ސްރީލަންކާގެ އެނަރޖީ މިނިސްޓްރީ އާއި ޗައިނާގެ ސިނޯޕެކް އާ ދެމެދު ކުރެވުނު 3.7 ބިލިއަން ޑޮލަރުގެ އިންވެސްޓްމަންޓެއްގެ އެއްބަސްވުމާއެކު ސްރީ ލަންކާ އަކީ ތެޔޮ އެކްސްޕޯޓު ކުރާ ގައުމަކަށް ވުމުގެ ފުރުސަތު ތަނަވަސްވެއްޖެއެވެ.
މީޑީއާ ރިޕޯޓުތައް ބުނާ ގޮތުގައި މި އެއްބަސްވުމުގެ ދަށުން ހަމްބަންޓޯޓާ ސަރަޙައްދުގައި ދުވާލަކު 200،000 ފީފާ ތެޔޮ އުފެއްދޭ ވަރުގެ އެންމެ ޒަމާނީ ތެޔޮ ސާފުކުރާ ކާރުޚާނާ އެއް ޤާއިމު ކުރެވޭނެ ކަމަށް އެ ގައުމުގެ ރައީސް އޮފީހުގެ މީޑިއާ ޑިވިޜަން (ޕީއެމްޑީ) އިން ބުނެފައިވެއެވެ.
މި ރިފައިނަރީން އުފައްދާ އުފެއްދުންތަކުގެ ބޮޑު ބައެއް އެކްސްޕޯޓް ކުރުމަށް ވަނީ ރޭވިފައިވާ ކަމަށާއި މިކަމުގެ ސަބަބުން ޤައުމަށް ލިބޭ ބޭރު ފައިސާގެ އާމްދަނީ އިތުރަށް އިތުރުވެގެންދާނެ ކަމަށް ވެސް ވަނީ ބުނެފައެވެ.
ޗައިނާއިން ކުރާ މި ބޮޑު އިންވެސްޓްމަންޓުގެ ސަބަބުން ސްރީލަންކާގެ އިޤްތިޞާދީ ދުވެލި އިތުރުވެ، ހަމްބަންޓޯޓާ ސަރަޙައްދުގެ ފަގީރު އާއިލާތަކުގެ ދިރިއުޅުމުގެ ފެންވަރު މަތިވެގެންދާނެ ކަމަށް ބެލެވެއެވެ.
މީގެ އިތުރުން، މި މަޝްރޫޢުގެ ފައިދާ ކުރިއަށް އޮތް ތަނުގައި މުޅި ސްރީލަންކާގެ އާބާދީ އަށް ރަނގަޅު ގޮތުގައި ކުރާނެ ކަމަށް ބެލެވެއެވެ.
