އިންދިރާގާނދީ މެމޯރިއަލް ހޮސްޕިޓަލް (އައިޖީއެމްއެޗް)ގެ އާއްމު ސަރޖަރީތައް ހުއްޓާލިކަމަށް ދެކެވޭ ވާހަކަ އައިޖީއެމްއެޗް އިން ދޮގުކޮށްފި އެވެ.
މީސްމިޑިއާގައި މިފަދަ ވާހަކަތަކެއް ދެކެވެން ފަށާފައި ވަނީ އައިޖީއެމްއެޗްގެ ޚިދުމަތްތަކާއި ގުޅުން ހުރި މެސެޖެއް ކަމަށް ބުނާ މެސެޖެއް މީސްމީޑިއާއަށް ލީކުވި ހިސާބުންނެވެ.
ދައުރުވަމުންދާ ސްކްރީންޝޮޓްތަކުގައި ބުނެފައި ވަނީ އަސާސީ އަދި ކްރިޓިކަލް އާލަތްތައް ނެތުމުގެ ސަބަބުން ބައެއް ސަރޖަރީތައް ކުރެވެން ނެތް ކަަމަށް ބުނެފައެވެ. އެެހެންކަމުން ސަރޖަރީ ޝެޑިއުލް ނުކުރުމަށް އެމެސެޖުގައި ވަނީ އަންގާފައެވެ. އެހެންނަމަވެސް އެމަރޖެންސީ ސަރޖަރީތައް ކުރިއަށްދާނެ ކަމަށް އެ މެސެޖުގައި ވަނީ ބުނެފައެވެ.
ހަމައެއާއި އެކު ބައެއް އާއްމުން ވަނީ ސަރޖަރީތައް ކުރާނެ ކަމަށް ބުނެފައިވާ މީހުންގެ ސަރޖަރީތައް ވަކި ސަބަބެއް ނާންގާ ލަސްކުރަމުންދާ ކަމަށް ބުނެ މީސްމީޑިއާގައި އެ މައުލޫމާތު ހިއްސާކޮށްފައެވެ. މި ވާހަކަތަކާއި އެކު ސަރުކާރާއި ރައީސް ޑރ.މުހައްމަދު މުއިއްޒު އަށް އާއްމުން ދަނީ ވަރަށް ބޮޑަށް ފާޑުކިޔަމުންނެވެ.
އައިޖީއެމްއެޗްގެ މީޑިއާ އޮފިޝަލް އާއި ސުވާލުކުރުމުން އޭނާ ވިދާޅުވީ އެކަމާއި ގުޅޭގޮތުން އައިޖީއެމްއެޗުން ދޭން ބޭނުންވާ މެސެޖު އެ ހޮސްޕިޓަލްގެ މީސްމީޑިއާގައި ހިއްސާކޮށްފައިވާނެ ކަމަށެވެ.
އާދިއްތަ ދުވަހު އައިޖީއެމްއެޗުން މީސްމީޑިއާގައި ހިއްސާކުރި މެސެޖުގައި ވަނީ ސަރޖަރީތައް ހުއްޓާލާފައިވާކަމަށް ބުނެ ފެތުރެނީ ދޮގު ޚަބަރެއް ކަމަށެވެ.
މި ހޮސްޕިޓަލުގެ ސަރޖަރީތައް ހުއްޓާލާފައިވާކަމަށް ސޯޝަލް މީޑިއާގައި ފެތުރެމުންދާ ޚަބަރުތަކާ ގުޅިގެން، ދަންނަވަމެވެ. މި ހޮސްޕިޓަލުގެ އެއްވެސް ސަރޖަރީއެއް މިވަގުތު ހުއްޓާލާފައި ނުވާކަމުގެ ޔަޤީންކަން އަރުވަމެވެ. އަދި އާއްމު ރައްޔިތުންނަށް އޮޅުންއަރާ ގޮތަށް، މިފަދަ ހަޤީޤަތާ ޚިލާފު މަޢުލޫމާތު ސޯޝަލް މީޑިއާގައި ފަތުރަމުންދާތީ، މިކަން ހަރުކަށި ޢިބާރާތުން ކުށްވެރިކޮށް ޒިންމާދާރުކަމާ އެކު މަޢުލޫމާތު ފެތުރުމަށް ނަޞޭޙަތްތެރިވަމެވެ.އައިޖީއެމްއެޗްގެ މެސެޖު
އިތުބާރު ހުރި މަސްދަރަކުން ރާއްޖެއެމްވީ އަށް މައުލޫމާތު ލިބިފައިވާ ގޮތުގައި އެ ހޮސްޕިޓަލްގެ ސަރޖަރީ އާއި ގުޅުން ހުރި ޚިދުމަތްތައް ދިނުމުގައި ގޮންޖެހުންތަކަކާއި ވަނީ ދިމާވެފައެވެ. އެހެންކަމުން އެ މައްސަލަ ދިމާވީ ކޮންއިރަކުތޯ ސާފުކުރުމަށް ރާއްޖެއެމްވީން ސުވާލުކުރުމުން އައިޖީއެމްއެޗުން އެކަމަށް ޖަވާބެއް ދީފައެއް ނުވެއެވެ.
ހަމައެހެންމެ މީސްމީޑިއާގައި ދެކެވެމުންދާ ވާހަކަތަކާއި ގުޅޭގޮތުން އިތުރު މައުލޫމާތު ހޯދުމަށް ރާއްޖެއެމްވީން މަސައްކަތް ކުރި ނަމަވެސް އައިޖީއެމްއެޗްގެ މީޑިއާ އިން އަދި މިހާތަނަށް އެކަމާއި ގުޅުން ހުރި އިތުރު ތަފްސީލްތަކެއް ހިއްސާކުރައްވާފައެއް ނުވެއެވެ. އެެހެންކަމުން ދައުރުވަމުންދާ ސްކްރީންޝޮޓްތަކުގެ ސައްހަކަމާއި މެދު ސާފު ޖަވާބެއް އައިޖީއެމްއެޗްގެ ފަރާތުން ވަނީ ލިބޭ ގޮތް ނުވެފައެވެ.
