ވެރިފައި ކުރާނީ ފްލެޓު ލިބުނު 4000 މީހުންގެ ފޯމުތައް އެކަނި: ސަރުކާރު

ދެން ވެރިފައި ކުރާނީ ގެދޮރުވެރިޔާ ސްކީމުގެ ދަށުން ފްލެޓު ލިބުނު 4000 މީހުންގެ ފޯމުތައް އެކަނި ކަމަށް ސަރުކާރުން ބުނެފި އެވެ.

ސަރުކާރުން މިފަދައިން ހާމަކުރީ ފްލެޓް ލިސްޓުގެ ސައްޚަކަން ވެރިފައި ކުރާކަަމަށް ބުނިތާ އަހަރެއް ފާއިތުވިފަހުން، ރައީސް އޮފީހުގައި އަންގާރަ ދުވަހު ކުރިއަށް ދިއަ ނޫސްވެރިންގެ ބައްދަލުވުމުގައެވެ. މި ބައްދަލުވުމުގައި ނޫސްވެރިންނަށް މައުލޫމާތު ދެއްވީ ހައުސިން އެންޑް ކޮންސްޓްރަކްޝަން މިނިސްޓަރު އަބްދުﷲ މުއްތަލިބެވެ.

މިނިސްޓަރު އަބްދުﷲ މުއްތަލިބު ވިދާޅުވީ، ގެދޮރުވެރިޔާ ސްކީމަށް ހުށަހަޅާފައިވާ އެންމެންގެ ފޯމުތައް ވެރިފައި ނުކުރަން ނިންމާފައިވާ ކަމަށާއި ދެން ވެރިފައި ކުރާނީ ފްލެޓު ލިބުނު 4000 މީހުންގެ ފޯމުތައް އެކަނި ކަމަށެވެ.

ފޯމުތަކުގެ ސައްހަކަން ކަށަވަރު ކުރާނީ ފްލެޓު ދޫކުރާ އުސޫލާއި ގެދޮރުވެރިޔާ ޕޯޓަލްގައި ދީފައިވާ އިރުޝާދުތަކަށް އެކަނި ކަމަށް ވެސް އޭނާ ވިދާޅުވި އެވެ. އެހެންކަމުން ފޯމުގައި ހުށަހަޅަން ބުނެފައިވާ ލިޔުންތައް ފިޔަވައި އިތުރު ލިޔުމެއް ހުށަހަޅާފައިވާ ނަމަ ފޯމު ވެރިފައި ކުރާއިރު އެ ލިޔުމަށް ނުބަލާނެ އެވެ.

މިނިސްޓަރ މުއްތަލި ވިދާޅުވީ މި ވެރިފިކޭޝަން ޕްރޮސެސް ކުރިއަށްދާއިރު ބަލާނީ 2022 ވަނަ އަހަރުގެ ޖޫން މަހުގެ 26 ވަނަ ދުވަހު، ގެޒެޓް ކުރެވުނު "ގެދޮރުވެރިޔާ" ސްކީމްގެ ފްލެޓް ދޫކުރާ އުސޫލު G20/2022 އަށްކަމަށާއި އަދި އެޕްލިކޭޝަން ހުށަހެޅުމަށް ތައްޔާރުކޮށްފައިވާ ގެދޮރުވެރިން ޕޯޓަލްގައި ދީފައިވާ އިރުޝާދުތަކަށްކަމަށެވެ.

ލިސްޓުގެ ޞައްޙަކަން ކަށަވަރުކުރުމުގެ މަރުޙަލާގައި، މާލޭގައި ދިރިއުޅުމުގެ މުއްދަތަށް އައި މެދުކެނޑުމެއްގެ ވާހަކަ ބަޔާންކޮށްފައި ނުވާތީ، އެފަދަ މެދުކެނޑުމެއް ކަމުގައި ބެލެވޭނީ އެއް އަހަރަށްވުރެ ދިގު މުއްދަތަކަށް މެދުކެނޑިފައިވާނަމަ ކަމަށް މުއްތަލިބު ވިދާޅުވިއެވެ

މުއްތަލިބު ވިދާޅިގޮތުން ނަމަ އެގޮތަށް ނިންމެވީ، މާލޭގައި ދިރިއުޅުމުގެ މުއްދަތު މެދުކެނޑުމުގެ ސަބަބުން ބައެއް ފަރާތްތަކުގެ ޝަރުތު ފުރިހަމަ ނުވެދާނެކަމަށް ފެންނާތީ، ވީހާވެސް ގިނަ ބަޔަކަށް ލިސްޓުން ފުރުސަތު ދިނުމުގެ މަޤްޞަދުގައި އެވެ.

މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފްލެޓު ދިނުމަށެވެ. އަދި ފުރަތަމަ ނިމޭ 4،000 ފްލެޓު ހަވާލުކުރަން ބުނީ އޭގެ ތެރެއިން އެންމެ މަތިން މާކްސް ލިބުނު މީހުންނަށެވެ.