ގައުމު މިއަދު މިވަނީ ނުރައްކާތެރި ހާލަތަކަށް ވެއްޓިފައި ކަމަށާއި ރައްޔިތުންނާއި ގައުމު ހަނާވަމުން ދާއިރު، އެމްޑީޕީން ބަލަން ނުތިބޭނެ ކަމަށް ދިއްދޫ ދާއިރާގެ ކުރީގެ މަޖިލިސް މެމްބަރު އަބްދުﷲ ވަހީދު ވިދާޅުވެއްޖެއެވެ.
ރާއްޖެ ޓީވީން ގެނެެސްދިން "ފުދިއްޖެ، ފުނޑިއްޖެ" ޚާއްޞަކަވަރޭޖުގައި ވާހަކަދައްވަމުން ވައްޑޭ ވިދާޅުވީ ގައުމު މިއަދު މި ވަނީ ނުރައްކާތެރި، އަދި ނާޒުކުރު ހާލަތަކަށް ވެއްޓިފައި ކަމަށެވެ. އެގޮތުން ގައުމު މިހާރު މިއޮތް ހާލަތުން ސަލާމަތް ކުރުމަކީ ހަމަ ކޮންމެ ދިވެހި ރައްޔިތަކުވެސް ކުރަން ޖެހިފައިވާ ކަމެއްކަމަށް އޭނާ ވިދާޅުވިއެވެ.
ވައްޑޭ ވިދާޅުވީ ގައުމު މިއަދު މިދަނީ ޚުދުމުހުތާރު ވެރިކަމަކާއި ދިމާއަށް ކަމަށާއި ހަމައެއާއި އެކު ގައުމުގެ ރައްޔިތުން މިއަދު މިވަނީ ވަރަށް ބިކަހާލު ޖެހި ސަލާން ޖަހަން ޖެހިފައި ކަމަށެވެ.
ވައްޑޭ ވިދާޅުވީ ހަމަ ރަނގަޅަށް ހިނގަހިނގާ އޮތް ގައުމެއް، ރައީސް ޑރ. މުޙައްމަދު މުއިއްޒު ވެރިކަމަށް ވަޑައިގެން މިވީ އެއް އަހަރު ދުވަސްތެރޭގައި މުޅި ގައުމު އިނދަޖައްސާލައި ފުން ވަޅުގަނޑަކަށް ވައްޓާލައިފިކަމަށެވެ. ރައީސް މުއިއްޒު ވެރިކަމަށް ވަޑައިގަތީ ދިވެހި ރައްޔިތުންނަށް ވަރަށް ފޮނި ވައުދުތަކެއް ވެގެން ކަމަށާއި ނަމަވެސް މިއަދާއި ހަމައަށް ވެސް އެއްވެސް ވައުދެއް ފުއްދާފައި ނުވާކަން ވައްޑޭ ފާހަގަކުރިއެވެ.
ވައްޑޭ ވިދާޅުވީ މި ސަރުކާރުން ރައްޔިތުންނަށް ވި އެންމެ ބޮޑުއެއް ވައުދަކީ ރައްޔިތުންނަށް ފްލެޓާއި ގޯތި ދޭނޭކަމަށް ވި ވައުދު ކަމަށާއި އަދި އޭގެ އެއްވެސް ރައްޔިތަކު ވަޒީފާއިން ވަކި ނުކުރާނެ ކަމުގެ ވައުދުކަމަށެވެ. ނަމަވެސް ގޯއްޗާއި ފްލެޓަށް ވި ވައުދާއިވެސް ޚިލާފުވެ، އެތައް ހާސް ރައްޔިތުންނެއް ވަޒީފާއިން ވަކިކޮށް މަގުމަތިކޮށް ބިކަހާލުގައި ޖައްސާފައިވާ ކަމަށް ވައްޑޭ ވިދާޅުވިއެވެ.
އަޅުގަނޑުމެންގެ ޤާނޫނު އަސާސީ ބީވެގެން ހިނގައްޖެ. ޤާނޫނު އަސާސީއެއް އޮތުމުގެ ބޭނުމަކީ ދިވެހިރައްޔިތުނަން އުންމީދެއް އޮތުން. ރައްޔިތުންގެ އާންމު ހާލަތު ރަނގަޅުކުރުމަށްޓަކައި. ރައްޔިތުންގެ ތަނަވަސްކަން އިތުރުކުރުމަށް ޓަކައި. އެހެން ނަމަވެސް މަޖިލީހުގެ އަޣްލިބިއްޔަތު ހިއްޕަވައިގެން ހިތު ހުރި ގޮތަކަށް ކަންކަން ކުރަމުން އެގެންދަވަނީ. އަޅުގަނޑުމެންނަށް ފެނިގެން މިދިޔައީ ރީތިކޮށް ހިނގަމުން ދިއަ ގައުމެއް ވޭތުވެދިއަ އެއް އަހަރުގެ ތެރޭގައި ފުނޑާލިތަން. އިނދަޖައްސާލިތަން. ޚާއްސަކޮށް ގައުމު މިގޮތަށް ފުނޑިގެންދާއިރު، ރައްޔިތުން ފުނޑިގެންދާއިރު، އެމްޑީޕީއަށް ބަލާކަށް ނުތިބޭނެ.ދިއްދޫ ދާއިރާގެ ކުރީގެ މަޖިލިސް މެމްބަރު އަބްދުﷲ ވަހީދު
ވައްޑޭ ވިދާޅުވީ އެމްޑީޕީ އަކީ ދިވެހި ރައްޔިތުންގެ ހައްޤުގައި އަބަދުވެސް ވަކާލާތު ކުރާ ޕާޓީއެއް ކަމަށާއި އެގޮތުން ރައްޔިތުންނަށް ދިމާވާ ކޮންމެ ހިތާމައެއްގައި، ދަތިކަމެއްގައި އެމްޑީޕީ ރައްޔިތުންގެ ދިފާއުގައި ނުކުންނާނޭ ކަމަށެވެ.
ކަންމިހެން ހުރިއިރު، މިއަދު އެމްޑީޕީ މަގުމައްޗަށް މި ނުކުންނަނީ މި ސަރުކާރުން ރައްޔިތުންނަށް ވި އެއްވެސް ވައުދެއް ނުފުއްދާ، ގައުމު އަނދަވަޅަކަށް ވައްޓާލާތީ އެކަންކަމުން ރައްޔިތުންނާއި ގައުމު ސަލާމަތްކުރުމަށް ކަމަށް ވެސް ވައްޑޭ ވިދާޅުވިއެވެ.
ވައްޑޭ ވިދާޅުވީ މިއަދު ދިވެހި ރައްޔިތުން މަގުމައްޗަށް ނުކުމެ އަޑު ނުއުފުލައިފި ނަމަ ކުރިއަށް އޮތްތަނުގައި ގައުމުގެ ހާލަތު އިތުރަށް ގޯސްވެ، ފުނޑިގެންދާނޭ ކަމަށެވެ. އެހެން ކަމުން މިމަހުގެ 31 ވަނަ ދުވަހު ގައުމާއި ގައުމުގެ ރައްޔިތުންގެ ހައްޤުގައި "ފުދިއްޖެ، ފުނޑިއްޖެ" ހަރަކާތުގައި ހުރިހާ ރައްޔިތުންވެސް ބައިވެރި ވުމަށް ވައްޑޭ ވަނީ ގޮވާލައްވާފައެވެ.
