ދެ ވަނަ ކެރަމް ވެޓަރަންސް މުބާރާތް މި މަހުގެ 29 ގައި

ކެރަމް އެސޯސިއޭޝަން އޮފް މޯލްޑިވްސް އިން އިންތިޒާމު ކޮށްގެން ބާއްވާ، "ކެރަމް ވެޓަރަންސް ޗެމްޕިއަންޝިޕް" ގެ ދެ ވަނަ މުބާރާތް ޖަނަވަރީ މަހުގެ 29 ވަނަ ދުވަހުން ބާއްވަން ނިންމައިފި އެވެ.

ކެރަމް އެސޯސިއޭޝަނުން މިހާރު ވަނީ މުބާރާތުގައި ބައިވެރިވުމުގެ ފުރުސަތު ހުޅުވާލައިފަ އެވެ. މުބާރާތުގައި ބައިވެރިވުމަށް ފޯމު ހުށަހެޅުމުގެ ސުން ގަޑި އަކީ، 2025 ޖަނަވަރީ 26 ވާ އާދީއްތަ ދުވަހުގެ ރޭ 22:00 އެވެ. މުބާރާތުގެ މެޗުތަކުގެ ގުރު ނެގުމަށް ނިންމާފައި ވަނީ ޖަނަވަރީ މަހުގެ 28 ވަނަ ދުވަހު އެވެ.

ވެޓަރަންސް މުބާރާތުގައި ބައިވެރިވެވޭނީ އުމުރުން 40 އަހަރުވެފައިވާ ކުޅުންތެރިންނަށެވެ. ނަމަވެސް އުމުރުން 40 އަހަރުވެފައިވީ ނަމަވެސް، ފާއިތުވި ތިން އަހަރުގެ ތެރޭގައި ފިރިހެން ޤައުމީ ސްކޮޑުގައި ހިމެނިފައިވާ ކުޅުންތެރިން، ފާއިތުވި ތިން ޤައުމީ ކެރަމް މުބާރާތުގެ ފިރިހެން ސިންގަލްސް އިވެންޓުގެ ގަދަ އަށެއްގައި ހިމެނިފައިވާ ކުޅުންތެރިން، އަދި ފާއިތުވި ތިން އެސޯސިއޭޝަން ކަޕް ކެރަމް ޗެމްޕިއަންޝިޕުގެ ފިރިހެން ސިންގަލްސް އިވެންޓުގެ ގަދަ ހަތަރެއްގައި ހިމެނިފައިވާ ކުޅުންތެރިންނަށް ވެޓަރަންސް މުބާރާތުގައި ނުކުޅެވޭނެ އެވެ.

މުބާރާތް ކުރިއަށް ގެންދިޔުމަށް ނިންމާފައިވާ ވަނީ ދެ އިވެންޓަކަށެވެ. އެއީ އޯޕަން ސިންގަލްސް އަދި އޯޕަން ޑަބަލްސް އެވެ.