"ޓެކްސީ ޑްރައިވަރުންނާއި މެދު އަމަލުކުރި ގޮތުން ފެނުނީ ނިޒާމީ ސިފައެއްގައި ހައްގުތައް ގައިދުކުރާ މަންޒަރު"
ސުލްހަވެރި އިހުތިޖާޖުކުރުމަކީ ކުށުގެ އަމަލެއް ކަމަށް ސަރުކާރުން ބަލަމުންދާ ކަަމަށް މީކާއިލް ވިދާޅުވި
މެމްބަރު މީކާއިލް ނަސީމް މަޖިލީހުގައި ވާހަކަދައްކަވަނީ
ޓެކްސީ ޑްރައިވަރުންގެ މުޒާހަރާ ހުއްޓުވާ، ޓެކްސީ ޑްރައިވަރުންނާއި މެދު އަމަލުކުރި ގޮތުން ފެނުނީ ނިޒާމީ ސިފައެއްގައި ހައްގުތައް ގައިދުކުރާ މަންޒަރުކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މީކާއިލް ނަސީމް ވިދާޅުވެއްޖެއެވެ.
މީކާއިލް އެފަދައިން ވިދާޅުވި 11 ޑިސެމްބަރ 2024 އިން ފެށިގެން ޓެކްސީ ޑްރައިވަރުން ކުރަމުން ދިޔަ މުޒާހަރާ ހުއްޓުވާ، ވެހިކަލްތައް ޓޯކުރުމާއި، ޑްރައިވަރުން ހައްޔަރުކުރި ގޮތާއި ގުޅިގެން އޭނާ ހުށަހަޅުއްވާފައިވާ ކުއްލި މައްސަލަ އަށް ބަހުސްކުރައްވަމުންނެވެ. 12 ޑިސެމްބަރު 2024ގައި އޭނާ ހުށަހަޅުއްވާފައިވާ އެ ކުއްލި މައްސަލަ މަޖިލީހުގައި ކުރިއަށް ގެންދިޔައީ ހޯމަ ދުވަހުއެވެ.
މީކާއިލް ވިދާޅުވީ މުޒާހަރާ ކުރި ޓެކްސީ ޑްރައިވަރުންނަށް ސަރުކާރުން ބީރު ކަންފަތެއް ދިން މަންޒަރު ކަމަށެވެ. ވެރިކަމަށް އައީއްސުރެ ސަރުކާރުގެ ކިބައިން ފެންނަނީ އަސާސީ ހައްގުތައް ނަގާލާ މަންޒަރުކަމަށް ވެސް އޭނާ ވިދާޅުވިއެވެ. އެގޮތުން ސުލްހަވެރި އިހުތިޖާޖުކުރުމަކީ ކުށުގެ އަމަލެއް ކަމަށް ސަރުކާރުން ބަލަމުންދާ ކަަމަށް ފާހަގަކުރައްވާ މީކާއިލް ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ.
މިދިޔަ އަހަރުގެ ޑިސެމްބަރ މަހުގެ 11 ވަނަ ދުވަހު ނިރޮޅުމަގު ބަންދުކޮށް ޓެކްސީ ޑްރައިވަރުން މުޒާހަރާ ކޮށްފައި ވަނީ ސަރުކާރުން ޓެކްސީ ލައިނެއް ތައާރަފުކުރަން ނިންމާފައިވާތީ އެކަމާއި ދެކޮޅަށް އިހުތިޖާޖުކުރުމަށެވެ. އެ މުޒާހަރާގައި ބައިވެރިކުރި 20 އަށްވުރެ ގިނަ ޓެކްސީ ފުލުހުންގެ ބެލުމުގެ ދަށަށް ގެންގިސްފައިވެއެވެ. އަދި ބައެއް ޓެކްސީ ޑްރައިވަރުން ހައްޔަރުކޮށްފައިވާ އިރު އޭގެ ތެރެއިން ބައެއް މީހުންގެ މައްޗަށް ޓެރަރިޒަމްގެ ތުހުމަތުކުރުމަށް މަސައްކަތްކުރަމުންދާތީ ޓެކްސީ ޑްރައިވަރުންގެ ޖަމިއްޔާއިން ވެސް ވަނީ މީގެ ކުރިން ކަންބޮޑުވުން ފާޅުކުރައްފައެވެ.
