މަރެސްކާ ބުނީ ޗެލްސީން އިތުރަށް ސަމާލުވާން ޖެހޭ ކަމަށް

އިނގިރޭސި ޕްރިމިއަރ ލީގުގައި ކުރިއަށްދާން ބަލާއިރު، ޗެލްސީން އިތުރަށް ސަމާލުވާން ޖެހޭ ކަމަށް އެ ޓީމުގެ ކޯޗު އެންޒޯ މަރެސްކާ ބުނެފި އެވެ.

އޭނާ މިހެން ބުނީ ލީގުގައި ކްރިސްޓަލް ޕެލަސްއާ ދެކޮޅަށް ޗެލްސީ ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗުގައި ޗެލްސީން ލަނޑު ޖަހައި ކުރި ވެސް ހޯދި އެވެ. ނަމަވެސް ޕެލަސް އިން ވަނީ ފަހު ވަގުތުގެ ތެރޭގައި ލަނޑު ޖަހައިގެން މެޗު އެއްވަރުކޮށްފަ އެވެ. މިއާއެކު ލީގުގައި އެންމެ ފަހުން ޗެލްސީ ކުޅުނު ތިން މެޗު ވެސް ނިންމާލަން ޖެހުނީ މޮޅެއް ނުހޯދި އެވެ.

މަރެސްކާ ބުނީ، މެޗުން ޗެލްސީ މޮޅުވެވޭ ވަރަށް އެ ޓީމުގެ ކުޅުންތެރިންގެ ފަރާތުން މަސައްކަތް ފެނުނު ކަމަށެވެ. ފުރަތަމަ ހާފު އަދި ދެ ވަނަ ހާފަށް ބަލާއިރު ވެސް، ޗެލްސީން ލަނޑު ޖަހާނެ ފުރުސަތުތަކެއް ތަނަވަސްކުރި ކަމަށާއި، މެޗުން ޗެލްސީ އަށް މޮޅުވުން ހައްގު ކަމަށް މަރެސްކާ ވަނީ ބުނެފަ އެވެ. އެހެން ނަމަވެސް ފުޓުބޯޅައިގައި އަބަދު ވެސް ސަމާލުވެ ތިބެން ޖެހޭނެ ކަމަަށާއި، އެ ނޫން ނަމަ ވަރަށް ފަސޭހަ އިން މެޗުތައް ގެއްލިގެން ދާނެ ކަމަށް މަރެސްކާ ބުންޏެވެ.

މީގެ އިތުރުން މަރެސްކާ ބުނީ މެޗުތަކުގައި އެންމެ މުހިންމީ ލަނޑު ޖަހަން ފުރުސަތުތައް ތަނަވަސްކުރުން ކަމަށާއި، ފުރުސަތުތައް ތަނަވަސްކުރުމަކީ ރަނގަޅު ގޮތުގައި ކުރިއަށް ދެވޭ ކަމުގެ ހެއްކެއް ކަމަށް ވެސް މަރެސްކާ ބުންޏެވެ. މެޗުތަކުގައި ތަނަވަސްކުރެވޭ ކޮންމެ ފުރުސަތެއްގައި ލަނޑެއް ނުޖެހޭނެ ކަމަށާއި، އަދި ލަނޑު ޖެހޭ ފަހަރާ ވެސް ދިމާވާނެ ކަމަށް މަރެސްކާ ބުނެފައިވެ އެވެ. ހަމައެހެންމެ، ބައެއް ޙާލަތްތަކުގައި ދެ ލަނޑު ޖަހަން ވެސް، ދިހަ ފުރުސަތު ތަނަވަސްކުރަން ޖެހޭ ކަމަށް މަރެސްކާ ބުންޏެވެ.

އިތުރަށް މަރެސްކާ ބުނީ އެ މެޗުގައި ޗެލްސީގެ ހުރިހާ ކުޅުންތެރިން ވެސް ވަރަށް ރަނގަޅު ކަމަށާއި، ކުޅުންތެރިން ކުރަމުން އަންނަ މަސައްކަތް އޭނާ ފުރިހަމަ އަށް ބަލައި ގަންނާނެ ކަމަށެވެ. އަދި ޗެލްސީން ދެން ތައްޔާރު ވާނީ އެފްއޭ ކަޕުގައި އެ ޓީމު ކުޅެން އޮތް މެޗަށް ކަމަށާއި، އެ މެޗުން މޮޅުވަން ވަރަށް މަސައްކަތް ކުރާނެ ކަމަށް ވެސް މަރެސްކާ ބުންޏެވެ.

އެފްއޭ ކަޕުގެ ތިން ވަނަ ބުރުގައި ޗެލްސީ ކުޅޭ މެޗު އޮންނާނީ ހޮނިހިރު ދުވަހުގެ ރޭ އެވެ.