ސަރުކާރު ހިންގާ ޕާޓީގެ މަޖިލިސް މެމްބަރުން ތިބީ ތަޅުއަޅުވާފަ: ފިރުޝާން
ވެރިކަމުގެ ނިޒާމް މިހާރު މިއޮތް ގޮތުން ހުރިހާ އާރަކާއި ބާރެއް އޮތީ ރައީސުލްޖުމްހޫރިއްޔާގެ މުށުތެރޭގައި
ޑިމޮކްރަޓްސްގެ ވަގުތީ ރައީސް އަދި ކުރީގެ މަޖިލިސް މެމްބަރު ހުސެއިން ފިރުޝާން
މި ސަރުކާރު ހިންގާ ސިޔާސީ ޕާޓީ، ޕީއެންސީއަށް ނިސްބަތްވާ ރައްޔިތުން މަޖިލިސް މެމްބަރުން ތިބީ ތަޅު އެޅުވިފައިކަމަށް ދި ޑިމޮކްރެޓްސް ޕާޓީގެ ވަގުތީ ރައީސް ހުސެއިން ފިރުޝާން ވިދާޅުވެއްޖެއެވެ.
ފިރުޝާން މިފަދައިން ވިދާޅުވީ އަންގާރަ ދުވަހުގެ ރޭ ރާއްޖެ ޓީވީން ގެނެސްދިން "ފަލަސުރުޚީ" ޕްރޮގްރާމުގައި ވާހަކަދައްކަވަމުންނެވެ.
މިހާރު މި އޮތް 20 ވަނަ ރައްޔިތުންގެ މަޖިލިސް މެބްރުންނަށް ސަރުކާރު ޖަވާބުދާރީ ކުރުވުމުގައި ހުރި ގޮންޖެހުންތަކަށް އަލި އަޅުވާލައްވައި ފިރުޝާން ވިދާޅުވީ މިއޮތް ސަރުކާރަށް ވެސް މަޖިލީހުގެ ސުޕަމެޖޯރިޓީ ލިބިފައިވާ ކަމަށާއި އެހެން ނަމަވެސް ސަރުކާރު ޕާޓީގެ މެމްބަރުންގެ ގޮތުގައި ތިބެ، ސަރުކާރު ޖަވާބުދާރީ ކުރުމަށް އެ މެމްބަރުންނަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށެވެ.
ފިރުޝާން ވިދާޅުވީ މިހާރު އޮތް ރައްޔިތުންގެ މަޖިލީހަށް ނަޒަރު ހިންގާލައިފި ނަމަ ފެނިގެންދަނީ ވެރިކަން ކުރާ ޕާޓީއަށް ނިސްބަތްވާ ސުޕަ މެޖޯރިޓީ އޮންނަ މަޖިލީހުގެ ހުރިހާ މެމްބަރުންވެސް ވަރަށް ރަނގަޅަށް ތަޅުއެޅުވިފައި ތިބިތަންކަމަށެވެ. އަދި ފަހުން ޤާނޫނު އަސާސީއަށް ގެނައި އިސްލާހާއި އެކު، އިތުރަށް މި ސަރުކާރަށް ތަބާވުން ނޫންގޮތެއް އެ މެމްބަރުންނަށް ނެތް ކަމަށް ވެސް ފިރުޝާން ފާހަގަކުރެއްވިއެވެ.
ފިރުޝާން ވިދާޅުވީ މިހާރު މިއޮތް ވެރިކަން ކުރާ މައި ޕާޓީއަށް ނިސްބަތްވާ މަޖިލީހަކީ ޤާނޫނު އަސާސީ ތަސައްވަރުކުރާ މަޖިލީހެއް ވެސް ނޫން ކަމަށާއި އަދި ރައްޔިތުން ބޭނުންވާ ހަޤީޤީ ރައްޔިތުންގެ މަޖިލީހެއްވެސް ނޫންކަމަށެވެ. އަދި ރައްޔިތުން ބޭނުންވާ މަޖިލީހަކަށް ވުމަށްވެސް އަދި ޤާނޫނު އަސާސީ ގެ މިންގަނޑަށް ފެތޭ މަޖިލީހަކަށް ވުމަށްވެސް މަޖިލިސް މެމްބަރުން މިހާރު ތަޅުއެޅުވިފައި އޮތް އޮތުން އެއްކޮށް ނައްތާލައި މިނިވަން ކަމާއި އެކު ވަކާލާތު ކުރެވޭނެ މެމްބަރުންނަށް ވާންޖެހޭ ކަމަށް ފިރުޝާން ވިދާޅުވިއެވެ.
ފިރުޝާން ވިދާޅުވީ ރައްޔިތުންގެ މަޖިލީހަށް އޮންނަ އެންމެ ބޮޑު މެންޑޭޓަކީ ޤާނޫނުތައް ހެދުންކަމަށާއި އަދި ދެވަނައަށް އޮންނަ އެންމެ ބޮޑު މެންޑޭޓަކީ އޭރަކު އޮންނަ ސަރުކާރު ޖަވާބުދާރީ ކުރުންކަމަށެވެ. އެގޮތުން މަޖިލީހަށް އޮންނަ މި މެންޑޭޓުތަށް ފުރިހަމަކުރުމަށް މިހާރު މިއޮތް ބިރުވެރިކަމާއި ތަޅުއެޅުވުމުން މިނިވަން ވެގެން ތިބެންޖެހޭ ބަޔަކަށް މަޖިލިސް މެމްބަރުން ވާން ޖެހޭކަމަށް އޭނާ ވިދާޅުވިއެވެ.
މީގެ އިތުރުން ފިރުޝާން ވިދާޅުވީ ހަޤީޤީ ރައްޔިތުންގެ މަޖިލީހަކީ ސަރުކާރުގެ ކަންކަން ގޯސްކޮށް ދާނަމަ އެކަންކަން ފާހަގަކޮށް ސަރުކާރު ޖަވާބުދާރީ ކުރުވުމާއި ރައްޔިތުންގެ ބޭނުންތައް ފުއްދައިދިނުމަށް ވަކާލާތުކޮށް އެގޮތަށް މަސައްކަތް ކުރާ މަޖިލީހެއްކަމަށެވެ. އެކަން އެގޮތަށް ވުމަށް އަމިއްލަ ނަފުސު މިނިވަން މީހަކަށް ވާން ޖެހޭކަން ފިރުޝާން ފާހަގަކުރިއެވެ.
މީގެ އިތުރުން މިހާރު މިއޮތް ވެރިކަމުގެ ނިޒާމް ބަދަލުކުރަން ޖެހޭކަން ފާހަގަކުރައްވާ ފިރުޝާން ވިދާޅުވީ ވެރިކަމުގެ ނިޒާމް މިހާރު މިއޮތް ގޮތުން ހުރިހާ އާރަކާއި ބާރެއް އޮތީ ރައީސުލްޖުމްހޫރިއްޔާގެ މުށުތެރެއަށް ލެވިފައިކަމަަށާއި ހުރިހާކަމެއްވެސް ރައީސުލްޖުމްހޫރިއްޔާ އާއި ހަމައިން ހުއްޓިފައިކަމަށެވެ. އެގޮތުން ރައީސުލްޖުމްހޫރިއްޔާ ނުރުހުންވެދާނެތީ އެއްވެސް ކަމެއް މިއަދު ކުރެވެން ނެތްކަމަށާއި އެހެންކަމުން ސަރުކާރުގެ މިހާރު މި އޮތް އޮނިގަނޑު ބަދަލުކުރުމަކީ މިއަދު ކުރަން ޖެހިފައިވާ ކަމެއް ކަމަށެވެ. އަދި އެކަން ނުކޮށް ރާއްޖެއަށް ހަމަޖެހުމެއް ނެތްކަމަށް ވެސް ފިރުޝާން ވިދާޅުވިއެވެ.
