ވައުދު ވަނީ ޕްލޭން ކުރެވި ބަޖެޓް ވެސް ކުރެވިފައިވާ ކަންކަމަށް: ރައީސް

އަތޮޅު ތެރެއަށް ކުރައްވާ ދަތުރުތަކުގައި ރަށްރަށަށް ވަޑައިގެން ކުރައްވަން ވައުދުވަނީ ޕްލޭން ކުރެވި ބަޖެޓް ކުރެވިފައިވާ ކަންކަން ކަމަށާއި ބަޖެޓު ނުކޮށް އެއްވެސް ކަމެއް ކުރައްވަން ވައުދު ނުވާކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މުއިއްޒު މިފަދައިން ވިދާޅުވީ، ބަޖެޓު ނުކޮށް މަޝްރޫޢުތައް ހިންގުމަށް ވައުދުވެވަޑައިގަންނަވަމުންދާ ކަމަށް ބުނެ އިދިކޮޅު ފަރާތްތަކުން ދައްކަވަމުންދާ ވާހަކަތަކަށް ރައްދުދެއްވައެވެ.

ހއ. އަތޮޅުގެ ރަށްތަކަށް ކުރައްވަމުންގެންދަވާ ރަސްމީ ދަތުރުފުޅުގައި، އެ އަތޮޅުގެ މުރައިދޫއަށް ވަޑައިގެން ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން، ރައީސް މުޢިއްޒު ވިދާޅުވީ އެމަނިކުފާނު ރަށްރަށަށް ކުރައްވާ ދަތުރުފުޅުތަކުގައި ރައްޔިތުންގެ ޙާލަތު ގާތުން ދެނެގަނެ، މަޝްވަރާކުރައްވައި، ވަޢުދުވެވަޑައިގެންފައިވާ ކަންކަން އަވަސް ދުވެއްޔެއްގައި ކުރިއަށް ގެންދެވުމަށް މަޝްވަރާކުރައްވަމުން ގެންދަވާ ކަމުގައެވެ. އަދި އެމަނިކުފާނު ރައްޔިތުންނާ ޙިއްޞާކުރައްވާ ހުރިހާ ވާހަކަތަކަކީ ވެސް ރޭވި، ބަޖެޓުކުރެވިފައިވާ ކަންކަން ކަމުގައިވެސް ރައީސް އިތުރަށް ވިދާޅުވިއެވެ.

ރައީސް ވިދާޅުވީ، އިދިކޮޅު ފަރާތްތަކުން އެމަނިކުފާނު ރާއްޖޭގެ އެކި ރަށްރަށަށް ވަޑައިގެން ރައްޔިތުންނަށް ވަމުންގެންދަވާ ވަޢުދުތަކަކީ އެއްވެސް ޕްލޭނެއް ނެތި، އަދި ބަޖެޓުގައި ހިމެނިފައިނުވާ ކަންކަން ކަމަށް ބުނަމުންދާ ކަމަށާއި، ނަމަވެސް، އެއީ ހަގީގަތެއް ނޫން ކަމަށެވެ.

ރައީސް މުޢިއްޒު ވިދާޅުވި ގޮތުގައި، ސަރުކާރުގެ ހުރިހާ މަޝްރޫޢުތަކެއް ކުރިއަށް ގެންދަނީ ފުރިހަމަ ޕްލޭނަކާއެކު، ބަޖެޓު ކުރެވިގެންނެވެ. އަދި މި މަޝްރޫޢުތައް ކުރިއަށްދާ ގޮތުގެ މަޢުލޫމާތު ރައްޔިތުންނާ ހިއްސާކުރަމުން ގެންދާނެކަމަށާއި، ސަރުކާރުން ވެފައިވާ ހުރިހާ ވަޢުދުތަކަކީވެސް ފުއްދާނެ ވަޢުދުތަކެއްކަމަށް ވެސް ރައީސް މުޢިއްޒު ވިދާޅުވިއެވެ.

ރައީސް މުއިއްޒު މިފަދައިން ވިދާޅުވަމުން ގެންދެވި ނަމަވެސް އިދިކޮޅު ފަރާތްތަކުން ބުނަމުން ގެންދަނީ ރައީސް މުއިއްޒު ރަށްރަށަށް ކުރައްވާ ދަތުރުތަކުގައި ރައްޔިތުންނަށް ވެވަޑައިގަންނަވާ ވައުދުތަކަކީ ހޮޅި ވައުދުތަކެއް ކަމަށާއި އަދި އެއީ އެއްވެސް ޕްލޭނެއް ނެތި އަދި ބަޖެޓް ވެސް ނުކޮށް ވެވަޑައިގަންނަވާ ވައުދުތަކެއް ކަމަށެވެ. އިދިކޮޅު ބައެއް ފަރާތްތަކުން ތުހުމަތު ކުރާ ގޮތުގައި ރައީސް މުއިއްޒު އަންނަނީ ކަނޑައެޅިފައި އޮންނަ އުސޫލުތަކުން ބޭރުން ވެސް ކަންކަން ކުރައްވާނެ ކަމަށް ވައުދުވަމުން ކަމަށެވެ.

އަދި މިހާރު ރައީސް ރަށްރަށަށް އެ ކުރައްވާ ދަތުރުފުލުތަކަކީ 2028 ވަނަ އަހަރުގައި އޮންނަ ރިޔާސީ އިންތިޚާބަށް ދުރާލާ ކުރައްވަމުން ގެންދަވާ ކެމްޕޭނެއްގެ ގޮތުގައި ވެސް އިދިކޮޅު ބައެއް ފަރާތްތަކުން އަންނަނީ ތުހުމަތުކުރައްވަމުންނެވެ.

ވެރިކަމުގެ ފަސް އަހަރުގައި ރާއްޖޭގައި މީހުން ދިރިއުޅޭ ހުރިހާ ރަށަކަށް ދެ ފަހަރެއްގެ މަތިން ދަތުރު ކުރެއްވުމަކީ ރައީސް މުއިއްޒުގެ ރިޔާސީ ވައުދެކެވެ.