ބޮޑުހިލަ ބަލްކުކޮށް ގެންނަވާ ވާހަކަ ތިޔަ ދައްކަވަނީ، ފަރުބަދަ ހުރިގޮތަށް ގެންނަންތޯއެވެ؟

ބައެއް މީހުން ބުނަނީ ރައީސް މުއިއްޒު އުޅުއްވަނީ ދައްކަވާނެ ނުދައްކަވާނެ ވާހަކައެއް ނޭނގިގެން ކަމަށެވެ. އަނެއް ބަޔަކު ބުނަނީ ރައީސް މުއިއްޒު ވިދާޅުވެވޭ އެއްޗެއް ޚުދު އެމަނިކުފާނަކަށް ވެސް އެނގިވަޑައެއް ނުގަންނަވައެވެ. ބާކީ ތިބި މީހުން ބުނަނީ ރައީސް އުޅުއްވަނީ މޮޔަފުޅުވެގެން ކަމަށެވެ. ރައީސްއަށް ވާނުވާ ނޭނގިގެން އުޅުއް ކަމަށާއި، އެއްވެސް އަމާޒެއް ނެތް ކަމަށާއި، އަމާޒު ލާހޫރެނީ ކަމަށް ބުނާ މީހުންވެސް މަދެއް ނޫނެވެ.

މި ޒާތްޒާތުގެ ވާހަކަ ރައްޔިތުން ދައްކަނީ ސަބަބުތަކެއް ނެތިއެއްވެސް ނޫނެވެ. ޚާއްސަކޮށް ރާއްޖޭގެ ތަރައްގީއާ ގުޅޭ ގޮތުން އަދި ރައީސް މުއިއްޒުގެ ސިޔާސަތުތަކާ ގުޅޭގޮތުން އެކިފަހަރު ދައްކަވާ ވާހަކަތައް ހުންނަނީ މީހަކު އެއްޗެއް ނުބުނާ ގޮތަކަށްވެސް ނޫނެވެ. އަދި ވަކިން ބޮޑަށް ރަށްރަށަށް މި ކުރައްވާ ދަތުރުފުޅުތަކުގައި ރައީސަށް ދެއްކެވޭ ނުދެއްކެވޭ ވާހަކައެއް ޚުދު ރައީސްއަށް އެނގިވަޑައިގަންނަވާހެނެއްވެސް ހިއެއް ނުވެއެވެ.

ކުޑަ ރަށަކަށް ވަޑައިގެންނެވިއްޖެނަމަ ދައްކަވަނީ ކުޑަ ރަށެއް ބޮޑު ރަށެއް ތަފާތު ނުކުރައްވާ ތަރައްޤީ ކޮށްދެއްވާނެ ކަމުގެ ވާހަކައެވެ. އެމްޑީޕީގެ ޖަޒީރާ ރާއްޖެ މެނިފެސްޓޯ ގެ މި ޓެގްލައިން މާ ގިނަގިނައިން މިހާރަކަށް އައިސް އެބަ ވިދާޅުވެވެއެވެ. އަނެއްކޮޅުން ބޮޑު ރަށަކަށް ވަޑައިގެންނެވިއްޖެއްޔާ ދައްކަވަނީ ކޮންމެވެސް އަރބަން ސެންޓަރުތަކެއްގެ ވާހަކައެވެ. މާލޭގައި ހުންނަވައިފިއްޔާ ދައްކަވަނީ ރަސްމާލެ ކިޔާ ޑްރީމް ޕްރޮޖެކްޓެއް ހައްދަވައިގެން 80 ވަރަކަށް ހާސް ފްލެޓް އަޅުއްވާ އާބާދީގެ ބޮޑު ބައެއް އެތަނަށް ގެންދާ ވާހަކައެވެ. ރާއްޖެއިން ބޭރަށް ވަޑައިގެންނެވިއްޖެނަމަ އިނގިރޭސި ބަހުން ދައްކަވަނީ މީހުން ދިރިއުޅޭ 184 ރަށް ތަރައްގީ ނުކުރެވޭނެ ވާހަކައެވެ. ކުދި ރަށްރަށުން ބޮޑެތި ރަށްރަށަށް މީހުން ޖެހޭނީ ހިޖުރަކުރަން ކަމުގައެވެ.

މި ހުރިހާ ޒާތަކަށް ވާހަކަފުޅު ދައްކަވަމުން ދެން ދައްކަވަނީ ތަރައްގީގެ ޕްލޭނެއް އޮތް ވާހަކައެވެ. ދުރުރާސްތާގެ ޕްލޭނެއްގެ ވާހަކައެވެ. މެދުރާސްތާގެ ޕްލޭނެއްގެ ވާހަކައެވެ. ސަރަހައްދީ ޕްލޭނުގެ ވާހަކަ އެވެ. އިންޓެގްރޭޓެޑް ޑިވެލޮޕްމަންޓުން ގެ ވާހަކައެވެ. 7 އާބަން ސެންޓަރ ހުރިހާ ކަމެއް ހިމަނައިގެން ހައްދަވާނެ ވާހަކައެވެ. ވިހި އަހަރުގެ ޕްލޭނެއްގެ ވާހަކައެވެ. އަދި އެކަމަކު ގައުމީ ތަރައްގީގެ މާސްޓަރ ޕްލޭން ހަދަން ނުފަށާ ވާހަކަވެސް ވިދާޅުވެއެވެ. ދެން އިއުލާނު ކުރައްވަނީ މުޅި ރާއްޖޭގައި ހައުސިންގ ޔުނިޓް އަޅައިދޭނެ މީހުން ހޯދާށެވެ. އިއުލާނުގައި ވާ އަދަދުތައް ވެސް ޕޯޑިއަމްގައި ހުންނަވާފައި ހަމަ ކުއްލި އަކަށް ބަދަލު ކޮށްލަވަނީއެވެ. މިރަށަށް އޮންނާނީ އިއުލާނުގައި 100 ޔުނިޓެވެ. އެކަމަކު އަޅުގަނޑު 200 ޔުނިޓު އަޅާ ގޮތައް މި ހަމަޖެއްސީއެވެ. މަގުމަތިން ދިމާވާ ކުޑަކުއްޖަކު ނޯޓުކޮޅެއްގައި ލިޔެގެން ކަމަކު އެދުނަސް ވިދާޅުވާތީ އިވެނީ އެކަމެއް އެ އަހަރު ކޮށްދެއްވާނެ ކަމުގެ ވާހަކައެވެ. އެހިސާބުން އެއީ ބަޖެޓުގައި އޮތް ކަމެއްތޯ ނެތް ކަމެއްތޯ ބަލާކަށް ނުޖެހެއެވެ. އެމަނިކުފާނު އަރިހު ދެންނެވީމާ ވާންޖެހޭނެއެވެ. ވޭތުވެދިޔަ އަހަރު ކަމެއް ކޮށް ނުދެއްވީ ކީއްވެތޯ އަހައިފިނަމަ ވިދާޅުވާތީ އިވެނީ ބަޖެޓް އޮތް ގޮތުން ކަމަށެވެ. ބަނދަރު ނުހެދެނީ ކީއްވެތޯ އަހައިފިނަމަ ވިދާޅުވާތީ އިވެނީ ބޮޑުހިލަ ބަލްކުކޮށް ގެންނަވަން އުޅުއްވާތީ އަދި އެކަން ނުފެށި އޮތީއެވެ.

މީހަކު ހައިރާނެއް ނުވާނެހެއްޔެވެ. މިޔޮށް ހުރިހާ ދުވަހު ރަށްރަށުގެ އެއްގަމު ތޮއްޓާއި ކަނޑުތޮށި ލާން ބޮޑު ހިލަ ގެނައީ ހިލައަކުން ހިލައަކުން ހެއްޔެވެ؟ އޭރު ހިލަ ގެނައީ އެއް ލައްކަ ދެލައްކަ ޓަނު އެއްފަހަރާ ނަމަ މިއަދު ގެންނަވަން ތިޔަ އުޅުއްވާ ބަލްކަކީ ފަރުބަދަތައް ހުރި ގޮތަށްތޯއެވެ؟

184 ރަށް ތަރައްގީ ނުކުރެވެންޏާ، ކުޑަ ރަށެއް ބޮޑު ރަށެއް ތަފާތު ނުކޮށް ތަރައްގީ ކޮށްދެއްވަނީ ކިހިނެއް ތޯއެވެ؟ ބޮޑު ކޮންމެ ރަށެއް އަރބަން ސެންޓަރަކަށް ހައްދަވަންޏާ ރަސްމާލެ ހައްދަވައިގެން މާލޭ ސަރަހައްދަށް ޖަމާކުރައްވަން ތިޔަ އުޅުއްވަނީ ކޮން ބައެއްތޯއެވެ؟

ރަށްރަށަށް ވަޑައިގެން އެތައް ވައުދުތަކެއް ވެ ވަޑައިގަންނަވަމުން ކުރިން ވެ ވަޑައިގެންނެވި ވައުދުތައް ފުއްދަވާނެ ކަމުގެ ޔަގީންކަން ދެއްވަމުން، ކުރިން ސޮއެ ކޮށްފައިހުރި މަޝްރޫއުތަކުގައި އަލުން އެހެން މީސްމީހުން ލައްވާ ސޮއެ ކުރުވަމުން، ކުރިން ނިމި ކުޅެމުންދާ ފުޓްސަލް ދަނޑުތައް އަލުން ނިންމަވާނެ ކަމަށް ވިދާޅުވަމުން، މެލޭޝިޔާގެ ކުންފުންޏަކަށް ދީފައި އޮތް 50 ކައުންސިލް އިމާރާތް އެޅުމުގެ މަޝްރޫއުގައި ދިވެހި ކުންފުންޏެއް ލައްވާ ސޮއެ ކުރަމުން، ފައިސާ ހަމަނުޖެހޭ ޕްރޮޖެކްޓްތަކުގެ ބިންގާ އަމިއްލަފުޅަށް އަޅުއްވަމުން، ކުޑަކުއްޖަކު ގޯލްގައި ބަހައްޓަވައިގެން ފައި ކުރުކޮށްފައި ގޯލަށް ޕެނަލްޓީ ޖައްސަވަމުން، ތިޔަ އުޅުއްވަނީ ދިވެހިން ހަމަ ތަންދޮރު ނުދަންނާނެ ކަމަށް ހީފުޅުކުރައްވައިގެންތޯއެވެ؟ ތިޔަ ގޮތަށް ރައްޔިތުން ގުނބޯ ހައްދަވައިގެން އުޅުއްވުމުގެ ބަދަލުގައި ތިޔަ ވިދާޅުވާ އެކި ވަރުވަރުގެ ޕްލޭންތަކުން ނަތީޖާ އެއް ރައްޔިތުންނަށް ދެއްކެވޭތޯ އުޅުއްވުން މާރަނގަޅުވާނެ ނޫންތޯއެވެ.