މޮޅެއް ލިބުމުން އަމޯރިމް ހުރީ ހިތްހަމަ ޖެހިފައި

އުނދަގޫ ޙާލަތެއްގައި އޮތް ނަމަވެސް، މޮޅެއް ލިބުމުން ހިތްހަމަ ޖެހޭ ކަމަށް މެންޗެސްޓަރ ޔުނައިޓެޑުގެ ކޯޗު ރުބެން އަމޯރިމް ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއާ ލީގުގައި ސައުތެމްޓަންއާ ދެކޮޅަށް ޔުނައިޓެޑުން ކުޅުނު މެޗަށްފަހު އެވެ. ޔުނައިޓެޑުގެ އަމިއްލަ ދަނޑުގައި ކުޅުނު އެ މެޗުން މޮޅުވެ، ޔުނައިޓެޑުން ވަނީ ކޮންމެ ވެސް ވަރެއްގެ ހަމަޖެހުމެއް ހޯދައިފަ އެވެ.

އަމޯރިމް ބުނީ އެ މެޗުގައި ފެނުނީ ޔުނައިޓެޑުގެ އެންމެ ފުރިހަމަ އަދި މޮޅު ކުޅުން ނޫން ކަމަށެވެ. ނަމަވެސް މެޗުގެ ނަތީޖާއާ މެދު ވަރަށް ބޮޑަށް ހިތްހަމަ ޖެހޭ ކަމުގައި އޭނާ ބުންޏެވެ. އަމޯރިމް ފާހަގަ ކުރި ގޮތުގައި ޕްރިމިއާ ލީގުގައި ލިވަޕޫލާ ދެކޮޅަށް ކުޅުނު މެޗު އަދި އޭގެ ފަހުން އިނގިރޭސި އެފްއޭ ކަޕްގައި އާސެނަލާ ދެކޮޅަށް ކުޅުނު މެޗަށް ފަހު، ޔުނައިޓެޑުގެ ކުޅުންތެރިން ތިބީ ވަރަށް ބޮޑަށް ވަރުބަލިކަން އިޙުސާސް ކުރެވިފަ އެވެ.

މީގެ އިތުރުން އަމޯރިމް ބުނީ ޚާއްސަކޮށް ސައުތެމްޓަން މެޗުގެ ފުރަތަމަ ހާފަށް ބަލާއިރު ވެސް، ޔުނައިޓެޑުގައި ގިނަ މައްސަލަތަކެއް ހުރި ކަމަށެވެ. އެކަމުގެ ފައިދާ ނަގައި ސައުތެމްޓަން އިން ދިޔައީ ފުރުސަތުގެ ބޭނުން ހިފަމުން ކަމަށް ވެސް އަމޯރިމް ބުނެފައިވެ އެވެ. އެހެން ނަމަވެސް، މެޗުގެ ދެ ވަނަ ހާފުގައި ޔުނައިޓެޑުން ވަނީ އެކަން ވަރަށް ބޮޑަށް ރަނގަޅު ކޮށްފައި ކަމަށާއި، އޭގެ ނަތީޖާއެއްގެ ގޮތުން ފަހަތުން އަރައި މޮޅުވީ ކަމަށް އޭނާ ބުންޏެވެ.

އަމޯރިމް ބުނީ ޔުނައިޓެޑު އޮތީ އުނދަގޫ ޙާލަތެއްގައިކަން އެންމެނަށް ވެސް އިނގޭ ކަމަށާއި، ސައުތެމްޓަން މެޗުން ލިބުނު މޮޅާއެކު އޭނާ އަށް ކޮންމެ ވެސް ވަރެއްގެ ހަމަޖެހުމެއް ލިބިއްޖެ ކަމަށެވެ. އޭނާ ޤަބޫލު ކުރާ ގޮތުގައި މިހާރު ޔުނައިޓެޑު ކުޅެމުން އަންނަ ވައްޓަފާޅީގައި ކުރިއަށް ގޮސް، އެ ޓީމަށް ރަނގަޅު ކަންތައްތަކެއް ކުރެވޭނެ އެވެ.

ޔުނައިޓެޑުގެ ކޯޗުކަމާ އަމޯރިމް ހަވާލުވީ ފަހުން ވެސް އެ ޓީމުގެ ނަތީޖާތައް ރަނގަޅު ނުވާތީ، އޭނާ އަށް އަންނަނީ ފާޑު ކިޔުންތައް އަމާޒުވަމުންނެވެ. އަދި އަމޯރިމް އަށް ޕްރެޝަރު ބޮޑުވާ ކަމަށް ވެސް މީޑިއާ ތަކުގައި ވަނީ ރިޕޯޓުކޮށްފަ އެވެ. މިވަގުތު ޔުނައިޓެޑު އޮތީ އިނގިރޭސި ޕްރިމިއާ ލީގު ތާވަލްގެ 12 ވަނައިގަ އެވެ.