ދައުލަތެއްގެ ފެންވަރުގައި ވައްކަންކުރުމުން ދެން ޤައުމުގެ ކަންކަމަށް ފަރުވާ ހޯދަން ރައްޔިތުން ދާނެ ދިމާލެއް ނޭނގޭ - ޖަމީލް
އިހުސާން ފޯރމްފުރާތަނުގައި ހުންނެވި ފޮޓޯތައް އާއްމުވެ އޭނާގެ އިތުބާރު ނެތްކަމުގެ މައްސަލަ ވަނީ މަޖިލީހަށް ހުށަހަޅާފަ
ކުރީގެ ނައިބުރައީސް ޑރ. މުހައްމަދު ޖަމީލް
ދައުލަތެއްގެ ފެންވަރުގައި ވައްކަންކުރުމުން ދެން ޤައުމުގެ ކަންކަމަށް ފަރުވާ ހޯދަން ދާނެ ދިމާލެއް އެނގިވަޑައިނުގަންނަވާ ކަމަށް ކުރީގެ ނައިބުރައީސް ޑރ. މުހައްމަދު ޖަމީލް ވިދާޅުވެއްޖެއެވެ.
އޭނާ އެފަދައިން ވިދާޅުވީ ޕީޕަލްސް ނޭޝަނަލް ފްރަންޓް، ޕީއެންއެފްގެ ޖަގަހަ ޖަލްސާގައި ވާހަކަދައްކަވަމުންނެވެ.
އޭނާ ވިދާޅުވީ މި ސަރުކާރު ވުޖޫދުވީއްސުރެ މި ސަރުކާރުގެ ނެއެއްގާނީ ކަމުގެ ވާހަކަ ޕީއެންއެފްއިން އައީ ދައްކަމުން ކަމަށެވެ. މީގެ އިތުރުން ގައުމެއްގެ ހައިސިއްޔަތުން މިއަދު އިންތިހާ އަށް ނުތަނަވަސްވާ ކަމަށް ޖަމީލް ވިދާޅުވިއެވެ. ސަބަބަކީ ޤައުމު މިހާރު ވެއްޓިފައިވާ ދަށް ހާލަތު ކަމަށް ވެސް ޖަމީލް ވަނީ ވިދާޅުވެފައެވެ. ޤައުމަށް ދިމާވެފައިވާ ކަންކަމަށް މިއަދު ފަރުވާއެއް ބޭނުންވާ ކަމަށާއި ޤައުމުގެ ކަންކަމާއި މެދު ހައްލު ހޯދަން ދާނެ ދިމާލެއް މިއަދު އާއްމުންނަށް ނޭނގޭ ކަމަށް ޖަމީލް ވިދާޅުވިއެވެ. ޤައުމެއްގެ ވެރިކަން ކުރާ މީހުންނަކީ ދާހިލީ ޕޮލިސީ އާއި އެހެނިހެން ސިޔާސަތުތައް ސާފުކޮށް އެނގޭނެހެން ބުނެދޭން ޖެހޭ ތަނެއް ކަމަށް ޖަމީލް ވިދާޅުވިއެވެ. އެހެންނަމަވެސް ރާއްޖޭގައި ލިޔެފައިވާ ޒަމާންވީ މުއްސަނދި ޤާނޫނުއަސާސީއެއް އޮތް ނަމަވެސް ދައުލަތުގެ ފެންވަރުގައި ހިންގާ ކުށްތައް ހުއްޓުވޭނެ ގޮތެއް ނެތުމަކީ ކަންބޮޑުވުމެއް ކަމަށް ޖަމީލް ވިދާޅުވިއެވެ.
ޖަމީލް ވަނީ ވަގު ފޯރމް ފުރައިގެން ޕީއެންސީ އަށް މެމްބަރުން ވެއްދުމަކީ ބޮޑު ވައްކަމެއްކަމަށް ސިފަކުރައްވާ އެކަމަށް ފާޑު ވިދާޅުވެފައެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދާއި ލަފާފުޅުގެ މަތިން ޕީއެންސީއަށް 100،000 މެންބަރުން ހަމަކުރުމަށް އެ ޕާޓީން ކުރިއަށްގެންދިޔަ މެމްބަރޝިޕް ޑްރައިވްގެ ތެރެއިން ހޯމް ސެކްޓަރ ޓީމުން ޑީއެންއާރުގައި ހުރި ޒާތީ މައުލޫމާތު އެއްކޮށް ފޯމު ފުރިކަމަށް ދިޔައީ ތުހުމަތުކުރަމުންނެވެ. އަދި މި ކަމުގައި އެންމެ އިސްކޮށް ހުންނެވީ ހޯމްލޭންޑް މިނިސްޓަރު އަލީ އިހުސާންކަމަށް ތުހުމަތުކުރެވުމުންވެސް ތަކުރާރުކޮށް އެ މިނިސްޓްރީއާއި މިނިސްޓަރުވެސް ގެންދެވީ އެކަން ދޮގުކުރައްވަމުންނެވެ.
މީގެ އިތުރުން ހޯމް ސެކްޓަރގެ ޓީމުން ޑީއެންއާރުގައި ތިބެ ފޯމް ފުރާ މަންޒަރާއި، އިނގިލީގެ ނިޝާންތައް ޖަހާޖަހާ ގޮސް އިނގިލީގެ ޕްރިންޓް ގެއްލޭވަރަށް ކަންކަންކުރި ފޮޓޯތައް އާންމުވުމުންވެސް މިހާރު ވެރިކަން ކުރާ ޕީއެންސީން ގެންދިޔައީ އެކަން ދޮގުކުރަމުންނެވެ. ނަމަވެސް އިހުސާން ފޯރމްފުރާތަނުގައި ހުންނެވި ފޮޓޯތައް އާއްމުވެ އޭނާގެ އިތުބާރު ނެތްކަމުގެ މައްސަލަ ވަނީ މަޖިލީހަށް ހުށަހަޅާފައެވެ.
