އެމްޑީޕީއަކީ އަޅުގަނޑުގެ ދަރިއެއް ފަދަ ޕާޓީއެއް: ރައީސް ނަޝީދު
"ޕާޓީއެއްގައި ޢަމަލީ މަސައްކަތް ކުރާކަށް މިވަގުތު އަޅުގަނޑު ނެތިން"
ކުރީގެ ރައީސް ސާލިހާއި، ކުރީގެ ރައީސް ނަޝީދު
އެމްޑީޕީ އަކީ އެމަނިކުފާނުގެ "ދަރިއެއްފަދަ ޕާޓީއެއް" ކަމަށް ރައީސް ނަޝީދު ވިދާޅުވެއްޖެއެވެ.
އެކްސްގައި ހޯމަ ދުވަހު ކުރެއްވި ޕޯސްޓެއްގައި ނަޝީދު ވިދާޅުވީ، އެމަނިކުފާނުގެ ހަޔާތުގެ ބޮޑު ބައެއް ހޭދަކުރެއްވީ ދިވެހިރާއްޖޭގައި ގިނަ ޕާޓީ އެކުލެވޭ ނިޒާމެއް ޤާއިމް ކުރުމުގެ މަސައްކަތުގައި ކަމަށާއި، ޤައުމެއްގެ ތަރައްޤީއަށް، ރައްޔިތުންގެ ތަނަވަސްކަމަށް އެންމެ ބޭނުންތެރި އެއް ވަސީލަތަކީ ވާދަވެރި ސިޔާސީ ހަރަކާތްކަމުން، 2008 ގެ އިންތިޚާބަށް ފަހުގައި ސަރުކާރުގެ އާމްދަނީ އިތުރުވެ ދިޔަ މިންވަރުން، އަދި އެ އާމްދަނީއިން ކުރެވުނު ޢުމްރާނީ މަސައްކަތާއި، ރައްޔިތުންނަށް ހޯދައިދެވުނު އިޖްތިމާޢީ ރައްކާތެރިކަމުން ބުނެދެނީ ގިނަ ޕާޓީ އެކުލެވޭ ނިޒާމުގެ ފައިދާ ކަމަށެވެ. "އަޅުގަނޑަކީ އެއްވެސް ސިޔާސީ ޕާޓީއަކާއި އިދިކޮޅު ވާނެ މީހެއް ނޫން. އެމްޑީޕީއަކީ އަޅުގަނޑުގެ ދަރިއެއް ފަދަ ޕާޓީއެއް. އެ ޕާޓީ ވަރުގަދަވެ އޮތުން އެއީ އަބަދުވެސް އަޅުގަނޑު އެދޭނެ ކަމެއް." ކުރީގެ ރައީސް ވިދާޅުވިއެވެ.
އެމަނިކުފާނު އިތުރަށް ވިދާޅުވި ގޮތުގައި ފަހުން އެމަނިކުފާނު ބައިވެރިވެވަޑައިގެންނެވި ޑިމޮކްރަޓްސް އަކީ ޚާއްޞަ ގޮތެއްގައި ޒުވާނުންނަށް ސިޔާސީ މަސައްކަތުގައި ބައިވެރިވުމަށް ލިބުނު ފުރުސަތެއް ކަމަށެވެ.
"މީގެން އެއްވެސް ޕާޓީއެއްގައި ޢަމަލީ މަސައްކަތް ކުރާކަށް މިވަގުތު އަޅުގަނޑު ނެތިން، އެހެންނަމަވެސް ރާއްޖޭގެ ސިޔާސީ ހަރަކާތުން މުޅިން ދުރުވާކަށްވެސް ނެތިން." ނަޝީދު ވިދާޅުވެފައިވެއެވެ.
