ދެ ވެރިންގެ ބައްދަލުވުމާ ބެހޭ ގޮތުން ޓްރަމްޕް ދެއްކެވި ވާހަކަފުޅު ރަޝިޔާ އިން ދޮގުކޮށްފި

އެމެރިކާގެ ރައީސްކަމަށް އިންތިޚާބުވެފައިވާ ޑޮނަލްޑް ޓްރަމްޕް އޭނާ އާއި ރަޝިޔާގެ ރައީސް ވުލެޑިމިއަރ ޕުޓިންއާ ދެމެދު ބައްދަލުވުމެއް އިންތިޒާމު ވަމުންދާ ކަމަށް ވިދާޅުވެ ދެއްކެވި ވާހަކަފުޅު ރަޝިޔާ އިން ދޮގު ކޮށްފިއެވެ. ރަޝިޔާގެ ނޫސް އިންޓަރފެކްސްގައިވާ ގޮތުން، ޕުޓިންގެ ސްޕޯކްސްޕަރސަން ވިދާޅުވެފައިވަނީ ބައްދަލުވުމެއް ހަމަޖެއްސުމަށް އެދި މޮސްކޯ އަށް ހުށަހަޅާފައި ނުވާ ކަމަށެވެ.

ޖެނުއަރީ 9 ވަނަ ދުވަހު މާރ-އަ-ލާގޯގައި ރިޕަބްލިކަން ޕާޓީގެ ގަވަރނަރުންނާ ބައްދަލުކުރެއްވުމުގެ ކުރިން ދެއްވި ބަޔާނެއްގައި ޓްރަމްޕް ވިދާޅުވެފައިވަނީ، "އޭނާ (ޕުޓިން) ބައްދަލުކުރައްވަން ބޭނުންވޭ. އަދި އެކަން ހަމަޖައްސަމުން މިދަނީ." އޭގެ އިތުރަށް ވިދާޅުވީ ރައީސް ޕުޓިން ބައްދަލުކުރައްވަން ބޭނުންވާ ކަމަށާއި އޭނާ އެވާހަކަ ވަނީ ޢާންމުކޮށް ވެސް ވިދާޅުވެފައި ކަމަށެވެ. އަދި އެ ހަނގުރާމަ ނިންމަން ޖެހޭ ކަމަށާއި އެއީ ލޭއޮހޮރުވުން ބޮޑު ހަމަނުޖެހުމެއް ކަމަށްވެސް ޓްރަމްޕް ވިދާޅުވިއެވެ.

އޭގެ ދެ ދުވަސް ކުރިން، ޖެނުއަރީ 7 ވަނަ ދުވަހު ޓްރަމްޕްގެ ފްލޮރިޑާ ރިސޯޓުގައި ބޭއްވި ނޫސްވެރިންގެ ބައްދަލުވުމުގައި، ޕުޓިންއާ ބައްދަލުކުރެއްވުމާ ބެހޭގޮތުން ސުވާލެއް ދެންނެވުމުން، ޓްރަމްޕް ވަކި ތާރީޚެއް ދެއްވުމަށް އިންކާރުކުރެއްވި ނަމަވެސް ވިދާޅުވެފައިވަނީ، "އެނގޭ ޕުޓިން ބައްދަލުކުރައްވަން ބޭނުންވާކަން، 20 ވަނަ ދުވަހުގެ ކުރިން ބައްދަލުކުރުމަކީ އެކަށީގެންވާ ކަމެއް ނޫން،" ކަމަށެވެ.

ޕުޓިން އާއެކު ބައްދަލުވުމެއް އޮންނާނެ ކަމަށް ޓްރަމްޕް ވިދާޅުވުމާ ގުޅިގެން، ޖެނުއަރީ 9 ވަނަ ދުވަހު ކްރެމްލިންގެ ތަރުޖަމާނު ޑްމިޓްރީ ޕެސްކޮވް ވިދާޅުވެފައިވަނީ އެކަމަށް އެދި ހުށަހަޅާފައި ނުވާ ކަމަށެވެ.

"ނޫން، އެއްވެސް ރިކުއެސްޓެއް ލިބިފައެއް ނުވޭ."

"މަޤާމާ ހަވާލުވެވަޑައިގަތުމަށްފަހު، އެންމެ މަތީ ފެންވަރުގައި ވާހަކަތައް އަލުން ފެށުމަށް ސިޔާސީ ޝައުގު އޮތްނަމަ، އޭރުން، ޔަގީނުން ވެސް ރައީސް ޕުޓިން އެކަމަށް މަރުޙަބާ ކިޔުއްވާނެއެވެ. ވާހަކަދެއްކުމަށް ތައްޔާރަށް ހުންނެވި ކަމާއި ވާހަކަދެއްކުމުގެ މުހިންމުކަމާ ބެހޭގޮތުން ތަކުރާރުކޮށް ޕުޓިން ވާހަކަފުޅު ދައްކަވާފައިވެއެވެ." ތަރުޖަމާނު ވިދާޅުވިއެވެ.

މިއީ ޓްރަމްޕްގެ ބަޔާންތައް ކްރެމްލިނުން ދޮގުކުރި އެންމެ ފަހުގެ މިސާލެވެ. 2024 ވަނަ އަހަރުގެ އިންތިޚާބު ޓްރަމްޕް ކާމިޔާބު ކުރެއްވުމަށްފަހު، އޭނާ ވިދާޅުވެފައިވަނީ ރަޝިޔާގެ ރައީސްއާ ފޯނުން ވާހަކަދައްކަވައި، ޔޫރަޕްގައި ސުލްޙަ ޤާއިމުކުރުމާ ބެހޭގޮތުން މަޝްވަރާކުރައްވައި، ހަނގުރާމަ އިތުރަށް ގޯސްވިޔަ ނުދިނުމަށް އެދިވަޑައިގެންނެވި ކަމަށެވެ.

ނަމަވެސް، އިންތިޚާބަށްފަހު ޓްރަމްޕާއި ޕުޓިން ފޯނުން ވާހަކަދެއްކެވި ކަމުގެ ރިޕޯޓުތައް ކްރެމްލިނުން ދޮގުކޮށް، ޕެސްކޮވް ވިދާޅުވެފައިވަނީ، "މިއީ މުޅިން ދޮގެކެވެ. މިއީ ހަމަ ހިޔާލީ ވާހަކައެކެވެ؛ މިއީ ހަމަ ދޮގު މަޢުލޫމާތެކެވެ." އޭނާ އިތުރަށް ވިދާޅުވެފައިވަނީ "އެއްވެސް ވާހަކަ ދެކެވުމެއް ނުހިނގައެވެ."

ދެ ލީޑަރުން އަވަހަށް ބައްދަލުކުރައްވާނެތޯ އެހުމުން، އޭނާ ވިދާޅުވެފައިވަނީ "އަދި ވަކި ޕްލޭނެއް ނެތެވެ."