ޕެރިސް ހިލްޓަން އާއި ބިލީ ކްރިސްޓަލްގެ ގެވެސް އަނދައިފި

ކެލިފޯނިއާގެ ލޮސްއެންޖެލެސް ގައި ރޯވަމުންދާ އަލިފާނުގެ ސަބަބުން އެތައް ހާސް އިމާރާތްތަކެއް އަނދާ ހުލިވެފައިވާއިރު އޭގެ ތެރޭގައި މަޝްހޫރު ފިލްމީ ތަރިންނާއި މަހުޖަނުންގެ އަގުބޮޑު ގެތައްވެސް ހިމެނެއެވެ.

އޭގެ އިތުރުން ސަރަހައްދުން ރައްކާތެރި ސަރަހައްދުތަކަށް ގެންދެވުނު މީހުންގެ ތެރޭގައި ވެސް ހޮލިވުޑްގެ މަޝްހޫރު ތަރިން ހިމެނެއެވެ.

ފިލްމީ ތަރިންނާއި ބިލިއަނައަރުން ދިރިއުޅޭ އަގުބޮޑު ސަރަޙައްދުތައް ހިމެނޭ ގޮތަށް، އަލިފާން ރޯވަމުންދާއިރު ޕެރިސް ހިލްޓަނާއި އެކްޓަރ ބިލީ ކްރިސްޓަލްގެ އަމިއްލަ ގެ ވަނީ އަނދައިގެން ގޮސްފައެވެ.

އޮސްކާ ކާމިޔާބުކޮށްފައިވާ ލަވަކިޔުންތެރި ޑައިއޭން ވޮރެން، ޓޯކް ޝޯ ހޯސްޓް ރިކީ ލޭކް، އެކްޓަރ ކެރީ އެލްވެސް އަދި ރިއަލިޓީ ސްޓާރުންކަމަށްވާ ސްޕެންސަރ ޕްރެޓް އަދި ހައިޑީ މޮންޓާގް ވެސް ވަނީ އެ މީހުންގެ ގެތައް އަނދާހުލިވެއްޖެ ކަމަށް ބުނެފައެވެ.

އެމެރިކާގެ މީޑިއާތަކުން ރިޕޯޓުކުރާ ގޮތުގައި ޔޫޖީން ލެވީ އަދި އެޑަމް ބްރޯޑީ އަދި ލެއިޓަން މީސްޓަރ ވެސް ގެދޮރު އެނދި މީހުންގެ ތެރޭގައި ހިމެނެއެވެ.

މީޑިއާ ރިޕޯޓުތައް ބުނާ ގޮތުގައި ޓޮމް ހޭންކްސް، ބެން އެފްލެކް ހިމެނެނީ އެ ސަރަހައްދުން ރައްކާތެރި ސަރަހައްދަކަށް ގެންދެވުނު މީހުންގެ ތެރޭގައެވެ.

ސެންޓާ މޮނިކާ އާއި މަލިބޫގެ ދެމެދުގައިވާ ފަރުބަދައިގެ ސަރަޙައްދެއްކަމަށްވާ ޕެސިފިކް ޕެލިސޭޑްސްގައި ރޯވަމުންދާ އަލިފާނަކީ ކެލިފޯނިއާގައި މިވަގުތު އަދަމުންދާ ފަސް ސަރަހައްދުގެ ތެރެއިން އެންމެ ނުރައްކާތެރި އަލިފާންގަނޑު ކަމަށް ރިޕޯޓުތައް ބުނެއެވެ. މި ސަރަޙައްދަކީ މަޝްހޫރު މީހުންގެ އަގުބޮޑު ގެތައް ގިނައިން ހުންނަ ސަރަޙައްދެކެވެ.

ފެތުރެމުންދާ އަލިފާނުގެ ސަބަބުން މިހާތަނަށް މަދުވެގެން 10 މީހުން މަރުވެފައިވާ ކަމަށް އޮފިޝަލުން ވަނީ ހާމަ ކޮށްފައެވެ.