" މިހާރު ހައްޖު ކޯޕަރޭޝަނަށް ފޯމެއް ހުށަހެޅިއަސް، އައިޑީކާޑު އާ ކުރިޔަސް ސިޔާސީ ޕާޓީއަށް ވައްދާ"
އައިޑީކާޑު އާ ކުރުމަށް އެދި ހުށަހަޅާފައިވާ މީހުން އައިޑީކާޑު ނުނަގަނީސް އެ އައިޑީކާޑު ބޭނުންކޮށްގެން ޕާޓީ އަށް ވެއްދުމަށް ފޯމު ހުށަހަޅާފައިވާ މައްސަލަ ފާހަގަވެފައިވާ ކަމަށް މަހްފޫޒް ވިދާޅުވި
އެމްޑީޕީގެ ލީގަލް ޑިރެކްޓަރ މަހްފޫޒް ސައީދު
މިހާރު ހައްޖު ކޯޕަރޭޝަނަށް ފޯމެއް ހުށަހެޅިއަސް، އައިޑީކާޑު އާ ކުރިޔަސް ސިޔާސީ ޕާޓީއަށް ވައްދާ ކަމަށާއި އެކަމުގެ ސަބަބުން އާއްމުން އިދާރާތަކަށް މައުލޫމާތުދިނުމަށް ޖެހިލުންވާ ކަމަށް އެމްޑީޕީގެ ލީގަލް ޑިރެކްޓަރ މަހްފޫޒް ސައީދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ވަގު ފޯމްފުރައިގެން ޕީއެންސީ އަށް މީހުން ވައްދާ މައްސަލަ އާއި ގުޅޭ ގޮތުން ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަމުންނެވެ.
ވަގު ފޯމް ފުރައިގެން ޕީއެންސީ އަށް މީހުން ވައްދާފައިވާ މައްސަލަ އާއި ގުޅިގެން އެ މައްސަލަ ތަހުގީގުކުރުމަށް ފުލުހުންނާއި އޭސީސީގެ މައްޗަށް އަމުރުކޮށްދިނުމަށް ޕްރޮސެކިއުޓަރ ޖެނެރަލްގެ އޮފީހުގައި އެދިފައިވާނެ ކަމަށް އެމްޑީޕީން ވަނީ ބުނެފައެވެ. އެކަމަށް އިޝާރާތްކުރައްވާ މަހްފޫޒް ވިދާޅުވީ ޑީއެންއާރުގެ ޑޭޓާ ބޭނުްނކޮށްގެން ވަގަށް ޕީއެންސީ އަށް މީހުން ވައްދާފައިވާ ކަމަށް ތުހުމަތުކުރަމުން ދަނީ ތޯތޯ ވާހަކަތަކެއްގެ މައްޗަށް ބިނާކޮށް ނޫން ކަމަށެވެ. އެގޮތުން އެފަދައިން އޮޅުވާލައިގެން ޕީއެންސީ އަށް މެމްބަރުން ވައްދާފައިވާ މައްސަލަ ފެންމަތިވުމުން އެކަމާއި ގުޅޭގޮތުން ޝަކުވާ ހުށަހަޅަން އެމްޑީޕީން ހުޅުވާލި ފުރުސަތުގައި އެމްޑީޕީގެ އެތައް ހާސް ބަޔަކު ޕީއެންސީ އަށް ވައްދާފައިވާކަމުގެ ޝަކުވާ ލިބިފައިވާ ކަަމަށް މަހުފޫޒް ވިދާޅުވިއެވެ. އޭގެ ތެރެއިން އެކަން ތަހުގީގު ކުރަން ބޭނުންވާ މީހުންގެ މައްސަލަތައް ފުލުހުންގެ އިދާރާއަށް ވެސް ހުށަހަޅަމުންދާކަން އޭނާ ވަނީ ފާހަގަކުރައްވާފައެވެ.
މަހްފޫޒް ވިދާޅުވީ ވަގު ފޯރމް ހުށަހަޅައިގެން ޕީއެންސީ އަށް މީހުން ވައްދާފައިވާ މައްސަލަ އަށް ބަލާއިރު އައިޑީކާޑު އާ ކުރުމަށް އެދި ހުށަހަޅާފައިވާ މީހުން އައިޑީކާޑު ނުނަގަނީސް އެ އައިޑީކާޑު ބޭނުންކޮށްގެން ޕާޓީ އަށް ވެއްދުމަށް ފޯމު ހުށަހަޅާފައިވާ މައްސަލަ ފާހަގަވެފައިވާ ކަމަށެވެ.
ކޮންމެ މީހެއްގެ ވެސް ޒާތީ ހައްގަށް އިދާރާތަކުން އިޚްތިރާމްކުރަން ވާނެ ކަމަށާއި އެއީ ޤާނޫނުއަސާސީން ކޮންމެ ދިވެއްސަކަށް ލިބިދީފައިވާ ހައްގެއް ކަަމަށް މަހްފޫޒް ވަނީ ފާހަގަކުރައްވާފައެވެ. ދައުލަތުގެ އިދާރާއަކަށް މައުލޫމާތު ދީގެން ޚިދުމަތް ހޯދުމުގައި އެއްވެސް ޖެހިލުމެއް އާއްމު މީހެއްގެ އޮވެގެންވާނެ ކަމަށް ޤަބޫލު ނުކުރައްވާ ކަމަށް މަހްފޫޒް ވަނީ ވިދާޅުވެފައެވެ.
