ނާހިލްގެ މަސައްކަތާ މެދު ގިނަ ކުލަބުތަކުން ތިބީ ހިތްހަމަ ޖެހިފައި!

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޖެނަރަލް ސެކްރެޓަރީކަމުގެ މަގާމުގައި ހުންނެވި ނާހިލް މުޙައްމަދު ޞިއްދީޤު އެ މަގާމުން އިސްތިއުފާ ދެއްވިއިރު، އޭނާގެ މަސައްކަތާ މެދު ހިތްހަމަ ޖެހޭކަން ގިނަ ކުލަބުތަކުން އަންގާފައި އޮތްކަން ހާމަވެއްޖެ އެވެ.

އެފްއޭއެމްގެ ޖެނަރަލް ސެކްރެޓަރީގެ މަގާމަށް ނާހިލް ހަމަޖެއްސީ މިދިޔަ އަހަރުގެ ނޮވެމްބަރު މަަހުގެ 10 ވަނަ ދުވަަހު އެވެ. މަގާމުގައި ދެ މަހާ ދުވަސްކޮޅެއް ހޭދަ ކުރުމަށްފަހު، ނާހިލް އިސްތިއުފާ ދީފައި ވަނީ މި މަހުގެ 29 ވީ ބުދަ ދުވަހު އެވެ. އޭގެ ކުރިން ރާއްޖޭގެ ގިނަ ކުލަބުތަކެއް ސޮއިކޮށް، އެފްއޭއެމްގެ ނޯމަލައިޒިންގ ކޮމެޓީ އަށް ވަނީ ސިޓީ އެއް ފޮނުވައިފަ އެވެ.

ކުލަބުތަކުގެ އިސްވެރިން ސޮއި ކޮށްފައިވާ އެ ސިޓީ ވަނީ “ރާއްޖެ އެމްވީ” އަށް ލިބިފަ އެވެ.

އެފްއޭއެމްގެ ނޯމަލައިޒިންގ ކޮމެޓީގެ ޗެއާމަން އަޙުމަދު ޒުހޫރަށް އެޑްރެސްކޮށް ފޮނުވާފައި އެ ސިޓީގައި އެފްއޭއެމްގެ މެމްބަރު ދެ ކުލަބެއް ފިޔަވައި، ހުރިހާ ކުލަބަކުން ވަނީ ސޮއި ކޮށްފަ އެވެ. އޭގެ ތެރޭގައި ފުރަތަމަ ޑިވިޝަންގެ އަށް ކުލަބެއް ވެސް ހިމެނެ އެވެ. އެ ސިޓީގައި ބުނެފައި ވަނީ މިދިޔަ މުއްދަތުގައި ފުޓުބޯޅައިގެ ކަންކަން އިސްލާހު ކުރުމާއި، ޙާލަތު ބަދަލު ކުރުމަށް ނާހިލް ކޮށްފައިވާ މަސައްކަތްތައް ކުލަބުތަކުން ބަލައި ގަންނަ ވާހަކަ އެވެ.

މީގެ އިތުރުން ރާއްޖޭގެ ފުޓުބޯޅަ ސީޒަން ހުއްޓިފައިވާއިރު، އެކަން އަލުން ފަށައި ގަތުމަށް ވެސް ނާހިލް ގިނަ މަސައްކަތްތަކެއްކޮށް، ކުލަބުތަކާ ގުޅިގެން ކުރިއަށް ދިޔުމަށް މަސައްކަތް ކޮށްފައިވާ ކަމަށް ވަނީ ފާހަގަ ކޮށްފަ އެވެ. އަދި މިހާރު ފުޓުބޯޅަ އަށް ކުރިމަތިވެފައިވާ އުނދަގޫ ވަގުތުގައި ވެސް ނާހިލް މަސައްކަތް ކުރަމުން އައީ ކުލަބުތަކުގެ މެދުގައި ހަމަހަމަކަމާއި، އިންސާފުވެރިކަމާ އެކު ވެސް ބުނެފައިވެ އެވެ.

އެހެންކަމުން އެފްއޭއެމްގެ ޖެނަރަލް ސެކްރެޓަރީކަމުގެ މަގާމުން ނާހިލް އިސްތިއުފާ ދިނުމުގެ ފަހަތުގައި އެހެން މައްސަލަތަކެއް އުޅޭ ކަމުގެ އަޑުތައް ވެސް ވަނީ ފެތުރިފަ އެވެ. އެގޮތުން އެފްއޭއްމެ ނުވަތަ ނޯމަލައިޒިން ކޮމެޓީގެ ތެރޭގައި އިތުރު މައްސަލަތަކެއް އުޅޭ ކަމުގެ އަޑުތައް ވެސް މި ދަނޑިވަޅުގައި ވަނީ ފެތުރިފަ އެވެ.