ރެއާލް މޮޅުވީއިރު، ވިނީޝިއުސް އަށް ރަތެއް

ސްޕެނިޝް ލީގުގައި ވެލެންސިއާއާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން ރެއާލް މެޑްރިޑު މޮޅުވެއްޖެ އެވެ.

ވެލެންސިއާގެ އަމިއްލަ ދަނޑުގައި ހުކުރު ދުވަހުގެ ރޭ ކުޅުނު މެޗު ރެއާލް އިން ކާމިޔާބު ކުރީ 2-1 އިންނެވެ. އެއީ މެޗުގައި ވެލެންސިއާ އިން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި ވެލެންސިއާ އަށް ލީޑު ނަގައިދިނީ ހޫގޯ ޑުރޯ އެވެ. ދެ ވަނަ ހާފު ފަށައިގެން ދިހަ ވަނަ މިނެޓުގައި ރެއާލަށް ލިބުނު ޕެނަލްޓީ ޖޫޑް ބެލިންހަމް ފޮނުވާލި ނަމަވެސް، ކާމިޔާބެއް ނުވި އެވެ. އޭގެ ހަތަރު މިނެޓު ފަހުން ރެއާލްގެ ކީލިއަން އެމްބާޕޭ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ ބަލައި ނުގަންނަން ނިންމައިފަ އެވެ. އެއީ އެމްބާޕޭ އޮފްސައިޑުގައި ހުރުމުންނެވެ.

މެޗުގެ 79 ވަނަ މިނެޓުގައި ރެއާލްގެ ވިނީޝިއުސް ޖޫނިއާ، ވެލެންސިއާގެ ގޯލު ކީޕަރަށް ފައުލު ކުރުމުން އޭނާ އަށް ވަނީ ސީދާ ރަތް ކާޑު ދައްކައިފަ އެވެ. އޭގެ ފަހުން މެޗުގެ 85 ވަނަ މިނެޓުގައި ރެއާލަށް ނަތީޖާ ހަމަހަމަ ކޮށްދިނީ ލޫކާ މޮޑްރިޗް އެވެ. މެޗުގެ ފުރިހަމަ ވަގުތު ހަަަމަވެ އިތުރަށް ދެއްކި ވަގުތުގައި ރެއާލް މޮޅުކޮށްދިން ލަނޑު ޖެހީ ބެލިންހަމް އެވެ.

މޮޅާއެކު ރެއާލް އިން ވަނީ ލީގު ތާވަލްގެ އެއް ވަނަ އަށް ޖެހިލައިފަ އެވެ. އެއީ މިހާތަނަށް ކުޅުނު 19 މެޗުން 43 ޕޮއިންޓު ހޯދައިގެންނެވެ. ރެއާލަށް ވުރެ އެއް މެޗު މަދުން ކުޅެގެން ދެ ވަނައިގައި އެތުލެޓިކޯ މެޑްރިޑަށް ލިބެނީ 41 ޕޮއިންޓެވެ. ތިން ވަނައިގައި ބާސެލޯނާ އަށް 38 ޕޮއިންޓު ލިބެނީ 19 މެޗުންނެވެ.