އިނގިރޭސި ޕްރިމިއަރ ލީގުގައި އެންމެ ފަހުގެ ޗެމްޕިއަން މެންޗެސްޓަރ ސިޓީއާ ދެކޮޅަށް ކުޅުނު މެޗުގައި އާސެނަލްގެ ކުޅުންތެރިން ދެއްކީ އާދަޔާ ޚިލާފު ކުޅުމެއް ކަމަށް، އެ ޓީމުގެ ކޯޗު މިކޭލް އާޓެޓާ ބުނެފި އެވެ.

އާސެނަލްގެ އަމިއްލަ ދަނޑުގައި ސިޓީއާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 5-1 އިންނެވެ. މެޗުގައި އާސެނަލް އިން ލަނޑު ޖަހާފައި ވަނިކޮށް، ސިޓީން ނަތީޖާ ހަމަހަމަ ވެސް ކުރި އެވެ. ނަމަވެސް އާސެނަލް އިން ވަނީ ފަހަތުން އަރައި ހަތަރު ލަނޑު ޖަހައިގެން މެޗުން މޮޅުވެފަ އެވެ.

އެ މެޗަށްފަހު ވާހަކަ ދައްކަމުން އާޓެޓާ ބުނީ އާސެނަލްގެ ފޯމު ދެމެހެއްޓުމަށް މޮޅުވުން މުހިންމުވެފައި އޮތް މެޗުން މޮޅުވީ، ކުޅުންތެރިން ދެއްކި އާދަޔާ ޚިލާފު ކުޅުމުގެ ސަބަބުން ކަމަށެވެ. އެ މެޗަކީ އާސެނަލަށް ވަރަށް މުހިންމު މެޗަކަށްވި ކަމަށާއި، އެ މެޗުން މޮޅުވުން ވަރަށް ބޮޑަށް ހިތްހަމަ ޖެހިފައި ހުރި ކަމަށް ވެސް އާޓެޓާ ބުންޏެވެ. އަދި އެ މެޗުގައި އާސެނަލްގެ ނަސީބު ވެސް ވަރަށް ރަނގަޅު ކަމަށް އޭނާ ވަނީ ބުނެފަ އެވެ.

މީގެ އިތުރުން އާެޓެޓާ ބުނީ ނަސީބު ރަނގަޅު ވުމުގެ އިތުރުން، އެ މެޗުގައި އާސެނަލް އިން ޖެހީ ވަރަށް ހިތްގައިމު ލަނޑުތަކެއް ކަމަށެވެ. ޚާއްސަކޮށް ލީޑުގައި އޮތުމަށްފަހު، މެޗުގެ ނަތީޖާ ހަމަހަމަވި ކަމަށާއި، އޭގެ ފަހުން ކުޅުންތެރިން ދައްކައިދިނީ ތަފާތު ރޫޙެއް އަދި މަސައްކަތެއް ކަމަށް ވެސް އާޓެޓާ ބުންޏެވެ. އަދި އާސެނަލްގެ ކޮންމެ ކުޅުންތެރިޔެއްގެ ފަރާތުން ވެސް ފެނުނީ މެޗަށް ސަމާލުކަން ދީގެން ތިބި މަންޒަރު ކަމަށް އާޓެޓާ ވަނީ ފާހަގަ ކޮށްފަ އެވެ.

އިތުރަށް ވާހަކަ ދައްކަމުން އާޓެޓާ ބުނީ ބައެއް މެޗުތަކަކީ އުނދަގޫ ޙާލަތުން ނަަމަވެސް މޮޅުވުން މަޖުބޫރު މެޗުތަކެއް ކަމަށާއި، އާސެނަލް އިން މި ފަހަރު ދައްކައިދިނީ އެކަން ކުރެވޭނެ ފެންވަރު ކަމަށް އޭނާ ދެކެ އެވެ. މުޅި މެޗަށް ބަލާއިރު، އާސެނަލަށް މެޗުން މޮޅުވުމަށް އެތައް ފުރުސަތުތަކެއް ލިބިގެން ދިޔަ ކަމަށާއި، ދެން ފެނުނީ ކުޅުންތެރިން އެ ފުރުސަތުގެ ބޭނުން ހިފަމުން ދިޔަ މަންޒަރު ކަމަށް އާޓެޓާ ވަނީ ފާހަގަ ކޮށްފަ އެވެ.

ސިޓީ އަތުން ހޯދި މޮޅާއެކު އާސެނަލް އިން ވަނީ އެއް ވަނައިގައި އޮތް ލިވަޕޫލާ ދެމެދު އޮތް ފަރަގު ކުޑަކޮށްފަ އެވެ. ދެ ވަނައިގައި އާސެނަލް އޮތީ މިހާތަނަށް އެ ޓީމު ކުޅެފައިވާ 24 މެޗުން 50 ޕޮއިންޓާ އެކު އެވެ. އެއް ވަނައިގައި ލިވަޕޫލަށް 56 ޕޮއިންޓު ލިބެނީ އާސެނަލަށް ވުރެ އެއް މެޗު މަދުން ކުޅެގެންނެވެ.