ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒް ހިމެނޭހެން އެ ޕާޓީގެ އިސް ބައެއް މީހުން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ސޮއިކޮށްފިއެވެ.

އިތުބާރު ހުރި މަސްދަރަކުން ރާއްޖެއެމްވީ އަށް މައުލޫމާތުދެއްވަމުން ވިދާޅުވީ ޝިފާޒްގެ އިތުރުން ޑިމޮކްރެޓްސްގެ ކައުންސިލްގައި ހިމެނިވަޑައިގަންނަވާ ރައްޔިތުންގެ މަޖިލީހުގެ ކުރީގެ މެމްބަރު އަލީ އާޒިމް އާއި ނިމިދިޔަ ސަރުކާރުގެ ގްރޭޓާ މާލެ ކުންފުނީގެ މެނޭޖިން ޑިރެކްޓަރުކަން އަދާކުރައްވާފައިވާ އިބްރާހިމް ރަޝީދު (މާމިގިލީ އިބޫ) ވެސް އެމްޑީޕީ އަށް ސޮއިކޮށްފައިވާ ކަމަށެވެ.

އެނގިފައިވާ ގޮތުގައި މި ތިން ބޭފުޅުން އެމްޑީޕީ އަށް ސޮއިކުރައްވާފައި ވަނީ ހުކުރު ދުވަހުގެ ރޭގެ ވަގުތެއްގައެވެ.

މި ތިން ބޭފުޅުންގެ އިތުރުން އެމްޑީޕީ ސަރުކާރުގެ އެސްޓީއޯގެ ފުރަތަމަ މެނޭޖިން ޑިރެކްޓަރު ހުސައިން އަމްރު ވެސް ވަނީ އެމްޑީޕީ އާއި އަލުން ގުޅިވަޑައިގަންނަވާފައެވެ. މީގެ އިތުރުން ކުރިއަށް އޮތް ހަފްތާގެ ތެރޭގައި ޑިމޮކްރެޓްސްގެ އިސް އެހެން ބައެއް ފަރާތްތަކުން ވެސް އެމްޑީޕީ އަށް ސޮއިކުރުމަށް ހަމަޖެހިފައިވާ ކަމަށް ވަނީ މައުލޫމާތު ލިބިފައެވެ. އެގޮތުން އެމްޑީޕީ އަށް ސޮއިކުރާ މީހުންގެ ތެރޭގައި ޑިމޮކްރެޓްސްގެ ކައުންސިލް މެމްބަރުންނާއި، މަޖިލީހުގެ މެމްބަރުކަން ކުރިން ކުރައްވާފައިވާ ބޭފުޅުން ހިމެނެއެވެ.

ޑިމޮކްރެޓްސް އުފެއްދީ އެމްޑީޕީގައި އުފެދުނު ދެބަސްވުންތަކަށް ފަހު 2023ގައެވެ. އެހެންނަމަވެސް ފަހަކަށް އައިސް މި ދެ ޕާޓީން އައީ ނުރަސްމީ ސިފައެއްގައި އެކުގައި މަސައްކަތްކުރަމުންނެވެ. ޚާއްސަ ގޮތެއްގައި ޤާނޫނުއަސާސީގެ ދިފާއުގައި އެ ދެ ޕާޓީން އެއް ޕްލެޓްފޯމެއްގައި މަސައްކަތްކުރަމުން އައިސްފައިވާކަން ވަނީ ފާހަގަކުރެވިފައެވެ. މި ދަނޑީވަޅަކީ ވެސް ޤާނޫނުއަސާސީގެ ދިފާއުގައި ބޮޑު އެއްވުމެއް ބޭއްވުމަށް އެމްޑީޕީން ތައްޔާރުވަމުންދާ ދަނޑިވަޅެކެވެ.

ޑިމޮކްރެޓްސްގެ އިސް ބައެއް ބޭފުޅުން އެމްޑީޕީ އަށް ސޮއިކުރަމުންދާ އިރު އެ ޕާޓީގެ އިސް ބައެއް ބޭފުޅުން، ކުރީގެ ރައީސް އިބްރާހިމް މުހައްމަދު ޞާލިހު އާއި ޑިމޮކްރެޓްސްގެ އިސް ބައެއް ބޭފުޅުން ބައްދަލުކުރައްވާފައިވާކަން މި ނޫހަށް ވަނީ ކަށަވަރުވެފައެވެ.