ދެގަނޑުވަރު ދޭތެރޭގައި ފިތިބާރުވެގެން އުޅެނީ ފައިސާކޮޅެއް - ޔާމީން
10 ފެބުރުއަރީ 2025 | ހޯމަ 14:25މުއިއްޒުއާއި އަބްދުއްރަހީމްއާއި ޖެހުނީ ބައިއެޅުމުގެ މައްސަލައެއް
ރައީސް ޑރ. މުހައްމަދު މުއިއްޒު އާއި މަޖިލީހުގެ ރައީސް އަބްދުއްރަހީމް
ރައީސް ޑރ. މުހައްމަދު މުއިއްޒުއާއި، މަޖިލީހުގެ ރައީސް އަބްދުއްރަހީމާއި ދެބޭފުޅުންގެ ދެމެދުގައި ޖެހިގެން އުޅެނީ ފައިސާގެ މައްސަލައެއްކަމަށް ކުރީގެ ރައީސް އަބްދުﷲ ޔާމިން ވިދާޅުވެއްޖެއެވެ.
ޕީއެންއެފްއިން ބޭއްވި ޖަލްސާގައި ވާހަކަ ދައްކަވަމުން ޔާމިން ވިދާޅުވީ ދިވެހިރާއްޖޭގައި ދައްކާ ވާހަކަ ދިމާނުވުމާއި، ކޮރަޕްޝަނާއި މަކަރު ހެދުމާއި، ޖެހުނު ތަނަކުން ޖެހުނު ވަރަކަށް ޖެހުނު މީހަކު ލާރި ނެގުމާ އެނޫން ކަމެއް ނެތް ކަމަށެވެ. އަދި މަޖިލީހުގެ ރައީސް ޢަބްދުއްރަޙީމް އަބްދުﷲ އާއި ކުރީގެ ޓުއަރިޒަމް މިނިސްޓަރ އިބްރާހިމް ފައިސަލްމެންނާއި ރައީސް ޑރ. މުހައްމަދު މުޢިއްޒުމެންނާ ޖެހިގެން، ދެ ގަނޑުވަރު ދޭތެރޭގައި ފިތި ބާރުވެގެން އުޅެނީވެސް ފައިސާކޮޅެއް ކަމަށް ޔަމީން ވިދާޅުވިއެވެ. ޔާމީން ވިދާޅުވީ އެއްގޮތަކަށްވެސް މި އުޅެނީ ތަނެއްގެ އެގްރީމަންޓު ނަގައިގެން އުޅޭ ކަމެއް ނޫން ކަމަށާއި، މިކަމަކީ ބައިއެޅުމުގެ ތެރޭގައި އުޅޭ ކަމެއް ކަމަށެވެ.
ރައީސް ޑރ. މުހައްމަދު މުއިއްޒުއާއި، މަޖިލީހުގެ ރައީސް އަބްދުއްރަހީމްގެ ގުޅުން ގޯސްވެފައިވާކަމަށް އަޑުތައް ފެތުރިފައިވަނިކޮށް، އަބްދުއްރަހީމްގެ ދަރިކަލުން އަދި ޓުއަރިޒަމް މިނިސްޓަރުކަމުގައި ހުންނެވި އިބްރާހިމް ފައިސަލް ކުއްލިގޮތަކަށް އެމަގާމުން ވަނީ ވަކިކޮށްފައެވެ.
އޭނާ މަގާމުން ވަކިކޮށްފައިވަނީ މިދިޔަ މަހުގެ 28 ވަނަ ދުވަހުއެވެ. އަދި ވަކިކުރި ސަބަބެއްވެސް ހާމަކޮށްފައި ނުވެއެވެ. މިއާއެކު ޕީއެންސީގެ ހަރަކާތްތަކުންނާއި، ސިޔާސީ މަސައްކަތުން އަބްދުއްރަހީމްވެސް ވަނީ ގެއްލިފައެވެ.
