އަސާސީ ޤަވާއިދަށް ގެނައި ބަދަލާއެކު، ގެއްލުނީ ހިންގާ ކޮމެޓީގެ މަޤާމު
8 ޖެނުއަރީ 2025 | ބުދަ 01:07އަސާސީ ޤަވާއިދަށް ގެނައި ބަދަލާ އެކު ހިންގާ ކޮމެޓީގައި އިންނެވި އަޙުމަދު ކަލީމްގެ މަގާމު ވަނީ ގެއްލިފަ އެވެ.
ކްރިކެޓު ބޮޑުގެ ހިންގާ ކޮމެޓީގައި އިންނެވި އަޙުމަދު ކަލީމް
ކްރިކެޓު ބޯޑު އޮފް މޯލްޑިވްސްގެ އަސާސީ ޤަވާއިދަށް ގެނައި ބަދަލާއެކު، އެ ބޯޑުގެ ހިންގާ ކޮމެޓީގައި އިންނަވާ ފަރުދީ މެމްބަރުގެ މަގާމު ގެއްލިއްޖެ އެވެ.
ކްރިކެޓު ބޯޑު އޮފް މޯލްޑިވްސްގައި މިހާރު އޮތް ހިންގާ ކޮމެޓީ އިންތިޚާބު ކޮށްފައި ވަނީ މިދިޔަ އަހަރުގެ ސެޕެޓެމްބަރު މަހުގެ 20 ވަނަ ދުވަހު އެވެ. އެ އިންތިޚާބުގައި ކްރިކެޓު ބޯޑުގެ ހިންގާ ކޮމެޓީގެ ފަރުދީ މެމްބަރަކަށް އިންތިޚާބުވެފައި ވަނީ އަޙުމަދު ކަލީމް އެވެ. އެ އިންތިޚާބުގައި އެ މަޤާމަށް ވާދަކުރެއްވީ ވެސް ކަލީމް އެކަންޏެވެ. އެހެންވެ، އިންތިޚާބުގައި ވަނީ ފެންނަ ނުފެންނަ ވޯޓެއް ނަގައިފަ އެވެ. އެ މަގާމަށް ކަލީމް އިންތިޚާބު ކުރުމަށް ފެންނަ ކަމަށް ނުވަ މެމްބަރަކު ވަނީ ވޯޓު ދީފަ އެވެ.
އިންތިޚާބުގެ ފަހުން ކްރިކެޓު ބޯޑުގެ އަސާސީ ޤަވާއިދަށް ގެނައި ބަދަލާ އެކު، ހިންގާ ކޮމެޓީގައި އިންނަވާ ފަރުދީ މެމްބަރު ކަލީމްގެ މަގާމު ވަނީ ގެއްލިފަ އެވެ. އެ ބަދަލު ގެންނަން ކްރިކެޓު ބޯޑުން ނިންމީ، އެ ބޯޑުގެ ޤާނޫނީ ލަފާ އަރުވާ ލޯ ފާމްގެ ޤާނޫނީ އިރުޝާދުގެ މަތިން ކަމަށް ކްރިކެޓު ބޯޑުން ވަނީ މަައުލޫމާތު ދީފަ އެވެ. އަދި އެ ބަދަލު ގެންނަން ނިންމީ، ހިންގާ ކޮމެޓީގައި ކުލަބުތައް ތަމްސީލު ކުރުމަށް އޮންނަ ދައުރު ބޮޑު ކުރުމުގެ މަޤުސަދުގައި ކަމަށް ވެސް އެ ބޯޑުން ވަނީ ބުނެފަ އެވެ. އެ ބަދަލާއެކު، ފަރުދީ މެމްބަރުގެ ބަދަލުގައި މިހާރު ވަނީ ހިންގާ ކޮމެޓީ އަށް ކުލަބުތަކުގެ ފަރާތުން މެމްބަރަކު އިންތިޚާބު ވެސް ކޮށްފަ އެވެ.
ކްރިކެޓު ބޯޑުގެ ހިންގާ ކޮމެޓީގައި ތިއްބަވަނީ ޖުމުލަ ނުވަ މެމްބަރުންނެވެ. މިދިޔަ އަހަރުގެ ސެޕްޓެމްބަރު މަހުގެ އޮތް އިންތިޚާބުގައި ހިންގާ ކޮމެޓީ އަށް އިންތިޚާބު ކޮށްފައި ވަނީ ކުލަބުތައް ތަމްސީލު ކުރާނެ ހަ މެމްބަރުންނާއި، އެސޯސިއޭޓް ދެ މެމްބަރުން އަދި ފަރުދީ އެއް މެމްބަރެވެ. ނަމަވެސް ފަހުން އަސާސީ ޤަވާއިދަށް ގެނައި ބަދަލާއެކު، މިހާރު ހިންގާ ކޮމެޓީގައި ތިއްބަވާނީ ކުލަބުތައް ތަމްސީލު ކުރާ އަށް މެމްބަރަކާއި، އަދި އެސޯސިއޭޓް އެއް މެމްބަރެވެ.
މައުލޫމާތު ލިބިފައިވަ ގޮތުގައި މިދިޔަ އަހަރު އޮތް އިންތިޚާބުގެ ކުރިން، ކްރިކެޓު ބޯޑުގެ އަސާސީ ޤަވާއިދަށް ބަދަލު ގެންނަން ކޮމިޝަނަރ އޮފް ސްޕޯޓްސް އިން އޮތީ ލަފާ ދީފަ އެވެ. ނަމަވެސް އިންތިޚާބު ބާއްވައި، މަޤާމުތަކަށް މެމްބަރުން އިންތިޚާބު ކުރި ފަހުން އަސާސީ ޤަވާއިދަށް ބަދަލު ގެނައުމާއެކު ކަލީމްގެ މަގާމު ވަނީ ގެއްލިފަ އެވެ.
