މިއީ ޤައުމުގެ ހާލަތު ބަދަލު ކުރުމަށް ރައްޔިތުން ނިކުންނަންވީ ވަގުތު: އަލީ ހުސެއިން
އަލީ ހުސެއިން ޓުވިޓާގައި ވަނީ މިގޮތަށް ތިބެންވީ ކިތަށްމީހުން މަރަންދެންތޯ ސުވާލު ކުރައްވާފަ
އަލީ ހުސެއިން - މާރާމާރީތައް އިތުރުވާތީ އޭނާ ވަނީ ކަންބޮޑުވުން ފާޅުކޮށްފަ
މިއީ ޤައުމުގެ ހާލަތު ބަދަލު ކުރުމަށް އެންމެން އަތުގުޅާލައިގެން ނިކުންނަންވީ ވަގުތުކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެ އެވެ. އެގޮތަށް ވިދާޅުވެ އަލީ ހުސެއިން ވަނީ އާންމު ރައްޔިތުންނަށް ގިނަ ސުވާލުތަކެއް ވެސް ކުރިމަތިކޮށްފަ އެވެ.
އިދިކޮޅު ހަރަކާތްތަކުގައި އިސްކޮށް ހަރަކާތްތެރިވެވަޑައިގަންނަވާ އަލީ ހުސެއިން ޓުވިޓާގައި ވަނީ މިގޮތަށް ތިބެންވީ ކިތަށްމީހުން މަރަންދެންތޯ ސުވާލު ކުރައްވާފަ އެވެ. އަދި އަނެކާގެ ދަރިޔެއް މަރާލީމާ ތިމާގެ ހިތަށް އެއްވެސް އަސަރެއް ނުކުރާނަމަ ތިބާގެ ހިތުގައި އިންސާނިއްޔަތުކަމެއް އަދި އިސްލާމްކަމެއްވެސް ނެތްކަމަށް އަލީ ހުސެއިން ވިދާޅުވެފައިވެއެވެ.
އޭގެއިތުރުން އަލީ ހުސެއިން ވިދާޅުވެފައިވަނީ މަރަކަށް ފަހު މަރެއް އަދި ވަޅިޔަކަށްފަހު ވަޅިޔެއް ހަރާ ޤައުމު ކޮށާ ކުދިކޮށްލަނީ ކަމަށާއި، އަމިއްލަ ގަޔަށް ވަޅިހަރަންދެން ނުތިބެ ސަރުކާރު ޒިންމާދާރުކުރުމުގެ މަސައްކަތް ފަށަންޖެހިފައިވާ ކަމަށެވެ.
އަލީ ހުސެއިން އެފަދައިން ވިދާޅުވެފައިވާއިރު، މާރާމާރި އާއި، އެކި މައްސަލަތަކުގައި މި އަހަރު އެކަނިވެސް އެތަށް ޒުވާނުތަކެއް ވަނީ މަގުތަކުގައި ކަތިލާފަ އެވެ. ނަމަވެސް އެ މައްސަލަތަކުގައި އިންސާފު ހޯދައިދީ، މަރާމާރީތައް ހުއްޓުވައިދިނުމަށް ސަރުކާރުން އެކަށީގެންވާ މަސައްކަތްތަކެއް ނުކުރާކަމަށް އިދިކޮޅު ފަރާތްތަކުން ބުނެ އެވެ.
