ހުކުރު ދުވަހު ކުރި ވިއްސާރައިގައި ރާއްޖޭގެ އެކި ރަށްރަށުގައި ފެންބޮޑުވިނަމަވެސް މިހާރު ފެން ހިންދައި ހުރިހާ ރަށެއްވެސް އާންމު ހާލަތަށް ގެނެވިފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓޯ، އެންޑީއެމްއޭއިން ވިދާޅުވެއްޖެއެވެ.
މޫސުން ގޯސްވުމުގެ ސަބަބުން އެކި ރަށްތަކަށް އެކިވަރުގެ ގެއްލުންވަނީ ލިބިފައެވެ. އެގޮތުން ހުކުރު ދުވަހުގެ ވިއްސާރައިގައި ރ. އިނގުރައިދޫއަށާއި ށ. މަރޮށްޓަށް އުދަ އަރައިގެން އެކި ވަރުގެ ގެއްލުންތައް ލިބިފައިވާކަމަށާއި އަދި އިތުރު ރަށްތަކަށްވެސް އެކި ވަރުގެ ގެއްލުންތައް ލިބިގެން ރިޕޯޓްކޮށްފައިވާކަމަށް އެންޑީއެމްއޭއިން ބުނެފައިވެއެވެ.
ހުކުރު ދުވަހު ކުރި ވިއްސާރައިގައި ރަށްތަކަށް ލިބުނު ގެއްލުން ބެލުމަށް އެންޑީއެމްއޭއިން އެސެސްމަންޓް ހަދަމުން އަންނަ ކަމަށް އެ އިދާރާއިން ބުނެފައިވާއިރު، ފެންބޮޑުވެ ގެއްލުންތައް ލިބުނު ރަށްތަކަށްވި އެކިވަރުގެ ގެއްލުންތަކުގެ ތަފްސީލުވެސް އެ އިދާރާއިން ވަނީ ރިޕޯޓުކޮށްފައެވެ.
ފެންބޮޑުވި ރަށްތައް
- ފ. ނިލަންދޫ: %80 ގެތަކުގައި ފެންބޮޑުވި
- ދ. ކުޑަހުވަދޫ: 10 ވަރަކަށް ގެއަށް ގެއްލުން ލިބުނު
- ދ.މީދޫ: 10 ވަރަކަށް ގެއަށް ގެއްލުންވި
- ފ.މަގޫދޫ: 9 ގެއަކަށް ގެއްލުން ލިބި 1 ގެއިން މީހުން ހުސްކުރި
- އދ. މާމިގިލި: 4 ގެއަކަށް ބޮޑެތި ގެއްލުންތަކެއް ލިބުނު
-ކ. ގުރައިދޫ: 60 ގެއަށް އެކިވަރުގެ ގެއްލުން ލިބިފައިވޭ.
-ފ.ފީއަލީ: ފެންބޮޑުވެގެން 1 ގެއިން މީހުން ހުސްކޮށްފައިވޭ
ކ.ހިންމަފުށި: %60 ގެތަކުގައި ފެންބޮޑުވެފައިވޭ
އެންޑީއެމްއޭއިން ބުނީ ފެންބޮޑުވި ހުރިހާ ރަށެއްގައިވެސް މިހާރު ފެން ހިންދާފައިވާ ކަމަށެވެ. އަދި ހުސްކުރި ގެތަކުގެ މީހުން އަނބުރާ ގެތަކަށް ބަދަލުވެފައިވާ ކަމަށްވެސް އެ އިދާރާއިން ބުނެފައިވެއެވެ.
ވާރޭގައި ގެއްލުން ލިބުނު ރަށްތަކުގެ ކައުންސިލްތަކުން ވެސް އަންނަނީ އެ ރަށްރަށުގެ ރައްޔިތުންގެ ހާލަތުގާތުން ބަލަމުންދާކަމަށާއި ލިބުނު ގެއްލުންތަކުގެ މައުލޫމާތު އެއް ކުރަމުންދާ ކަމަށް އެންޑީއެމްއޭއިން ބުނެއެވެ.
