ސަލްޓަން ޕާކުގެ ނަން، ރަސްރަނި ބަގީޗާގެ ނަމަށް ބަދަލުކޮށް، ރައީސުލްޖުމްހޫރިއްޔާ އެ ބަގީޗާ ހުޅުއްވައިދެއްވައިފި އެވެ.
ރައީސުލްޖުމްހޫރިއްޔާ ބަގީޗާ ހުޅުވަދެއްވާފައި ވަނީ ހޯމަ ދުވަހުގެ ރޭ އެކަމަށް ބޭއްވި ހާއްސަ ރަސްމިއްޔާތެއްގައެވެ. ބަގީޗާ ހުޅުއްވައި ދެއްވުމަށް ފަހު ރައީސުލްޖުމްހޫރިއްޔާއާއި، އަނބިކަނަބަލުން ވަނީ ބަގީޗާ ބައްލަވާލައްވާފަ އެވެ.
ރަސްރަނި ބަގީޗާ ތަރައްގީ ކޮށްފައި ވަނީ މާލޭގެ އެހެން ޕާކުތައް ތަރައްގީ ކޮށްފައިވާ ގޮތާއި ތަފާތު ކޮންސެޕްޓަކަށެވެ. އެއީ އެޑިޓައިންމަންޓް އެންޑް ހެރިޓޭޖް ކޮންސެޕްޓަށެވެ.
ސަލްޓަން ޕާކް، ރަސްރަނި ބަގިޗާގެ ނަމުގައި ހުޅުވިއިރު، އެތަނުން ބޮޑު ބަދަލެއް ފެންނާނެ ކަމަށް ހައުސިން މިނިސްޓްރީން ބުނެ އެވެ. އެގޮތުން ޕާކް ތަރައްގީކޮށްފައިވަނީ އެތަނުގައި ފިނިފެންމާ ބަގީޗާއަކާއި، ސްނޯ އާއި ފިނީގެ އިހްސާސް ކުރެވޭ ގޮތަށް އަދި އެތަނުގައި ސްކޭޓް ވެސް ކުރެވޭ ގޮތަށް ވިންޓަ ކޯނައެއް ހިމެނޭގޮތަށެވެ. އަދި ގްރީން ޓަނަލް ވޯކްވޭއެއްގެ އިތުރުން ކުޑަކުދިން ޝައުގުވެރިވާ ގޮތަށް ފައްވާރެއް ވެސް ހިމެނެ އެވެ. ޕާކް ތަރައްގީކޮށްފައިވަނީ ދިވެހި ސަގާފީ ގޮތްތައް ހިމަނައިގެނެވެ.
ސަލްޓަން ޕާކް އެންމެ ފުރަތަމަ ހުޅުވުމަށް ނިންމާފައި އޮތީ މިދިޔަ އަހަރުގެ ޖުލައި މަހުގެ 26 ވަނަ ދުވަހުއެވެ. ނަމަވެސް ޕާކުގެ މަސައްކަތްތައް ނިމިފައި ނުވާތީ ހުޅުވޭ ގޮތް ނުވީއެވެ. އެ މަސައްކަތް ފަހުން ކޮށްފައި ވަނީ ސިފައިންނާ ހަވާލު ކޮށްގެންނެވެ.