާއިރު، އެ މުއްދަތަށް އެ އެރީނާގެ މަސައްކަތް ނުނިމޭނެ ކަމަށް ބައެއް ފަރާތްތަކުން ވަނީ ފާހަގަކޮށްފަ އެވެ.

މި ނޫހާ ވާހަކަ ދައްކަމުން ބައެއް ފަރާތްތަކުން ބުނެފައި ވަނީ އެ ސަރަހައްދުގެ މަސައްކަތް ކުރިއަށްދާ ގޮތް ބައްލަވާލައްވަން ރައީސް މުޢިއްޒު އެ ސަރަހައްދަށް ވަޑައިގަންނަވަން ވެސް ނިންމެވި އެވެ. ނަމަވެސް ފަހުން އެ ސަރަހައްދަށް ވަޑައި ނުގަންނަވަން ރައީސް ނިންމެވި ކަމަށް އެ ފަރާތްތަކުން ބުނެ އެވެ.