ރައްޔިތުންގެ މަޖިލީހުގެ ނައިބު ރައީސް އަދި ހުޅުހެއްވޭރު ދާއިރާގެ މެމްބަރު މޫސާ މަނިކް ރައްޔިތުންގެ މަޖިލީހުގެ ގައުމީ ސަލާމަތުގެ ކޮމެޓީގައި އިންނަވަނީ ޕީޕީއެމްގެ ސްލޮޓެއްގައި ކަމަށް ޕީޕީއެމް ޕާލަމެންޓްރީ ގުރޫޕްގެ ލީޑަރު އަދި ވިލިމާލެ ދާއިރާގެ މެމްބަރު އަހުމަދު ނިހާން ހުސެން މަނިކް ވިދާޅުވެއްޖެއެވެ.
ގައުމީ ސަލާމަތުގެ ކޮމެޓީގައި މޫސަ އިންނަވަނީ އެމްޑީޕީގެ ސްލޮޓެއްގައި ކަމަށް އިދިކޮޅު މެމްބަރުން ވިދާޅުވަމުން ގެންދަވާތީ އެކަމާ ގުޅޭ ގޮތުން ރާއްޖެއެމްވީން ސުވާލު ކުރުމުން ނިހާން ވިދާޅުވީ މޫސަ ޕީޕީއެމް އަށް ސޮއި ކުރިތާ ދެ ވަނަ އަށްވީ ދުވަހު މޫސައަކީ ޕީޕީއެމްގެ މެމްބަރެއްކަން އަންގާ ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދަށް ސިޓީއަކުން އަންގާފައިވާ ކަމަށެވެ.
ނިހާން ވިދާޅުވީ މޫސަގެ އިތުރުން އެހެން މެމްބަރުން ވެސް އެއް ކޮމެޓީން އަނެއް ކޮމެޓީ އަށް ބަދަލުކޮށް ކޮމެޓީތަކުގައި ޕީޕީއެމް ތަމްސީލް ކުރާ މެމްބަރުން ހަމައްޖައްސައިދިނުމަށް މަޖިލީހުގެ ރައީސް އަށް ސިޓީ ފޮނުވާފައިވާނެ ކަމަށެވެ.
ގައުމީ ސަލާމަތު ކޮޓީގައި މޫސަ އިންނަވާތީ އިދިކޮޅު މެންބަރުން ގެންދަވަނީ އެކަމާ ދެކޮޅަށް އަޑު އުފުއްލަވަމުންނެވެ. އަދި މޫސަ އިންނަވަނީ އެމްޑީޕީގެ ސްލޮޓެއްގައި ކަމަށް އެ ފަރާތްތަކުން މީގެ ކުރިން ބުނެފައި ވެއެވެ.