ވެނެޒުއެލާގެ ރައީސް ނިކޮލާސް މަދޫރޯ ހައްޔަރުކުރުމަށް ނުވަތަ އޭނާގެ މައްޗަށް ކޮށްފައިވާ ތުހުމަތު ތަކުގެ ދަޢުވާ ސާބިތުކުރުމަށް މަގުފަހިކޮށްދޭ މަޢުލޫމާތަކަށް 25 މިލިއަން ޑޮލަރުގެ އިނާމެއް ދޭނެކަމަށް އެމެރިކާއިން އިޢުލާންކޮށްފި ކަމަށް ބީބީސީން ރިޕޯޓުކޮށްފިއެވެ.
ހުކުރު ދުވަހު އެމެރިކާ އިން މި އިޢުލާން ކޮށްފައިވަނީ މަދޫރޯ ވެނެޒުއެލާގެ ރައީސްކަމުގެ އިތުރު ދައުރަކަށް ހުވާކުރެއްވި ދަނޑިވަޅާ ދިމާކޮށެވެ.
2013 ވަނަ އަހަރު ވެނެޒުއޭލާގެ ސޯޝަލިސްޓު އައިކަން ހިއުގޯ ޗާވެޒްގެ ފަހަތުން ވެރިކަމަށް އައުމަށް ޗާވެޒް އިޚްތިޔާރުކުރި މަދޫރޯ އަކީ ވެނެޒުއެލާ އިޤްތިޞާދީ ހަލާކެއްގެ ތެރެއަށް ވެއްޓިގެން ދިއުމުގެ ޒިންމާ އުފުލަންޖެހޭ ފަރާތް ކަމަށް އޭނާ އާ އިދިކޮޅު ފަރާތްތަކުން ދެކެއެވެ. ކޮރަޕްޝަނާއި، އިންސާނީ ޙައްޤުތައް ނިގުޅައިގަތުމާއި، މަސްތުވާތަކެތީގެ ވިޔަފާރީގެ ތުހުމަތުތަކާ ކުރިމަތިލައްވަން ޖެހިފައިވާ މަދޫރޯ، އޭނާގެ ބާރު ހިފެހެއްޓުމަށް ބާރުގެ ބޭނުން ކޮށްގެން އިދިކޮޅު ފަރާތްތައް ނައްތާލުމަށް މަސައްކަތް ކުރާ ކަމުގެ ތުހުމަތުވެސް ވަނީ ކުރެވިފައެވެ.
އެމެރިކާގެ މި އިނާމަކީ މަދޫރޯގެ ވެރިކަން ނިމުމަކަށް ގެނައުމަށާއި، ޑިމޮކްރަސީ އަނބުރާ ގެނައުމަށް އިދިކޮޅު ފަރާތްތަކުން ކުރަމުންދާ މަސައްކަތަށް ބާރުދިނުމަށް އަލުން ފެށިފައިވާ މަސައްކަތެއްކަން ރިޕޯޓުތަކުގައި ވެއެވެ.
ރަޝިޔާ ހިމެނޭ ގޮތުން މަދު ޤައުމަކުން ނޫނީ، ވެނެޒުއެލާގައި ޖުލައި މަހު ބޭއްވުނު އިންތިޚާބު މަދޫރޯ ކާމިޔާބުކުރެއްވި ކަމަށް ބަލައިގެންފައެއް ނުވެއެވެ.
އަނެއްކޮޅުން، އެމެރިކާ އާއި ޔޫރަޕިއަން ޕާލަމެންޓުން އެޑްމުންޑޯ ގޮންޒާލެޒް އަކީ "އިންތިޚާބުވެފައިވާ ރައީސް" ކަމަށް އިޢުލާންކޮށްފައިވާތީ، މަދޫރޯގެ ވެރިކަމަށް އިތުރު ގޮންޖެހުންތައް ވަނީ ކުރިމަތިވެފައެވެ.
އިންތިޚާބު ކާމިޔާބު ކުރި ކަމަށް ހުޅަނގުގެ ގައުމުތަކުން ބަލައިގެންފައިވާ ގޮންޒާލެސް ފިލައިގެން ވަނީ ސްޕެއިނަށް ގޮސްފައެވެ. ސެޕްޓެމްބަރު މަހު ސްޕެއިނަށް ފިލައިގެން ދިޔަ ގޮންޒާލެޒް ހައްޔަރުކުރުމަށް 100،000 ޑޮލަރުގެ އިނާމެއް ދޭނެކަމަށް ވެނެޒުއެލާގެ އިސްވެރިން އިޢުލާންކޮށްފައިވެއެވެ.
މަދޫރޯގެ ސަރުކާރުން ޤައުމުން ބޭރަށް ފިލައިގެން ގޮސް އުޅޭ ސިޔާސީ އިސްފަރާތްތަކުގެ "ވޯންޓެޑް" ނޯޓިހެއް ނެރެފައިވެއެވެ.
ގޮންޒާލެޒް ވެސް ބުނެފައިވަނީ ޖުލައި މަހުގެ އިންތިޚާބު ކާމިޔާބުކުރީ އޭނާކަމަށެވެ. 75 އަހަރުގެ ގޮންޒާލެޒް ވަނީ ރައީސްކަމުގެ ހުވާކުރުމަށް ވެނެޒުއެލާއަށް އެނބުރި ދާނެކަމަށް ވަޢުދުވެފައެވެ.
