އެއްވެސް ބަޔަކަށް ގައުމުގެ ހަމަޖެހުން ނަގައިލުމަކަށް ފުރުސަތު ނުދޭނަން: ރައީސް
ސިޔާސީ ވިސްނުމުގައި ވިޔަސް އަދި އެހެން ގޮތަކުން ވިޔަސް ރައްޖޭގައި ހަމަޖެހުން ނަގާލަން އެއްވެސް ފަރާތަކަށް އެއްވެސް ފުރުސަތެއް ނުދެއްވާނޭކަމަށް ރައީސް ވިދާޅުވި
ގއ. މާމެންދޫގެ ރައްޔިތުންނާއި ރައީސް ބައްދަލުކުރެއްވުން.
ސިޔާސީ ވިސްނުމުގައި ވިޔަސް އަދި އެހެން ގޮތަކުން ވިޔަސް ރައްޖޭގައި ހަމަޖެހުން ނަގާލަށް އެއްވެސް ފަރާތަކަށް އެއްވެސް ފުރުސަތެއް ނުދެއްވާނޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
އެ މަނަކުފާނު މިހެން ވިދާޅުވީ ގއ. މާމެންދުއަށް ވަޑައިގެން، އެ ރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ގައުމުގެ ހަމަޖެހުން ނަގާލަން އެއްވެސް ބަޔަޔަކަށް ފުރުސަތު ނުދެއްވާނޭ ކަމަށާއި ގައުމުގެ ހަމަޖެހުން ނަގައިލަން އެއްވެސް ބަޔަކު އެއްވެސް ކަމެއްކޮށްފިނަމަ، ގައުމީ ވިސްނުމެއްގައި އެ ކަން ހުއްޓުވާނެ ކަމަށް ރައީސް ވިދާޅުވިއެވެ.
ރައީސްވަނީ ގައުމުގެ ތަރައްގީ ކުރެވެން އޮތީ ގައުމުގައި ހަމަޖެހުން އޮވެގެންކަން ފާހަގަކުރައްވައިފައެވެ. އަދި އެ ކަމަށް ޓަކައި ސަރުކާރުންދޭ އިސްކަން، އެ މަނިކުފާނުގެ ވާހަކަފުޅުގައި ފާހަގަކުރެއްވިއެވެ.
ރައީސް ވިދާޅުވީ އެ މަނިކުފާނުގެ ވެރިކަމެއްގައި ސިޔާސީ ގޮތުން އެއްވެސް މީހަކަށް އަނިޔާއެއް ނުކުރާނެ ކަމަށާއި، ބަދަލު ހިފުމެއް ވެސް ނޯންނާނެ ކަމަށެވެ. އަދި ގައުމުގެ ހަމަޖެހުން ގާއިމްކުރުމަށް ސަރުކާރުން ކުރާ މަސައްކަތުގައި ރައްޔިތުންގެ އެއްބާރުލުމަށް އެ މަނިކުފާނު އެދިވަޑައިގަތެވެ.
މީގެ އިތުރުން ރައީސްގެ ވާހަކަފުޅުގައިވަނީ މާމެންދޫގެ ރައްޔިތުންގެ ފަރާތުން އެންމެ ބޮޑަށް އެދިލެއްވި ކަންތައްތައް ކޮށްދެއްވާނެ ކަމަށް ވިދާޅުވެފައެވެ.
އޭގެ ތެރޭގައި ހުއްޓިފައިވާ ނަރުދަމާގެ މަސައްކަތް ބާރު ސްޕީޑުގައި ނިންމައި، އެއަށް ފަހު ކޮންޓްރެކްޓު ކުރެވިފައި އޮތް މަގުހެދުމުގެ މަޝްރޫއު ހަމަ އެ ގޮތަށް ހަލުވި ދުވެއްޔެއްގައި ކުރިޔަށް ގެންދަވާނެ ކަމަށް ވިދާޅުވިއެވެ.
މީގެ އިތުރުން އެ ރަށުގައި ދިމާވެފައި އޮތް އެންމެ ބޮޑު އެއް މައްސަލަ ކަމަށްވާ ރަށްގިރުމަށް، ކައުންސިލުން އެދުނު ގޮތަށް ވަގުތީ ހައްލު ގެނެސްދިނުމަށް އިންފްރާސްޓްރަކްޗަރު މިނިސްޓްރީއާ ގުޅިގެން ކުރިޔަށްދާނެ ކަމަށް ވެސް ރައީސް ވިދާޅުވިއެވެ.
އަދި އެ ރަށުގެ ސިއްޙީ މަރުކަޒުން 24 ގަޑިއިރު ޚިދުމަތް ލިބޭނެ ގޮތަށް ތަރައްގީކޮށްދެއްވައި، މި އަހަރުގެ ތެރޭގައި އެ ރަށު ސްކޫލުގެ މަލްޓިޕާޕަސް ހޯލުގެ މަސައްކަތް ފައްޓަވާނެ ކަމަށް ރައީސް ވިދާޅުވިއެވެ.
ރާއްޖޭގެ ހުރިހާ ރަށަކަށް ވަޑައިގެން، ކައުންސިލްތަކާއި ރައްޔިތުންނާ ބައްދަލު ކުރެއްވުމަށް ރައީސް ދަތުރުފުޅެއް ފެއްޓެވީ މިދިޔަ އަހަރުގެ ތެރޭގައެވެ.
