ރައީސްއާއި "ގާތްވުމަށް" ސިހުރު ހެދިކަމަށް ތުހުމަތުކޮށް ބަންދުކުރި ޝަމްނާޒުގެ އާއިލާގެ މެންބަރުން މަގާމުތަކުން ވަކިކޮށްފި
ޝަމްނާޒް މަޤާމުން ވަކިކޮށްފައި ވަނީ ޖޫން މަހުގެ 26 ވަނަ ދުވަހު
ރައީސްއާއި "ގާތްވުމަށް" ސިހުރު ހެދިކަމުގެ ތުހުމަތުގައި ހައްޔަރުކުރި ޝަމްނާޒް (ވ) އަށް މަގާމުގެ ފަތްކޮޅު އަރުވަނީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި "ގާތްވުމަށް" ސިހުރު ހެދިކަމުގެ ތުހުމަތުގައި ހައްޔަރުކުރި ތިމާވެއްޓާ ބެހޭ މިނިސްޓްރީގެ ކުރީގެ ސްޓޭޓް މިނިސްޓަރު ފާތިމަތު ޝަމްނާޒްގެ އާއިލީ މެންބަރުން ސިޔާސީ މަގާމުތަކުން ވަކިކޮށްފިއެވެ.
ޝަމްނާޒް މަޤާމުން ވަކިކޮށްފައި ވަނީ ޖޫން މަހުގެ 26 ވަނަ ދުވަހުއެވެ. މީގެ އިތުރުން މި މައްސަލައާއެކު ޝަމްނާޒުގެ ކުރީގެ ފިރިމީހާ އަދި ރައީސް ޑރ. މުހައްމަދު މުއިއްޒުގެ އެންމެ އަރިސް އެއް ބޭފުޅެއްގެ ގޮތުގައި ހުންނެވި ރައީސް އޮފީހުގެ ކުރީގެ މިނިސްޓަރު އާދަމް ރަމީޒު ވެސް ވަނީ މަގާމުން ވަކިކޮށްފައެވެ.
ޝަމްނާޒު ހައްޔަރުކޮށް ދައުވާތަކެއްކޮށް މައްސަލަ ބެލުމަށްފަހު އޭނާ ދޫކޮށްލާފައިވާއިރު، ފަހުން އެ މައްސަލައިގެ އިތުރު ތަފްސީލެއް ފުލުހުންވެސް އަދި ސަރުކާރުންވެސް ހާމަކޮށްފައިނުވެއެވެ. ނަމަވެސް އިތުބާރު ހުރި މަސްދަރުތަކުން މައުލޫމާތު ލިބިފަިއވާ ގޮތުގައި ޝަމްނާގެ ދެ ކޮއްކޮއެއް ވަނީ މަގާމުން ވަކިކޮށްފައެވެ. މަގާމުން ވަކިކޮށްފައިވަނީ ހަޔަރ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރުގެ މަގާމުގައި ހުންނެވި ޝަމްނާގެ ކޮއްކޮގެ އިތުރުން ފޮރިން މިނިސްޓްރީގެ ސީނިއާ ޕޮލިޓިކަލް ޑިރެކްޓަރުގެ މަގާމުގައި ހުންނެވި ޝަމްނާޒުގެ ކޮއްކޮއެވެ.
ރައީސް އާއި ލޯބީގެ ގޮތުން "ގާތްވުމަށް" ސިހުރު ހެދިކަމުގެ މައްސަލައިގައި ޝަމްނާޒުގެ އިތުރުން މި މައްސަލައިގައި ތުހުމަތުގައި ޝަމްނާޒުގެ ކޮއްކޮ ހައްވާ ސަނާ އަލީ ސަލީމް ވެސް ބަންދުކުރިއެވެ. ނަމަވެސް މައްސަލަ ތަހުގީގުކުރަމުން ދަނިކޮށް ބަންދުގައި ބޭތިއްބުމަށް ނުފެންނާތީ އެ ދެމީހުން ވަނީ ބަންދުން ދޫކޮށްލާފައެވެ.
މި މައްސަލައިގެ ތަހުގީގަށް އެމީހުން ދިރިއުޅޭ ގެއިން ގެއިން ގެންދިޔަ ތަކެތީގެ ތެރޭގައި ސިހުރާ ގުޅޭ އެއްވެސް އެއްޗެއް ނުވަތަ ކަމެއް ހުރިތޯ އިސްލާމިކް މިނިސްޓްރީން ބަލައި ދިރާސާ ކޮށްފައިވާއިރު، އެފަދަ އެއްޗެއް ނެތްކަމަށް މިނިސްޓްރީން ވަނީ ބުނެފައެވެ.
އޭގެ އިތުރުން، ޝަމްނާޒު ބަންދުގައި ހުއްޓައި އޭނާގެ ކުރީގެ ފިރިމީހާ އާދަމް ރަމީޒް ޖިނާއީ ކުށެއްގެ ތުހުމަތުގައި ބައްދާލުމަށް އޭނާއަށް "އޮފަރ" އަންނަމުންދާ ކަމަށާއި، ރަމީޒާ ދެކޮޅަށް ބަޔާން ދީފިނަމަ އޭނާ ސަލާމަތްވާނެކަމަށް ފުލުހުން ބުނެފައިވާކަމަށް އޭނާގެ ވަކީލުވެސް ރާއްޖެއެމްވީއާ ވާހަކަ ދައްކަމުން ވިދާޅުވެފައިވެއެވެ.
މި މައްސަލައިގައި ޝަމްނާޒް އާއި ސަނާގެ އިތުރުން އިތުރު މީހަކު ހައްޔަރުކުރިއެވެ.
ޝަމްނާޒްގެ އާއިލީ މެންބަރުން މިއަދު ވަކި ކޮށްފައިވާއިރު، ޓޫރިޒަމް މިނިސްޓަރު އިބްރާހިމް ފައިސަލް ވެސް ވަނީ މަގާމުން ވަކިކުރައްވާފަ އެވެ.
