ދެ ޤައުމުގެ ދޭތެރޭގައިވާ ގުޅުން ބަދަހި ކުރުމަށް ފުރިހަމަ އެއްބާރުލުން ދޭނަން: އިންޑޮނީޝިޔާގެ ސަފީރު
ރާއްޖެއާއި އިންޑޮނީޝިއާއި ދެމެދު އޮތް ގުޅުމަށް 40 އަހަރުވެއްޖެ
އިންޑޮނީޝިޔާ ސަފީރަށް ފަތްކޮޅު އެރުވުން
ދެ ޤައުމުގެ ދޭތެރޭގައިވާ ގުޅުން ވިޔަފާރިއާއި އިޤްތިޞާދުގެ ދާއިރާއިން އިތުރަށް ބަދަހި ކުރުމަށް ފުރިހަމަ އެއްބާރުލުން ދެއްވާނެ ކަމުގައި އިންޑޮނީޝިޔާ ސަރުކާރުން ރާއްޖެއަށް ކަނޑައެޅުއްވި އާ ނޮން-ރެޒިޑެންޓް ސަފީރު، ހިޒް އެކްސެލެންސީ އައި ގުސްތީ ނިގްރަހް އަރްދިޔާސާ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އެމަނިކުފާނުގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް އަރުއްވުމަށް މިއަދު ބޭއްވި ރަސްމިއްޔާތަށްފަހު ވާހަކަފުޅުދައްކަވަމުންނެވެ.
އެގޮތުން ދެ ޤައުމުގެ ދޭތެރޭގައި ގުޅުން ގާއިމުކުރި ފަހުން މިވީ 40 އަހަރުގެ ތެރޭގައި ބައިނަލްއަޤްވާމީ އެކި ފަންތީގެ މައިދާންތަކުގައި، ދެ ޤައުމުން ގުޅިގެން މަސައްކަތްކޮށްފައިވާކަން ފާހަގަ ކުރެއްވިއެވެ.
މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ރަސްމިއްޔާތުގައި، ފަތްކޮޅު އެރުއްވުމަށްފަހު، އިންޑޮނީޝިޔާގެ އާ ސަފީރާ ރައީސުލްޖުމްހޫރިއްޔާ ބައްދަލުކުރައްވައި، ސަފީރަށް ތަހުނިޔާ ވިދާޅުވެ، އިންޑޮނީޝިޔާގެ ރައީސް ޖޯކޯ ވިޑޯޑޯއަށް ހެޔޮ އެދުންތައް އަރިސްކުރެއްވިއެވެ.
މި ބައްދަލުކުރެއްވުމުގައި އިންޑޮނީޝިޔާގެ ސަފީރު ދެއްކެވި ވާހަކަފުޅުގައި، އެ ޤައުމުގެ ރައީސް ޖޯކޯ ވިޑޯޑޯގެ ހެޔޮ އެދުންތައް ރައީސުލްޖުމްހޫރިއްޔާއަށް އަރިސްކުރެއްވިއެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން، އިޤްތިޞާދީ ދާއިރާއިންނާއި ތަރައްޤީގެ ދާއިރާއިން ރާއްޖެއާއި އިންޑޮނީޝިޔާއާ ދެ ޤައުމުގެ ދޭތެރޭގައިވާ ގުޅުމުގެ މައްޗަށް އަލިއަޅުއްވައިލައްވައި، މި ގުޅުން ވިޔަފާރީގެ ދާއިރާއިން ހަރުދަނާ ކުރުމާ ބެހޭގޮތުން ރައީސް ޔާމިން ވާހަކަފުޅު ދެއްކެވިއެވެ.
އަދި މިހާރެކޭ އެއްގޮތަށް ކުރިއަށް އޮތްތާނގައިވެސް ރާއްޖެއަށް ދެއްވަމުން ގެންދަވާ އެހީތެރިކަމާއި އެއްބާރުލެއްވުން އިންޑޮނީޝިޔާގެ ފަރާތުން ލިބެމުންދާނެކަމަށް އުއްމީދު ކުރައްވާ ކަމުގައި ރައީސް ޔާމިން ވިދާޅުވިއެވެ.
