ސަރުކާރު ހިންގާ ޕާޓީ ޕީއެންސީއަކީ އެންމެ ބޮޑު ސިޔާސީ ޕާޓީކަމަށް ނިންމެން ނެތް ކަމަށާއި، ނަމަވެސް އެއީ މިހާތަނަށް ޕާޓީތައް އުފެއްދުމުގެ މަސައްކަތުގައި އެންމެ ބޮޑު ވައްކަމެއް ކުރި ޕާޓީ ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

ވަގު ފޯމް ހުށަހަޅައި ޕީއެންސީއަށް އެމްޑީޕީގެ މެންބަރުން ހިމެނޭ ގޮތަށް ގިނަ އަދަދެއްގެ އާއްމު ރައްޔިތުން އެޕާޓީއަށް ވައްދާފައިވާ މައްސަލައާ ގުޅިގެން ބުރާސްފަތި ދުވަހު ހެނދުނު އެމްޑީޕީގެ މެންބަރުން ވަނީ އިލެކްޝަން ކޮމިޝަނަށް ހާޒިރުވެ، މިކަންބޮޑުވުން އިލެކްޝަން ކޮމިޝަންގެ މެންބަރުންނާ ހިއްސާކުރައްވާފައެވެ. މިއީ އެ ޕާޓީން މިމައްސަލާގައި އެ ކޮމިޝަނާ ބަދަލުކުރި 3 ވަނަ ފަހަރެއްވެ.

މި މައްސަލައާ ގުޅޭގޮތުން ރާއްޖެއެމްވީއަށް މެންބަރު ޒިޔާދު ވިދާޅުވީ، ފޮޓޯ ޖަހައިގެން އޭނާގެ ނަމުގައި ވަގު ފޯމް ވައްދާފައިވާއިރު، އެމައްސަލާގައި ފޯމް ހުށަހެޅީ ކޮން ފަރާތަކުންތޯ އިލެކްޝަން ކޮމިޝަން (އީސީ)އިން ހާމަކުރަންޖެހޭ ކަމަށާއި، މިއަދާ ހަމައަށް އައިރު ވެސް އެކަން ކޮމިޝަނުން ހާމަކޮށްފައިނުވާ ކަމަށެވެ.

މެންބަރު ޒިޔާދު ވިދާޅުވީ ވައިކަރަދޫގެ ވެސް ގިނަ ރައްޔިތުން ޕީއެންސީއަށް އެމީހުންނަށް ނޭނގޭ ގޮތަށް ވައްދާފައިވާ ކަމަށާއި، މިއީ ކަންބޮޑުވާ ބޮޑު މައްސަލައެއް ކަމަށެވެ. މިހާރު ޕާޓީން ވަކިވާ އުސޫލު ވެސް އުދަނގޫ ކަމަށާއި، ފަސޭހަ ނިޒާމަކުން ޕާޓީން ވަކިވެވޭނެ ގޮތެއް ހަމަޖައްސައިދިނުމަށް އީސީގައި އެދިފައިވާ ކަމަށް މެންބަރު ޒިޔާދު ވިދާޅުވިއެވެ.

ޕީއެންސީއަށް އިޝާރާތް ކުރައްވައި މެންބަރު ޒިޔާދު ވިދާޅުވީ އެއީ އެންމެ ބޮޑު ސިޔާސީ ޕާޓީ ކަމަށް ނުނިންމޭނެ ކަމަށާއި، އެއީ އެންމެ ބޮޑު ވައްކަމެއް ކުރި ޕާޓީ ކަމަށެވެ.

މެންބަރު ޒިޔާދު ވިދާޅުވީ ޕީއެންސީއަށް އާއްމު ރައްޔިތުން ވަނުމުގެ އެއްވެސް ޝައުގުވެރިކަމެއް ނުހުންނާނެ ކަމަށެވެ.

2024 ވަނަ އަހަރުގެ ޑިސެމްބަރުގެ 31ގެ ނިޔަލަށް އީސީއިން އާންމުކޮށްފައިވާ ތަފަށްހިސާބުތަކުން ދައްކާ ގޮތުގައި ރާއްޖޭގައި އެންމެ މެންބަރުން ގިނައީ ޕީއެންސީގައެވެ. އެ ޕާޓިގައި 68،968 މެންބަރުން ތިބިކަމަށް ތަފާސްހިސާބުތަކުން ދައްކައެވެ.