ރެއާލްގެ ރައީސްކަމުގެ އިތުރު ދައުރަކަށް ޕެރޭޒް!

ސްޕެއިންގެ ގަދަބާރު ރެއާލް މެޑްރިޑުގެ ރައީސްކަމުގައި މިހާރު ވެސް ހުންނެވި ފްލޮރެންޓީނޯ ޕެރޭޒް، އިތުރު ދައުރަކަށް އިންތިޚާބުވެއްޖެ އެވެ.

އުމުރުން މިހާރު 77 އަހަރުވެފައިވާ ޕެރޭޒަށް ރެއާލްގެ ރައީސްކަމުގެ އިތުރު ދައުރެއް ލިބިވަޑައިގެންނެވީ، އިންތިޚާބުގައި ވާދަކުރާނެ އެހެން ކެންޑިޑޭޓަކު ނެތި އެވެ. ރެއާލްގެ އިންތިޚާބުގައި ރައީސްކަމުގެ މަޤާމަށް ކުރިމަތިލެއްވީ ވެސް ޕެރޭޒް އެކަންޏެވެ. އެހެންކަމުން ޕެރޭޒަށް ވަނީ ރެއާލްގެ ރައީސްކަމުގައި އިތުރު ފަސް އަހަރު ހޭދަ ކުރުމުގެ ފުރުސަތު ލިބިފަ އެވެ. ޕެރޭޒްގެ މިދައުރު ހަމަވާނީ 2029 ވަނަ އަހަރު އެވެ.

ރެއާލްގެ ރައީސްކަމުގެ މަގާމަށް އެންމެ ފުރަތަމަ ޕެރޭޒް އިންތިޚާބުވީ 2000 ވަނަ އަހަރު އެވެ. އޭގެ ފަހުން 2006 ވަނަ އަހަރާ ހަމައަށް ރެއާލްގެ ރައީސްކަމުގައި ޕެރޭޒް ހުންނެވި އެވެ. އެ އަހަރުގެ ފެބްރުވަރީ މަހު ޕެރޭޒް ވަނީ ރެއާލްގެ ރައީސްކަމުން އިސްތިއުފާ ދެއްވައިފަ އެވެ. ތިން އަހަރުގެ މެދު ކެނޑުމަކަށްފަހު، އަނެއްކާ ވެސް 2009 ވަނަ އަަހަރު ޕެރޭޒް ވަނީ ރެއާލްގެ ރައީސްކަމަށް އިންތިޚާބުވެ ވަޑައިގެންފަ އެވެ. އޭގެ ފަހުން މިހާރު ޕެރޭޒް އިންތިޚާބުވީ ރެއާލްގެ ރައީސްކަމުގެ ހަތް ވަނަ ދައުރަކަށެވެ.

ޕެރޭޒްގެ ރައީސްކަމުގައި ރެއާލުން ވަނީ މިހާތަނަށް ގިނަ ކާމިޔާބީތަކެއް ހޯދައިފަ އެވެ. އެގޮތުން އޭނާގެ ރައީސްކަމުގައި ރެއާލުން ވަނީ 65 ތަށި ކާމިޔާބު ކޮށްފަ އެވެ.