ކީރިތި ޤުރުއާން އެންދި މީހާ ސްވިޑްންގައި ބަޑިޖަހާ މަރާލައިފި

ސްވިޑްންގައި ކީރިތި ގުރުއާން އެންދި މީހާ ބަޑިޖަހާ މަރާލައިފިއެވެ.

ސްވީޑިޝް ޕަބްލިކް ޓެލެވިޜަން އެސްވީޓީ އިން ބުރާސްފަތި ދުވަހު ރިޕޯޓުކުރި ގޮތުގައި 38 އަހަރުގެ ސަލްވާން މޮމިކާ ސްޓޮކްހޯމްގެ ސިޓީއެއްގައި ހުރި އޭނާގެ އެޕާޓްމަންޓުގައި މަރާލީ ބަޑިޖެހުމުގެ ސަބަބުން ކަމުގައެވެ.

ސްވިޑްންގެ ފުލުހުން ބުނީ ރޭގަނޑުގެ ވަގުތެއްގައި ބަޑިޖެހުމުގެ ހާދިސާއެއްގެ ރިޕޯޓެއް ލިބުނު ކަމަށާއި، އެތަނުން މީހަކު ބަޑިޖަހައިގެން ސީރިސް ޒަޚަމްތަކެއް ވެފައިވަނީކޮށް ފެނުނު ކަމަށެވެ. އަދި އޭނާ މަރުވީ ހޮސްޕިޓަލަށް ގެންދިޔަ ފަހުން ކަމަށް ބުނެފައިވެއެވެ. މަރުވެފައިވާ މީހާއަކީ މޮމިކާ ކަން ފުލުހުން ވަނީ ކަށަވަރު ކޮށްދީފައެވެ. އަދި އެ ހާދިސާ އާ ގުޅިގެން 5 މީހަކު ހައްޔަރު ކޮށްފައިވާ ކަމަށާއި ތަޙުޤީޤެއް ފެށިފައިވާ ކަމަށް ބުންޏެވެ.

މޮމިކާ މަރާލި އިރު ބުރާސްފަތި ދުވަހު ސްޓޮކްހޯމްގެ ޑިސްޓްރިކްޓް ކޯޓެއްގައި އޭނާ ހިމެނޭ ގޮތުން ބައެއްގެ މައްޗަށް ހިންގާ ޝަރީއަތެއްގެ ހުކުމް ކުރުމަށް ވެސް އޮތީ ތާވަލު ކޮށްފައެވެ. ކޯޓުން ބުނި ގޮތުގައި މޮމިކާ ދަޢުވާލިބޭ ފަރާތެއްގެ ގޮތުގައި ހިމެނޭ ޝަރީޢަތެއްގައި ބުރާސްފަތި ދުވަހަށް ހަމަޖެހިފައިވާ ޙުކުމް އިއްވުން މިހާރު ވަނީ ފަސްކުރެވިފައެވެ. މޮމިކާ އަށް އިޝާރާތް ކޮށް ކޯޓުން ބުނީ އެއީ ދަޢުވާލިބޭ ފަރާތްތަކުގެ ތެރެއިން އެކަކު މަރުވެފައިވާތީ ކަމަށެވެ. މޮމިކާ އާއި އޭނާއާއެކު ދަޢުވާލިބޭ އިތުރު ފަރާތްތަކެއްގެ މައްޗަށް ސްޓޮކްހޯމް ކޯޓުގައި ކުރިއަށް ދިޔަ މައްސަލަ އަކީ ކީރިތި ގުރުއާން އެންދުމަށް ފަހު ވަކި ނަސްލަކާ މެދު ނަފްރަތު އުފެދޭ ގޮތައް ދައްކާފައިވާ ވާހަކަތަކާ ގުޅިގެން އުފުލުނު ދައުވާއެކެވެ.

އިރާގަށް އުފަން އުމުރުން 38 އަހަރުގެ މޮމިކާ ވަނީ 2023 ވަނަ އަހަރު ސްވިޑްންގައި އިސްލާމްދީނުގެ މާތްވެގެންވާ ފޮތް ކަމުގައިވާ ޤުރުއާން އަންދާލުމާއި އިސްލާމް ދީނުގެ ހުރުމަތް ކެނޑޭ އެތައް ހަރަކާތެއް ހިންގާފައެވެ. އޭނާ ޤުރުއާން އަންދާ ވީޑިއޯތައް ދުނިޔޭގެ އެކި ކަންކޮޅުތަކަށް ފެތުރި، މުސްލިމު ޤައުމުތަކުގައި އެކަމާ ގުޅިގެން ރުޅި އާއި ފާޑުކިޔުން އިތުރުވެ، އެތައް ތަނެއްގައި ހަމަނުޖެހުން އުފެދުނުކަން ފާހަގަ ކުރެވެއެވެ.

މޮމިކާ ވަނީ އިސްލާމްދީނާ ދެކޮޅަށް އެތައް ހަރަކާތެއް ހިންގާ އެތައް ތަނެއްގައި ކިރީތި ގުރުއާން އަންދާފައެވެ.

2023 ވަނަ އަހަރު އިރާޤުގެ ފޮރިން މިނިސްޓްރީން އެނާ އިރާގަށް ހަވާލު ކުރުމަށް ސްވިޑްން އަށް ގޮވާލިއެވެ. އެއީ އެ ޤައުމުގެ ޤާނޫނުތަކާ އެއްގޮތަށް އޭނާގެ މައްޗަށް ޝަރީޢަތް ކުރުމަށްޓަކައި ކަމަށް އިރާގުން ބުނެފައިވެއެވެ.

މިނިސްޓްރީން ބާރުއަޅައި ބުނެފައިވަނީ މޮމިކާގެ ނުބައި ޢަމަލަކީ މާތްވެގެންވާ އިސްލާމް ދީނަށް ފުރައްސާރަކުރުން ކަމަށާއި، އެކަމުގެ ސަބަބުން މުޅި ދުނިޔޭގެ މުސްލިމުންގެ އިހްސާސްތަކަށް ފުން އަސަރެއް ކޮށްފައިވާ ކަމަށެވެ.

އޭނާގެ އެ ނުބައި އަމަލުގެ ސަބަބުން ބަޣްދާދުގައި ހުރި ސްވިޑްންގެ އެމްބަސީގެ ކުރިމަތީގައި ދެފަހަރެއްގެ މަތިން ހަމަނުޖެހުން ހިނގާފައިވެއެވެ. އަދި އެކަމާ ގުޅިގެން ހިނގި ޑިޕްލޮމެޓިކް އަރާރުންތަކެއްގެ ތެރެއިން ސްވިޑްންގެ އެމްބެސެޑަރު އިރާގުން ބޭރުކޮށްލިއެވެ.

ސްވިޑްންގެ ސަރުކާރުން މޮމިކާ ގުރުއާން އެންދި މުޒާހަރާ އަށް ހުއްދަ ދީފައިވަނީ އެގައުމުގެ ޚިޔާލު ފާޅުކުރުމުގެ މިނިވަންކަމުގެ ޤާނޫނާ އެއްގޮތަށް ކަމަށް ބުނެފައިވެއެވެ.

އޭގެ ފަހުން، ވަކި ޙާލަތްތަކެއްގައި ދީނީ ފޮތްތައް އެންދުން ފަދަ ކަންކަން ހިންގާ މުޒާހަރާތައް މަނާ ކުރުމަށް ޤާނޫނީ ގޮތުން ކުރެވެން ހުރި ކަންކަން ބަލާނެ ކަމަށް ސްވިޑްން ސަރުކާރުން ވަނީ ވަޢުދުވެފައެވެ.