ރާއްޖޭގެ ހާލަތު އޮތްގޮތުން މަގުމަތީ ހަރަކާތަށް ނުނުކުމެ ތިބުން އެއީ ކުރަން ހެޔޮވާ ވަރު ކަމެއް ނޫން - ޝިފާޒް
ގާނޫނު އަސާސީގެ ދިފާއުގައި އެމްޑީޕީން މަގުމައްޗަށް ނުކުންނަން އެ ޕާޓީގެ ގައުމީ މަޖިލީހުން ވަނީ ޖެނުއަރީ މަހުގެ 9 ވަނަ ދުވަހު ފާސްކޮށްފަ
އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް
ރާއްޖޭގެ ހާލަތު އޮތްގޮތުން މަގުމަތީ ހަރަކާތަށް ނުނުކުމެ ތިބުން އެއީ ކުރަން ހެޔޮވާ ވަރުގެ ކަމެއް ނޫން ކަމަށް އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް ވިދާޅުވެއްޖެއެވެ.
ޝިފާޒު މިފަދައިން ވިދާޅުވީ ހޯމަ ދުވަހުގެ ހެނދުނު ރާއްޖެ ޓީވީގެ ފަށާއިރު ޕްރޮގްރާމްގެ ޚާއްސަ މެހުމާނެއްގެ ގޮތުގައި ބައިވެރިވެ ވަޑައިގެން ވާހަކަ ދައްކަވަމުންނެވެ.
ގާނޫނު އަސާސީގެ ދިފާއުގައި އެމްޑީޕީން މަގުމައްޗަށް ނުކުންނަން އެ ޕާޓީގެ ގައުމީ މަޖިލީހުން ވަނީ ޖެނުއަރީ މަހުގެ 9 ވަނަ ދުވަހު ފާސްކޮށްފައެވެ. އިދިކޮޅު މައި ސިޔާސީ ޕާޓީ، އެމްޑީޕީން މަގުމައްޗަށް ނުކުންނަން ފާސްކުރީ އެ ޕާޓީން ބުދަ ދުވަހުގެރޭ ބޭއްވި ގައުމީ މަޖިލީހަށް ހުށަހަޅައި ފާސްކޮށްގެންނެވެ. މި ބައްދަލުވުމުގައި ރިޔާސަތުން ހުށަހެޅީ 31 ޖެނުއަރީގައި "ގާނޫނުއަސާސީގެ ދިފާއުގައި" މަގުމައްޗަށް ނުކުތުމަށެވެ. ފަށާއިރު ޕްރޮގްރާމްގައި ވާހަކަދައްކަވަމުން ޝިފާޒް ވަނީ މަގުމަތީގެ ހަރަކާތްތައް މިވަގުތު މުހިންމުކަމަށް ޤަބޫލުކުރައްވާ ސަބަބު ތަފްސީލްކޮށް ހާމަކޮށްދެއްވާފައެވެ.
ރާއްޖޭގެ ޤާނޫނުއަސާސީން ލިބޭ އެންމެ މުހިންމު އެއް ހައްގަކީ ޚިޔާލުފާޅުކުރުމާއި ޖަވާބުދާރީކުރުވުމުގެ ބާރުކަމަށް ޝިފާޒް ވަނީ ވިދާޅުވެފައެވެ. އަދި އެފަދަ ސިޔާސީ ހަރަކާތެއް ހިންގާ އިރު ބައެއް ފަހަރު ދަތި އުނދަނގޫތަކާއި ދިމާވާ ކަމަށް ފާހަގަކުރައްވާ ޝިފާޒް ވަނީ އެއީ ބަލަންޖެހޭ ކަމެއް ކަމަށް ވިދާޅުވެފައެވެ. އެހެންނަމަވެސް މިއަދު ވާ ދައްޗަށް ވުރެ މާދަމާ ވާނެ ދަތި މާ ގޯސް ކަމަށް ޤަބޫލުކުރައްވާ ކަމަށް ޝިފާޒް ވިދާޅުވިއެވެ. އެހެންކަމުން މިއަދު ދިމާވާ ދަތިތަކާއި އެކު ވެސް އެ ހަރަކާތް ހިންގުން މުހިންމު ކަމަށް ޝިފާޒް ވަނީ ފާހަގަކުރައްވާފައެވެ. ޝިފާޒް ވިދާޅުވީ ރާއްޖޭގެ ރައްޔިތުންގެ ކަންބޮޑުވުންތައް އޮތްކަން ސަރުކާރަށް އެނގެންޖެހޭ ކަމަށެވެ. އަދި ރައްޔިތުންނަށް ލިބިދީފައިވާ އެފަދަ މުހިންމު ހައްގެއް ނަގާލައިގެން ނުވާނެ ކަމަށް ވެސް ޝިފާޒް ވިދާޅުވިއެވެ.
އެމްޑީޕީގެ މި އެއްވުން އިއުލާންކޮށްފައި ވަނިކޮށް ރައީސް މުއިއްޒު ވަނީ މަސްލަހަތު ނަގާލުމަށް ޖާގަ ނުދެއްވާނެ ކަމަށް ވިދާޅުވެފައެވެ. އެކަމަށް އިޝާރާތްކުރައްވާ ޝިފާޒް ވިދާޅުވީ މަސްލަހަތު އޮތްގޮތަކީ މަގުމައްޗަށް ނުކުތުން ކަމަށް ވިދާޅުވެފައެވެ. ރައީސަކަށް ހުންނަވައިގެން ރައީސް މުއިއްޒު ގެންދަވަނީ ރާއްޖޭގެ މަސްލަހަތު ނަގާލަމުން ކަމަށް ވެސް ޝިފާޒް ވަނީ ވިދާޅުވެފައެވެ. ރާއްޖޭގެ ރައްޔިތުންގެ ފައިސާ ބަލަހައްޓަން ހަވާލުކުރުމުން އެ މަސްލަހަތު ވެސް ރައީސް ހިފަހައްޓަވާ ނުދެއްވި ކަަމަށް ޝިފާޒް ވިދާޅުވިއެވެ. އެހެންކަމުން އެއަށް ވުރެ ބޮޑަށް ރައްޔިތުންގެ މަސްލަހަތު ނަގާލެވޭނެ ކަމެއް ނެތްކަމަށް އޭނާ ވިދާޅުވިއެވެ.
އެމްޑީޕީން ވަނީ ސަރުކާރު ޖަވާބުދާރީކުރުމަށްޓަކައި "ގާނޫނުއަސާސީގެ ދިފާއުގައި" ނަމުގައި މިދިޔަ ޑިސެމްބަރު މަހުގައި ވެސް ބޮޑު ޖަލްސާއެއް ބާއްވާފައެވެ. ކާނިވަލުގައި ބޭއްވި މި ޖަލްސާއަކީ އެމްޑީޕީން އިދިކޮޅުގައި ތިބެގެން ސަރުކާރު ޖަވާބުދާރީކުރުމުގެ މަސައްކަތް ފެށިފަހުން އެމްޑީޕީން ބޭއްވި އެންމެ ބޮޑު ޖަލްސާއެވެ.
