ވޮޝިންޓަން ޕޯސްޓުގައި ކުރެވުނީ ދެ ތުހުމަތެއް، އޭގެ ތެރެއިން އެއްކަމަކީ ހިގިކަމެއް، އެއީ އެމްޑީޕީގެ 13 މެމްބަރުން މި ސަރުކާރަށް ސޮއިކުރުން
އަލީ ހުސެއިން
ރައީސް ޑރ. މުޙައްމަދު މުއިއްޒުގެ ސަރުކާރުން އިދިކޮޅު ޕާޓީ އެމްޑީޕީއަށް ނިސްބަތް ވާ 13 މަޖިލިސް މެމްބަރުން ގެންދިޔަ މައްސަލަ ތަހުގީގުކުރަން ޖެހޭނޭ ކަމަށް ކެންދޫ ދާއިރާގެ ކުރީގެ މަޖިލިސް މެންބަރު، އަލީ ހުސެއިން ވިދާޅުވެއްޖެއެވެ.
އަލީ ހުސެއިން މިފަދައިން ވިދާޅުވެފައި ވަނީ ބުދަ ދުވަހުގެ ރޭ ރާއްޖެ ޓީވީން ގެނެސްދިން "ޓީވީ ޓޯކް" ޝޯގައި ވާހަކަދައްކަވަމުންނެވެ.
ރައީސް ޑރ. މުހައްމަދު މުއިއްޒުގެ ވެރިކަން އިންޑިއާގެ ރޯ އެޖެންޓުންގެ އެހީތެރިކަމާ އެކު ވައްޓާލަން ރާއްޖޭގެ އިދިކޮޅު ފަރާތްތަކުން ބޮޑު ރޭވުމެއް ރާވަމުންދިޔަ ކަމަށް އެމެރިކާގެ މަޝްހޫރު ދުވަހު ނޫސް، ވޮޝިންގްޓަން ޕޯސްޓުން ބުނެފައިވާތީ އެކަމަށް އިޝާރާތް ކުރައްވާ އަލީ ހުސެއިން ވިދާޅުވީ ވޮޝިންޓަން ޕޯސްޓުން ދެކަމެއް ފާހަގަކުރެވޭ ކަމަށާއި އެއްކަމަކީ ރައީސުލްޖުމްހޫރިއްޔާ އަޒުލްކުރައްވަން އިދިކޮޅު ފަރާތްތަކުން ރޭވިކަމުގެ ވާހަކައާއި މިހާރުގެ ރައީސުލްޖުމްހޫރިއްޔާ ފައިސާގެ ނުފޫޒު ބޭނުންކުރައްވައިގެން އިދިކޮޅު އެމްޑީޕީ މަޖިލިސް މެމްބަރުންތަކެއް ގެންނެވި ވާހަކަމަށެވެ.
އެގޮތުން ވޮޝިންޓަން ޕޯސްޓުގައި ފާހަގަކުރެއްވި ކަންތައްތަކުގެ ތެރެއިން ހިނގީ ކޮންކަމެއްތޯ ސުވާލުކުރައްވާ އަލީ ހުސެއިން ވިދާޅުވީ ވޮޝިންޓަން ޕޯސްޓުގައި ކުރެވިފައިވަނީ ދެ ތުހުމަތެއް ކަމަށާއި އޭގެތެރެއިން އެންމެންގެ ލޯކުރިމައްޗަށް ފެންނަން އޮތް، އަދި ހިނގިކަމަކީ އެމްޑީޕީގެ 13 މަޖިލިސް މެމްބަރުން ވެރިކަން ކުރާ މައި ޕާޓީ ޕީއެންސީއާ ގުޅުންކަމަށެވެ. އެއީ ހަމަގައިމުވެސް ހިނގި ކަމެއް ކަމަށާއި އެގޮތުން އެމްޑީޕީ މެމްބަރުން ޕީއެންސީއާއި ގުޅިވަޑައިގަތް ރޭ ބޭއްވި ޖަލްސާގައި، އެން އަޅައިގެން މަސްބޭނި ރެއެއްކަމަށާއި އަދި މަސްވެރިކަން ވަރަށް ތިޔާގި ރެއެއްކަމަށް މިހާރުގެ ފިޝަރީޒް މިނިސްޓަރ ވިދާޅުވެފައިވާ ކަމަށް ވެސް އަލީ ހުސެއިން ވިދާޅުވިއެވެ. އަދި މިހާރުގެ ފިޝަރީޒް މިނިސްޓަރު ނުގޮތަކަށް އެ ވިދާޅުވީ ކީކޭކަން އެންމެންނަށް ވެސް އެނގޭނެ ކަމަށް ވެސް އޭނާ ވިދާޅުވިއެވެ.
ނަމަވެސް އަލީ ހުސެއިން ވިދާޅުވީ، އިދިކޮޅު ފަރާތްތަކުން މިހާރުގެ ރައީސުލްޖުމްހޫރިއްޔާ އަޒުލް ކުރަން މަސައްކަތްތަކެއް ކުރި ކަމަށް ބުނެ ކުރެވުނީ ތުހުމަތެއް ކަމަށާއި އެ މައްސަލަ ތަހުގީގު ކުރަން ފެންނަނަމަ ތަހުގީގުވެސް ކުރެވިދާނޭ ކަމަށެވެ. ނަމަވެސް ރައީސުލްޖުމްހޫރިއްޔާ އަޒުލު ކުރަން އިދިކޮޅުފަރާތްތަކުން ކުރި އެއްވެސް މަސައްކަތެއް މިހާތަނަށް ވެސް ފެންނަން ނެތް ކަމަށާއި އެއީ ހިނގިކަމެއް ވެސް ނޫންކަމަށް އަލީ ހުސެއިން ވިދާޅުވިއެވެ. ނަމަވެސް ވޮޝިންޓަން ޕޯސްޓުގައި ފާހަގަކޮށްފައި އޮތް ދެކަމުގެ ތެތެރެއިން ހަމަ އެކަނި ފެންނަން އޮތް ހަގީގަތަކީ ޕީއެންސީން އެމްޑީޕީގެ މެމްބަރުންތަކެއް އެ ޕާޓީއަށް ސޮއި ކުރުވިކުރުވުންކަމަށް އޭނާ ވިދާޅުވިއެވެ.
މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ފައިސާގެ ނުފޫޒު ބޭނުން ކުރައްވައިގެން އެމްޑީޕީގެ 13 މެމްބަރުން ޕީއެންސީން ގެންނެވި ކަމަށް ބުނާ މައްސަލައަށް އިޝާރާތް ކުރައްވަމުން އަލީ ހުސެއިން ވިދާޅުވީ، ތުހުމަތުކުރެވޭ މައްސަލަ ތަހުގީގު ކުރިޔަސް އަދި ނުކުރިޔަސް، ހަގީތަކުގައި ހިނގިކަންތަން، އެއީ ކިހިނެއް، ކޮންގޮތަކަށް ހިނގާދިޔަ ކަމެއްތޯ ތަހުގީގު ކުރަން ޖެހޭނޭ ކަމަށެވެ.
