ދައުލަތެއްގެ ސިފަ ވަނީ ގެއްލިފައި، މިއީ ހުދުމުހުތާރުވުން: އިންތި
8 އޮކްޓޯބަރު 2017 | އާދީއްތަ 03:26ސަރުކާރުގެ ބޭނުމަކީ މަޖިލިސް ތެރެއިން ކުރާ މަސައްކަތް ހުއްޓުމަކަށް ގެންނަން
މާފަންނު އުތުރު ދާއިރާގެ ރައްޔިތުންގެ މަޖިލީސް މެމްބަރު އިމްތިޔާޒު ފަހުމީ
ރައީސް އަބްދުﷲ ޔާމީންގެ ސަރުކާރުން އަމަލު ކުރާ ޙުދުމުހުތާރު އުސޫލުތަކުގެ ސަބަބުން ދައުލަތެއްގެ ސިފަ ވަނީ ގެއްލިފައި ކަމަށް މާފަންނު އުތުރު ދާއިރާގެ ރައްޔިތުންގެ މަޖިލިސް މެމްބަރު އިމްތިޔާޒު ފަހުމީ ވިދާޅުވެއްޖެއެވެ.
އިދިކޮޅު ސިޔާސީ ޕާޓީތަކަށް ނިސްބަތްވާ ރައްޔިތުންގެ މަޖިލީހުގެ 12 މެންބަރެއްގެ މައްޗަށް ކޮށްފައިވާ ދައުވާއާ ގުޅިގެން ރާއްޖެޓީވީއަށް މައުލޫމާތު ދެއްވަމުން އިމްތިޔާޒު ފަހުމީ ވިދާޅުވީ މަޖިލިސް މެމްބަރުންގެ މައްޗަށް އެކި އެކި ދައުވާކޮށް ޝަރީއަތް ކުރިއަށް ގެންދަނީ ގުޅިފައިވާ ސިޔާސީ ޕާޓީތަކުން މަޖިލިސް ތެރެއިން ކުރަމުން އަންނަ މަސައްކަތަށް ހުރަސް އެޅުމުގެ ގޮތުންނެވެ.
"އަބްދުﷲ މަސީހުގެ އިތުބާރު ނެތް ކަމުގެ ވޯޓު ނެގުމަށް ތައްޔާރުވެފައި ވަނިކޮށް، ހުރިހާ މެމްބަރުން ގެންގޮސްގެން ދައުވާތައް އުފުލަމުން އެގެންދަނީ، ވެރިކަން ބަދަލުވާނެތީވެ، ނޫނިއްޔާ، ޔާމީނާއި ހަމައިން މަޖިލީހުގެ ތެރެއިން އަތުވެދާނެ ކަމަށްޓަކައި ކުރައްވައިގެން އުޅޭ ކަމެއް މިއީ" އިންތި ވިދާޅުވިއެވެ.
އިންތި ވިދާޅުވީ ރައްޔިތުންގެ މަޖިލީހުގެ މެމްބަރުންނަން ދައުވާ ކުރަނީ މަޖިލިސް ރައީސް އަބްދުﷲ މަސީހުގެ އިތުބާރު ނެތް ކަމުގެ ވޯޓު ނަގާ ގާނޫނީ އިމުގެ ތެރެއިން ވެރިކަން ބަދަލުކޮށްފާނެތީ ކަމަށް އިންތި ވިދާޅުވިއެވެ.
ގާނޫނު ތަންފީޒް ކުރާ މުވައްޒަފުންގެ މަސައްކަތަށް ހުރަސް އަޅާފައިވާ ކަމަށް ބުނެ 12 މެންބަރެއްގެ މައްޗަށް ދައުވާ ކޮށްފައި ވަނީ، ޖުލައި މަހުގެ 24 ވަނަ ދުވަހު ރައްޔިތުންގެ މަޖިލިސް އިދާރާ ހިމެނޭ ސަރަހައްދު ފުލުހުން ބަންދުކޮށްފައިވަނިކޮށް ގަދަކަމުން ފުލުހުންގެ ސަފުތައް ފަޅާލައި މަޖިލިސް އިދާރާއަށް ވަދެފައިވާ ކަމަށް ބުނާ މައްސަލައިގަ އެވެ.
ޖުލައި 24 ވަނަ ދުވަހަކީ ރައްޔިތުންގެ މަޖިލީހުގައި ރައީސް އަބްދުﷲ މަސީހުގެ އިތުބާރު ނެތް ކަމަށް 42 މެންބަރުންގެ ސޮޔާއެކު މަޖިލީހަށް ހުށަހެޅި މައްސަލައިގެ ވޯޓު ނަގަން ޖެހޭ ދުވަހެވެ. އެހެން ނަމަވެސް، މަސީހުގެ އިތުބާރުގެ އެ މައްސަލަ ބާތިލް ކަމަށް ވަނީ ކަނޑައަޅާފަ އެވެ.
