ސްވީޑްންއިން ނޭޓޯގެ ގައުމަކަށް ވުމަށް ހުށަހަޅައިފި ނަމަ އެމެރިކާއިން އެގައުމަށް އެއްބާރުލުން ދޭނެކަމަށް ބުނެފައިވާކަމަށް ސްވީޑްންއިން ހާމަކޮށްފިއެވެ.

އެމެރިކާގެ ވޮޝިންގްޓަނަށް ކުރެއްވި ދަތުރުފުޅުގައި ސްވީޑްންގެ ފޮރިން މިނިސްޓަރު އޭން ލިންޑެ ވަނީ އެގައުމުން ނޭޓޯއާ ގުޅުމަށް ހުށަހެޅުމުން، ފުރިހަމަކުރަންޖެހޭ މަސައްކަތްތައް ފުރިހަމަވަންދެން އެމެރިކާގެ އެހީ އެގައުމަށް ލިބޭނެ ކަމުގެ ފުރިހަމަ ޔަގީންކަން އެމެރިކާއިން ދީފައިވާކަމަށް ވިދާޅުވެފައެވެ.

ފިނި ހަނގުރާމައަށްފަހު ސްވީޑްން އަދި ފިންލޭންޑުން ނޭޓޯއާ ގުޅިފައެއް ނުވެއެވެ. ނަމަވެސް 2014 ވަނަ އަހަރު ކްރިމިއާ ހިފުމަށް ރަޝިއާއިން ކުރި މަސައްކަތާއި މިއަހަރު ޔޫކްރެއިނަށް އަރައި ޔޫކްރެއިންގައި ކުރިއަށް ގެންދާ ހަނގުރާމައާއެކު އެ ދެގައުމުންވެސް ދަނީ އެގައުމުތަކުގެ ސަލާމަތީ ސިޔާސަތުތަކާ ގުޅޭގޮތުން މަޝްވަރާތައްކޮށް ނޭޓޯއާ ގުޅުމުގެ މަޝްވަރާތައް ކުރަމުންނެވެ.

ސްވީޑްން އަދި ފިންލޭންޑްގެ ވެސް އެންމެ ބޮޑު ކަންބޮޑުވުމަކީ ނޭޓޯގެ ގައުމަކަށް ވުމަށް ހުށަހެޅުމަށްފަހު ރަސްމީކޮށް އެޖަމާއަތުގެ ގައުމަކަށް ވުމަށް ފުރިހަމަކުރަންޖެހޭ ކަންތައްތައް ފުރިހަމަކުރަން ނަގާ ދުވަސްތަކުގައި ކުރިމަތިވެދާނެ ނުރައްކަލަކާ މެދުއެވެ. ނޭޓޯގެ މިހާރުގެ ހުރިހާ ގައުމެއްގެ ތާއީދާއެކު އެޖަމިއްޔާގެ ގައުމަކަށްވުމަށް އަހަރުގެ ދުވަހުގެ ދިގު މުއްދަތެއް ނަގާފާނެ ކަމަށް ބެލެވެއެވެ.

އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކެންއާ ބައްދަލުކުރެއްވުމަށް ފަހު ވޮޝިންގްޓަންގައި ހުންނަވާ ސްވީޑްންގެ ޓީވީއަށް ދެއްވި އިންޓަވިއުއެއްގައި މިނިސްޓަރު އޭން ވަނީ އެދެބޭފުޅުންގެ ދެމެދު ދެކެވުނު ވާހަކަތަކުގެ މާބޮޑު ތަފްސީލެއް ހާމަނުކުރައްވާނެ ކަމަށާއި އެހެން ނަމަވެސް އެގައުމަށް އެމެރިކާގެ އެއްބާރުލުން ލިބޭނެ ކަމުގެ ޔަގީންކަން މިހާރު ލިބިފައިވާ ކަމަށް ވިދާޅުވެފައެވެ.

މިކަމުގައި އެމެރިކާގެ އެއްބާރުލުން ލިބުނު ނަމަވެސް އެގައުމަށް ސީދާ ހަމަލާއަކުން ދިފާއުވުމަށް އަސްކަރީ އެހީތަކެއް ނުދެވޭނެ ކަމަށާއި އެއީ ނޭޓޯގެ މެމްބަރަކަށް ވުމުން ގެރެންޓީވާނެ ކަމެއް ކަމަށް މިނިސްޓަރު ވަނީ ވިދާޅުވެފައެވެ.

އެމެރިކާގެ އެއްބާރުލުން ލިބޭނެކަމަށް ބުނެފައި ވަނީ ސީދާ ކޮންކޮން ކަންތަކެއްގައިކަން ހިއްސާ ކުރައްވަން މިނިސްޓަރު ވަނީ ދެކޮޅުހައްދަވާފައެވެ.

އޭނާ ވަނީ ސްވީޑްންގެ މިނިންމުމާ ހިތްހަމަ ނުޖެހި އެގައުމާ ދެކޮޅަށް ރަޝިއާއިން އެއްވެސް ކަހަލަ އިންޒާރެއްދީ އެއްވެސް ކަހަލަ ފިޔަވަޅެއް އަޅައިފި ނަމަ އެމެރިކާއިން އެތަން ބަލަން މަޑުން ނޯންނާނެ ކަމުގެ ޔަގީންކަން ލިބިފައިވާކަމަށް ވިދާޅުވެފައެވެ.

މިދެބޭފުޅުންގެ ބައްދަލުވުމަށްފަހު އެމެރިކާގެ ސްޓޭޓް ޑިޕަރޓްމެންޓުން ނެރުނު ބަޔާނެއްގައި ވަނީ އައު ގައުމުތަކުން ނޭޓޯއާ ގުޅުމަށް އެގައުމުގެ އެއްބާރުލުން ލިބޭނެ ކަމަށް ބުނެފައެވެ. ނަަމަވެސް ނޭޓޯގެ މެމްބަރަކަށް ވުމުގެ ކުރިން އެމެރިކާގެ އަސްކަރީ ހިމާޔަތް ލިބޭނެ ކަމުގެ ވާހަކަ ހިމަނާފައެއް ނުވެއެވެ.

މިދިޔަ މަހު ސްވީޑްންގެ ޑިފެންސް މިނިސްޓަރު ވަނީ ނޭޓޯގެ ގައުމަކަށް ވުމަށް އެގައުމުން ހުށަހަޅައިފި ނަމަ އެކަމުގެ ސަބަބުން ރަޝިއާގެ ފަރާތުން ގޮންޖެހުންތަކަކާ ކުރިމަތިވެދާނެކަން ފާހަގަކުރައްވާފައެވެ.

ސްވީޑްން އަދި ފިންލޭންޑުންވެސް ނޭޓޯއާ ގުޅުމުގައި މިމަހު ގޮތެއް ނިންމާނެ ކަމަށް ރިޕޯޓުތައް ބުނާއިރު، އެ ދެގައުމުން އެޖަމާއަތާ ގުޅުމަކީ ރަޝިއާއިން ތާއިދުކުރާ ކަމެއް ނޫންކަމަށް ރަޝިއާއިން ވަނީ ހާމަކޮށްފައެވެ. އެގޮތުން ސްވީޑްން އަދި ފިންލޭންޑުން ނޭޓޯއާ ގުޅިއްޖެ ނަމަ ނިއުކްލިއަރ ހަތިޔާރާ ހައިޕަރސޮނިކް މިސައިލްތަކުގެ ހަމަލާތައް ދެވިދާނެ ކަމުގެ އިންޒާރު ރަޝިއާއިން ވަނީ ދީފައެވެ.