އައިސިސްގެ 200 ހަނގުރާމަވެރިން މަރާލައިފި

ދާދިފަހުން ރަޝިއާ އަސްކަރިއްޔާ އިން ސީރިއާގައި ދިން ހަމަލާއެއްގައި އިސްލާމިކް ސްޓޭޓޭ (އައިއެސް) ގެ 200 ހަނގުރާމަވެރިން މަރާލެވިފައިވާ ކަމަށް ރަޝިއާގެ ޑިފެންސް މިނިސްޓްރީން ހޯމަ ދުވަހު ބުނެފިއެވެ.

ރަޝިއާ އަސްކަރިއްޔާ އިން މިހަމަލާ ދިނީ އައިއެސްގެ ބާރު ވަރަށް ބޮޑު ސަރަހައްދެއް ކަމަށްވާ ޑެއިރް އަޒް ޒޯ ސަރަހައްދުން އައިއެސްގެ ހަނގުރާމަވެރިން ފައްސާލުމަށް ރަޝިއާ އިން ސީރިޔާގެ ރައީސް ބައްޝާރުއަލް އަސަދުގެ ސިފައިންނަށް ވާގިވެރިވަމުންދާ ކެމްޕެއިންގެ ތެރެއިންނެވެ.

ރަޝިއާގެ ޑިފެންްސް މިނިސްްޓްރީއާ ހަވާލާދީ މީޑިއާ ރިޕޯޓުތައް ބުނާ ގޮތުން ރަޝިއާގެ އަސްކަރިއްޔާގެ މަތިންދާ ބޯޓުތައް ވަނީ ސީރިޔާގެ ޑެއިރް އަޒް ޒޯ ސަރަހައްދަށް ދާން އުޅުނު އައިސިސްގެ 20 އުޅަނދެއް ވެސް ހަލާކުކޮށްފައެވެ.

ސީރިޔާގައި ހަރަކާތްތެރިވާ އިނގިރޭސި ވިލާތުގެ ސީރިޔަން އޮބަޒަވޭޓަރީ ފޯ ހިއުމަން ރައިޓްސް އިން ބުނެފައި ވަނީ ޑެއިރް އަޒް ޒޯގެ ހުޅަނގު ސަރަހައްދުން، ރަޝިއާ އަސްކަރިއްޔާ އިން ހުކުރު ދުވަހު ދިން ހަަމަލާއެއްގައި މަދުވެގެން 70 ހަނގުރާމަވެރިން މަރުވެފައިވާ ކަމަށް ކަށަވަރު ކުރެވިފައިވާ ކަމަށެވެ.

ރަޝިއާ އިން ދަނީ 2015 އިން ފެށިގެން ސީރިޔާގެ ރައީސް ބައްޝާރުލް-އަސަދުގެ ސިފައިންނަށް، އައިސިސް އަދި އެހެނިހެން ހަނގުރާމަވެރިން ބަލިކޮށްލުމަށް ވައިގެ ކެމްޕެއިނެއް މެދުވެރިކޮށް އެހީތެރިކަން ފޯރުކޮށްދެމުންނެވެ.