މިސަރުކާރުން ހުރިހާ ކަމެއްވެސް ކުރަނީ ޑީއެންއާރުން ވައްކަންކުރި ބީދައިން - ޒިޔާދު
31 ޖެނުއަރީގައި ނުކުންނަން ޖެހުނީ ޤާނޫނުއަސާސީން ލިބޭ ހައްގުތައް ހޯދަން ކަމަށް އޭނާ ވިދާޅުވި
ވައިކަރަދޫ ދާއިރާގެ މެމްބަރު ހުސެއިން ޒިޔާދު އެމްޑީޕީގެ ކަންމަތީ ޖަލްސާގައި ވާހަކަދައްކަވަނީ
މިސަރުކާރުން ހުރިހާ ކަމެއްވެސް ކުރަނީ ޑީއެންއާރުން ވައްކަންކުރި ބީދައިންކަމަށް ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެއެވެ.
ޒިޔާދު އެފަދައިން ވިދާޅުވީ އެމްޑީޕީގެ ކަންމަތީ ޖަލްސާގައި ވާހަކަަދައްކަވަމުންނެވެ.
އެމްޑީޕީ އަށް ނިސްބަތްވާ ވައިކަރަދޫ ދާއިރާގެ ރައްޔިތުންގެ މަޖިލީހުގެ މެންބަރު ހުސެއިން ޒިޔާދު (ފިއްޓޭ) ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ވައްދަން ފުރި ވަގު ފޯމުގައި ޖަހާފައިވާ ފޮޓޯ އަކީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ޑޭޓާ ބޭސް އިން ނޫން ގޮތަކަށް ލިބޭނެ ފޮޓޯ އެއް ނޫންކަން ވަނީ ޔަގީންވެފައެވެ. އެކަމަށް އިޝާރާތްކުރައްވާ ޒިޔާދު ވިދާޅުވީ ޑީއެންއާރުން ވައްކަންކުރާ ހިސާބަށް ކަންކަން ދިޔައީ ޕީއެންސީއަށް މީހުން ވެއްދުމުގެ މަސައްކަތް މުބާރާތަކަށް ހަދައިގެން ކުރިއަށް ގެންދިއުމުން ކަމަށެވެ. ރަނގަޅު ގޮތުގައި ހިތުން ރުހުމުން ޕީއެންސީ އަށް މީހުން ވަންނާނެ އެއްވެސް ސަބަބެއް މިހާރު ނެތްކަމަށް އޭނާ ވަނީ ވިދާޅުވެފައެވެ.
ތަކުރާރުކޮށް އެތައް ވައުދެއް ރައީސް މުއިއްޒު ވެވަޑައިގަންނަވަމުން ގެންދަވާ ކަމަށާއި އެއިން އެއްވެސް ވައުދެއް ފުއްދޭ މަންޒަރު ނުފެންނަ ކަމަށް އޭނާ ވަނީ ވިދާޅުވެފައެވެ. އެގޮތުން ފްލެޓްތައް ދިނުމުގެ ވައުދާއި، ޓެކްސް އިތުރު ނުކުރުން ފަދަ ވައުދުތައް ވެފައިވާ ގޮތާއި ރައީސް މުއިއްޒުގެ އަމަލުފުޅުތަކާއި މުޅިން ތަފާތުކަމަށް އޭނާ ވިދާޅުވިއެވެ. އޭނާ ވިދާޅުވީ 31ގައި އެމްޑީޕީން ބޮޑު އެއްވުމެއް ބާއްވަން ޖެހުނު ސަބަބަކީ އެފަދަ މައްސަލަތައް އިންތިހާ އަށް އިތުރުވަމުން ކަމަށެވެ. ޑޮލަރުގެ އަގާއި ތަކެތީގެ އަގު އިންތިހާ އަށް އުފުލެމުންދާ ކަމަށް ފާހަގަކުރައްވާ އޭނާ ވިދާޅުވީ އާއްމު ރައްޔިތުން ތިބީ ވަރަށް ނިކަމެތި ހާލަތުގައި ކަމަށެވެ. މީގެ އިތުރުން ދުންފަތުގެ އިސްތިއުމާލުކުރުން މަދުކުރުމަށް ކަމަށް ބުނެ ޤާނޫނަށް ބަދަލުގެނެސްގެން ސަރުކާރުން މަސައްކަތްކުރަނީ ހަމައެކަނި މާލީ ބޭނުމެއްގައި ކަމަށް އޭނާ ވަނީ ސިފަކުރައްވާފައެވެ.
31 ޖެނުއަރީގައި ނުކުންނަން ޖެހުނީ ޤާނޫނުއަސާސީން ލިބޭ ހައްގުތައް ހޯދަން ކަމަށް އޭނާ ވިދާޅުވިއެވެ. ޤައުމުގެ މިސްރާބު ހުރީ މިހާރު ރަނގަޅު ދިމާއަކަށް ނޫންކަމަށް ފާހަގަކުރައްވާ ޒިޔާދު ވަނީ އެކަމާއި މެދު އަޑު އުފުލަން ޖެހޭ ކަމަށް ވިދާޅުވެފައެވެ. އެހެން ނޫންނަމަ މާދަމާ އަޑު އުފުލަން ނުކުންނާނެ ތަނެއް ވެސް ނޮއޮންނަ ހިސާބަށް ކަންކަން ހިނގައިދާނެ ކަަމަށް ފާހަގަކުރައްވާ ޒިޔާދު ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ.
