ޑެމްބެލޭގެ ދެ ލަނޑާ އެކު ޕީއެސްޖީން ފުރަތަމަ ލެގު ކާމިޔާބު ކޮށްފި

ޔުއެފާ ޗެމްޕިއަންސް ލީގުގެ ޕްލޭ އޮފްގެ ފުރަތަމަ ލެގުގައި ބްރެސްޓާ ދެކޮޅަށް ކުޅުނު މެޗުން މޮޅުވެ، ޕެރިސް ސެއިންޓް ޖާމަން (ޕީއެސްޖީ) އިން ގަދަ 16 ވަނަ ބުރުގެ އުންމީދު ބޮޑު ކޮށްފި އެވެ.

މި ސީޒަންގެ ޗެމްޕިއަންސް ލީގު ކުޅެނީ އައު ފޯމެޓުގެ ދަށުންނެވެ. އައު ފޯމެޓުގައި ވާ ގޮތުން، ލީގު ބުރުގެ ގަދަ އަށް ޓީމަށް ގަދަ 16 ވަނަ ބުރުން ސީދާ ޖާގަ ލިބޭނެ އެވެ. ގަދަ 16 ވަނަ ބުރުގެ ބާކީ އަށް ޖާގަ ލިބޭނީ، ލީގު ބުރުގެ ނުވަ ވަނަ އާއި 24 ވަނައާ ދެމެދު އޮތް ޓީމުތަކުގެ މެދުގައި ކުޅޭ ޕްލޭ އޮފް މެޗުން މޮޅުވާ ޓީމަކަށެވެ. ޕްލޭ އޮފްގައި ދެ ލެގު ކުޅޭނެ އެވެ.

ޕްލޭ އޮފްގެ ފުރަތަމަ ލެގުގައި ޕީއެސްޖީން ބްރެސްޓާ ދެކޮޅަށް ނިކުތީ ބްރެސްޓުގެ ދަނޑުގަ އެވެ. އަންގާރަ ދުވަހުގެ ރޭ ބްރެސްޓާ ދެކޮޅަށް ކުޅުނު މެޗު ޕީއެސްޖީން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ޕީއެސްޖީން ދެ ލަނޑު ޖެހިއިރު، ދެ ވަނަ ހާފުގައި ވަނީ ތިން ވަނަ ލަނޑު ޖަހައިފަ އެވެ.

މެޗުގެ 21 ވަނަ މިނެޓުގައި ޕީއެސްޖީ އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ލީޑު ނަގައިދިނީ ވިޓީނިއާ އެވެ. އޭގެ ފަހުން މެޗުގެ ފުރަތަމަ ހާފުގެ ފުރިހަމަ ވަގުތުގައި ފްރާންސްގެ އޮސްމާން ޑެމްބެލޭ ވަނީ ޕީއެސްޖީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު އޭނާ ޖެހީ އަޝްރަފް ޙަކީމީ ތަނަވަސްކޮށްދިން ފުރުސަތެއްގަ އެވެ. އަދި މެޗުގެ ދެ ވަނަ ހާފުގައި ޕީއެސްޖީގެ ތިން ވަނަ ލަނޑު ޖެހީ ވެސް ޑެމްބެލޭ އެވެ. އޭގެ ކުރިން ޕީއެސްޖީގެ ޑިސެއާ ޑޯ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

ފުރަތަމަ ލެގުގައި ބްރެސްޓް ބަލިކޮށް ޕީއެސްޖީން ގަދަ 16 ވަނަ ބުރުގެ އުންމީދު ބޮޑު ކޮށްފައިވާއިރު، މި ދެ ޓީމު ބައްދަލު ކުރާ ދެ ވަނަ ލެގުގެ މެޗު އޮންނާނީ ފެބްރުވަރީ މަހުގެ 20 ވަނަ ދުވަހު، ޕީއެސްޖީގެ އަމިއްލަ ދަނޑުގަ އެވެ.